Prome Minister ta bishita Scol Cacique Macuarima PROYECTO PILOTO eLEARNING TA EXITOSO

​Diamars Prome Minister Wever-Croes a haci un bishita na Scol Cacique Macuarima pa mira e avansenan den e proyecto di innovacion cu a cuminsa e aña aki. Durante su bishita Premier Wever-Croes a nota e entusiasmo y satisfaccionvden tanto di  docentenan como e alumnonan pa cu e cambionan haci na nan scol riba e tereno di innovacion. Scol Basico Cacique Macuarima cu ta e prome scol na Aruba cu a cuminsa cu e eLearning Pilot Project.
 
Na luna di april e aña aki, den colaboracion cu Minister di Enseñansa, Armando Lampe, Gabinete Wever-Croes a lansa un proyecto piloto innovativo den educacion primario pa stimula e 21Century Skills for di un edad hoben caba. Scol Basico Cacique Macuarima a wordo scogi pa asina desaroya un programa di innovacion den un manera nobo y unico.
 
Na augustus 2019 a cuminsa cu “touch screen” cual a cay na agrado di e docentenan pero especialmente di e alumnonan cu awor por wak videonan en conexion cu nan lesnan y tin e oportunidad di skirbi riba e “touch screen”.  Tambe e scol a introduci e “Hour of Code” na unda tur alumno ta siña coding, con pa traha weganan di computer nan mes haciendo uzo di varios habilidad necesario.
 
Prome Minister Wever-Croes ta sumamente enthusiasma pa wak con contento e cambionan aki a haci e alumnonan di Scol Cacique Macuarima y con exitoso e proyecto piloto aki a resulta ya cu ta basa riba e resultado aki lo evalua si lo continua cu e proyecto aki.
 
Prome Minister Wever-Croes a gradici e ekipo di maestro di Scol Cacique Macaurima pa e cooperacion duna na e proyecto piloto eLearning, na Meneer Edgard Vrolijk pa ta e motor tras di esaki y na Varelie Croes cu ta e Chief Innovation Officer y su ekipo y tur cu a contribui  pa haci e proyecto aki uno exitoso.
 
Prome Minister Evelyn Wever-Croes, den nomber di Gobierno a decreta aña 2020 como aña di Innovacion y Enseñansa. eLearning ta un paso concreto den innovacion y educacion pa modernisa, fortalece y capacita nos como pais pa e retonan actual y di futuro.