Problema di pensionado di SVB Curacao trata cu Parlamento di Curacao

Manera anticipa lider di MEP Evelyn Wever-Croes a discuti e problema di pensionadonan cu Parlamento di Corsow. 
Ta trata di pensionadonan Arubiano cu a traha den tempo di Antiyas y ta haya pensioen di SVB di Corsow. 
Fin di aña pasa nan cada un a haya un carta di SVB Corsow pa informa nan cu ta bay corta 10% di e pensioen di cada luna y ademas na december nan no lo haya e bonus di pasco mas. 
Esaki a trece hopi problema financiero pa e grupo di pensionado aki, cu na nan turno a acudi serca e lider di fraccion di MEP pa un solucion of ayudo. 

Lider di MEP Evelyn Wever-Croes a indica cu a purba riba nivel di gobierno di Corsow, pero esey ta algo cu ta gobierno di AVP mester haci y nan no tabata tin mucho interes pa yuda pensionadonan. 

Pues lider di MEP a dicidi di trata esaki den reunion entre parlamento y parlamento. Durante e reunionnan Tripartiet di Aruba, Corsow y Sint Maarten dialuna ultimo na Hulanda, esaki a wordo trata. St. Maarten a indica cu nan tambe tin e problema ey. 

A keda palabra cu e parlamentarionan di Corsow lo busca mas informacion y mira si por yega na un solucion. Lider di MEP Evelyn Wever-Croes lo sigui den contacto cu su coleganan di Corsow, pa por logra elimina e medida aki contra pensionadonan. En todo caso, tin movecion den direccion di un posibel solucion.

---