PROME MINISTER A REUNI CU RAAD VAN ADVIES

Ta trahando riba cambionan necesario pa duna mas posibilidad y independencia na e instituto aki pa garantisa democracia firme


Prome Minister Evelyn Wever-Croes diaranson mainta a reuni cu Conseho Consultativo, Raad van Advies. Raad van Advies ta e organo consultativo cu ta duna Gobierno conseho riba tur ley cu Gobierno kier cambia y e ta un di e colegionan halto di estado, cu ta importante pa fortifica nos democracia. Gobierno ta trahando pa fortifica e instituto aki y duna e instituto mas independencia pa nan por haci e tarea di control y conseho pa garantisa checks and balances den nos pais.


Prome Minister a indica cu esaki ta tambe e motibo pa cua el a institui e comision ‘Commissie Versterking Democratisch Bestel’ cu ta haciendo e cambionan necesario pa asina tur e colegionan halto di estado por tin mas posibilidad y mas independencia pa haci e control di manehonan di Gobierno. Esaki, Prome Minister ta enfatisa, ta e unico garantia pa un democracia firme den nos pais.