PROME MINISTER HUNTO CU MIEMBRONAN DI QUOTA CLUB A ASISTI NA UN DEMOSTRACION DI E UZO DI EARPLUGS

Diabierna mainta, Prome Minister Evelyn Wever-Croes hunto cu mas miembro di Quota International of Aruba a bishita scol basico St. Aloyisius y a duna e muchanan di 5de y 6de klas un demostracion interesante di e uzo di earplugs pa proteha nan oido. Sr. Glen Rock a haci e presentacion mustrando e muchanan con importante ta pa nos cuida nos oido. Muchanan a haya earplugs nan pa por uza specialmente durante e temporada aki di Carnaval.


Quota Club ta conoci y hopi aprecia pa su campaña di conscientisacion di cuido di oido especialmente di nos muchanan durante temporada di Carnaval. Como miembro di Quota, Prome Minister ta sostene e ‘Earplugs Campaign’ CUIDA BO OIDO. Quota cu su charlanan na scolnan, ta conscientisa muchanan tocante cuido di nan oido y asina e muchanan por hiba e mensahe na cas pa nan mayornan pa asina hunto por conscientisa henter nos comunidad.


Prome Minister ta recorda tur ciudadano riba e importancia di nos oido. Na un forma, nos oido ta conecta nos cu e resto di mundo. Una bes nos perde oido, nos lo no haya esaki bek. Ta pa e motibo aki, nos responsabilidad ta pa conscientisa y cuida oido especialmente di nos muchanan.


Durante temporada di Carnaval, nos muchanan lo gosa hopi mas si nan oido ta protegi. Adultonan por scoge pa no uza earplugs, pero ta nos obligacion pa cuida oido di nos muchanan lagando nan uza earplugs. Como un comunidad, laga nos gosa Carnaval grandemente pero responsabelmente. Cuida nos muchanan di solo y cuida nan oido y ban permiti nan gosa nan fiesta sanamente.