PROME MINISTER A REUNI CU PARLAMENTO HUBENIL

Dialuna atardi, Prome Minister Evelyn Wever-Croes a reuni cu hobennan di Parlamento Hubenil. Parlamento Hubenil ta un fundacion cu a wordo lanta na 2003 basa riba e Tratado di Mucha y ta prepara hobennan riba temanan di interes general. Un reunion cu a bay largo na unda cu Prome Minister a tuma tempo pa scucha ideanan, preocupacionnan y sugerencianan di e hobennan. Un grupo di hoben hopi bon prepara y hopi motiva.


Den e prome reunion aki a trata temanan intereseante y profundo entre nan e tema di Medio Ambiente, Economia y Enseñansa. Prome Minister a ricibi hopi pregunta y hopi sugerencia mira desde un punto di bista di un hoben. Bos di nos hobennan ta conta y ta importante pa scucha nan opinionnan y ideanan mirando cu ta nan ta esnan cu nos ta guiando pa guia nos pais den futuro.


Gabinete Wever-Croes ta balora nos hobennan y a expresa cu e reunion tawata hopi constructivo y positivo y ta e intencion di sinta cu e grupo di Parlamento Hubenil mas biaha.


Prome Minister Evelyn Wever-Croes: “Ora bo duna hubentud e oportunidad pa expresa nan opinion, bo ta construyendo hunto un futuro pa nan”.