Publicacion di ‘BaluArte’ ta proyecta y aprecia algun di e personanan y organisacionan cu grandemente a aporta na arte y cultura di nos Pais

​Recientemente Minister di Cultura a presenta e buki conmemorativo ‘BaluArte’. Pa prome bes Aruba tin un publicacion y na nos mes idioma Papiamento cu a documenta un cantidad di 30 persona y/of organisacion cu a contribui considerablemente na desaroyo artístico y cultural di nos pais den e ultimo 65 añanan. Ademas ‘Baluarte’ ta duna un bista amplio di cantidad grandi di proyecto, obra, actividad, presentacion y publicacion cu a tuma luga durante di transcurso di aña.


‘BaluArte’ ta contene historia di e pioneronan cultural manera Hubert ‘Lio’ Booi (q.e.p.d.), Marlene Lampe, nos mama di Cultura Bernadina Growell (q.e.p.d), nos Tata di Cultura, ‘Padu Lampe’, Jossy Brokke Jr., Vale Croes (q.e.p.d.), Robert JeanD’or, Astrid Salazar, Diana Antonette, Maybelline Arends, Sharon Rose, Chencho Kelly, Rafaela Elizabeth, Tica Giel, Claudius Phillips, Joan Danies y Jhon Freddy Tobón Montoya.


Den e buki historico aki tambe a documenta historia di e organisacionan, fundacionan, instancianan y gruponan cu a celebra un of mas lustro den añanan cu a transcuri y cu a duna un aporte grandi riba tereno artístico y cultural manera Fundacion Lanta Papiamento, Stichting Arubaanse Muziekschool, Grupo Cultural Hubenil de Trupialen, Prins Bernard Cultuurfonds Caribisch Gebied, Cas di Cultura Aruba, Tele Aruba, Grupo di Betico, Pierewietje, Club di Movimiento, Fundacion Muchila Creativo y Scol di Arte. Alabes BaluArte a dedica atencion na nos idioma Papiamento y na e Grupo di Corector di Papiamento.


Minister Ruiz-Maduro a subraya cu cada un di e pioneronan cultural tabata di un contribucion importante y a duna un apoyo grandi na desaroyo riba tereno di arte y cultura na nos Pais Aruba. ‘BaluArte’ ta documenta parti di nos herencia cultural y ta duna informacion interesante cu pa hopi di nos tabata desconoci. Ademas e publicacion ta un bunita buki pa medio di cua nos futuro generacion por cera conocí cu algun di nos pioneronan cultural.


E mandatario ta felicita pueblo di Aruba cu su publicacion ‘BaluArte’. Cada un di nos mester sinti nos orguyoso di nos patrimonio cultural y mester sigui reconoce nos baluartenan cultural. Pronto e publicacion BaluArte lo ta obtenibel riba mercado y lo informa na unda e ta obtenibel.