Prome Minister Evelyn Wever-Croes: ARUBA A TUMA DESPEDIDA DI NOS TATA DI CULTURA: “Padu su momeria y legado lo biba pa semper”

​Diahuebs y diabierna, Aruba a tuma despedida fisico di un gran yiu di Tera. Juan Chabaya Lampe. Miho conoci pa comunidad di Aruba como Padu Lampe, Padu del Caribi, Tata di nos Cultura. Padu ta un balor den e desaroyo cultural di nos pais y ta un di e arkitectonan di nos Himno cu tur dia ta inspira nos cu e palabranan di guia y cu su bunita melodia.
 
Nos Tata di Cultura, Padu, indudablemente ta laga un impresion enorme riba nos pais. Padu a inspira hopi musico y hopi di esnan cu ta traha den cultura a wordo bendiciona cu e conocemento y gracia cu Padu a pasa over pa nan. Padu a laga un legado cu nos nunca por lubida.
 
Padu ta bay laga atras su famia cu indudablemente lo haya hopi falta di dje. Aruba completo lo haya su falta. Pero nos tin e consuelo cu Padu ta sigui biba den nos mente y curason.
 
Den nomber di Gobierno di Aruba, Prome Minister Evelyn Wever-Croes a desea famia y henter pueblo di Aruba hopi forsa cu e siguridad cu e memoria y legado di Padu lo keda biba pa semper. Cu Padu sosega na paz.