PROGRAMA AMBICIOSO DI GOBIERNO PA INTEGRIDAD

Diamars Prome Minister Evelyn Wever-Croes y Minister di Husticia Andin Bikker a asisti na e reunion publico den Parlamento riba e topico di Integridad. Na aña 2017 tempo cu Gabinte Wever-Croes a cuminsa goberna nos pais, tawata obvio cu e pueblo tawata tin un desconfiansa grandi den politica. E tempo ey tawata tin investigacion IBIS, un investigacion hopi serio di corupcion den gobernacion. Despues a bin e caso Avestrus y caso Flamingo cuananl ta pruebanan cu e desconfiansa cu pueblo tawata tin, tin su fundamento.


Na aña 2017 a bin cu un acuerdo di gobernacion entre partidonan MEP, POR y RED cu a ser yama; “Hunto pa Aruba” y tin como prome capitulo BON GOBERNACION, INTEGRIDAD Y TRANSPARENCIA. Esaki sigur ta un topico hopi importante, y pa e motibo aki a bin como punto number uno den e programa di gobernacion.


“E meta di esaki ta pa e ciudadano por haña confiansa bek den su gobierno. P’esey a prepara un programa hopi ambicioso y a tene Parlamento informa di e desaroyonan na mas di un ocacion”, Prome Minister a duna di conoce.


E mandatario principal a informa den Parlamento cu den e propositonan di Gobierno cu ta compaña presupuestonan 2018, 2019, 2020, Gobierno a elabora riba e trayecto di integridad y tambe den e ‘Jaarverslag 2018 y 2019’ di Ministerio di Asuntonan General a mantene Parlamento constantemente informa dunando resumen di kico ta wordo haci y unda ta para cu e trabounan.


Ademas, segun Prome Minister, nos tur por a mira cuanto placa di pueblo ta wordo gasta of no ta wordo cobra, den e casonan di corupcion. Pues combatiendo corupcion nos ta yuda soluciona e problema financiero di nos pais tambe.


Gobierno a cuminsa na 2017 cu e ehecucion di su plan ambicioso te na momento cu Covid a confronta nos cu consecuencia cu Gobierno mester a cambia e proyeccionnan y a paralisa hopi cos entre otro e trayecto aki. Tur ministerio den gobierno mester a cambia prioridadnan especialmente e fondonan cu tawata tin aloca pa cierto proyectonan mester a wordo re-aloca pa atende cu e aspectonan mas urgente di e crisis.


Prome Minister a enfatisa: “Pa loke ta trata integridad, nos no kier a rindi y a continua poco poco cu e trabounan. Integridad – bon gobernacion – transparencia ta e principionan basico di nos gobernacion y caminda cu e principionan aki wordo viola, nos ta tuma accion mesora”.
Prome Minister a indica cu a crea e ministerio di integridad pa tira bista riba e proyectonan. E trabou no ta cla ya cu a encontra hopi contra tempo. Pero Prome Minister y Gobierno complete ta sigui mas determina cu nunca pa finalisa e trayecto di integridad.


Prome Minister ta enfatisa si: “MI NO TA UN JUFFROUW DI KINDERGARDEN! Cada minister tin su responsabilidad y nan mester carg’e. Berdad Minister Presidente tin hopi pasenshi, pero hasta esey tin su limite. Ministernan ta adultonan responsabel, cu a huramenta pa goberna nos pais “naar eer en geweten”. Mayoria di nan ta carga nan responsabilidad y ta haci nan trabou mescos cu ami ta haci di mi”.


Prome Minister a asegura si di ta sostene cada un di su ministernan y lo brinda ayudo necesario. Den cierto casonan Prome Minister ta actua pa protehe e minister mes, por ehempel cu e tema di cannabis, cu minister di enseñansa ta pone hopi presion. Prome Minister a tum’e den proteccion y splic’e cu hustamente pasobra su partido a campanja fuertemente cu e tema aki, e mester ta mas cauteloso. El a pidi Prome Minister pa duna vergunning sin cambia e ley, pero a splike cu nos MESTER cana e caminda legal prome, maske cuanto necesidad nos tin economicamente, pa su mes proteccion, nos mester tene cuenta cu ley.


Por lo demas e ministernan mes ta atende e casonan di kiebro di integridad, si ta trahado spirito nan ta topa cu ne, cos cu e gobierno aki a topa cantidad ora a drenta, y a tuma paso inmediatamente. Of contractnan cu no ta bon, tambe ta cosnan cu tur a topa y a tuma accion mesora.


“E ministernan mes ta bay Ministerio Publico, of nan mes ta encamina e procedura di investigacion y castigonan disciplinario. Esaki ta conta pa Minister Xiomara Maduro, Chris Romero, Glenbert Croes, Dangui Oduber, Andin Bikker, Marisol Lopez-Tromp y Rudy Lampe. Bringa integridad y bon gobernacion ta e gobierno aki su pan di cada dia y e ta wordo haci cu hopi orguyo”, Prome Minister a enfatisa den reunion publico den Parlamento.