RE-APERTURA DI IMELDA KLEUTERSCHOOL Tur mucha mester haya educacion den un miho edificio, agradabel y sigur

Imelda Kleuterschool dialuna atardi a celebra e re-apertura di e scol na Oranjestad. Un acto solemne cu bendicion special di Pastoor Jairo Maduro. Imelda Kleuterschool a wordo habri oficialmente na september 1961 pero a opera for di 1960. Na September Imelda Kleuterschool a celebra 60 aña di existencia. E edificio a haya un renobacion cu ta mas adecuado pa nos muchanan y awe a tuma luga e re-apertura di e scol.


Prome Minister Evelyn Wever-Croes Evelyn Wever-Croes a duna un discurso na unda cu el a enfatisa e importancia pa tur mucha ricibi educacion den un edificio adecua.


“Educacion ta e arma di mas importante cu un pais tin. Despues di e crisis actual cu mundo henter ta pasando den dje, educacion lo yuda nos no solamente pa cambia sino tambe pa reconstrui mundo bek. Esaki ta conta tambe pa Aruba. Cu un miho preparacion den enseñansa, nos lo reconstrui Aruba pa un miho futuro.


Enseñansa preparatorio ta e fundeshi pa enseñansa den futuro. Ta hopi importante pa tur mucha na Aruba tin un scol cerca den nan bario cu ta brinda nan miho facilidad pa yega scol. Y awo atrobe, muchanan di Oranjestad por conta cu un scol den bario atrobe bunita renoba cu re-apertura di Imelda Kleuterschool.


Ta importante tambe pa e infrastructura, e edificio ta den bon condicion y adecua pa asina muchanan tin un bon luga pa ricibi educacion siendo un scol e di dos cas pa tanto alumno y pa maestronan. Ta p’esey tawata hopi importante pa traha riba e proyecto aki y awe a bira realidad cu Imelda Kleuterschool tin un miho luga y miho ambiente agrabel y sigur.


Innovacion tambe ta bay ta importante pasobra innovacion ta bay ta e yabi pa habri portanan den futuro. Mayoria di nos muchanan awe, lo bay traha trabounan cu ainda no ta existi. P’esey ta importante sigui inverti den innovacion y enfoca den preparacion di maestronan pa e era digital. E cambionan nos dilanti lo bira parti importante di nos economia”, Prome Minister Evelyn Wever-Croes a duna di conoce.


Prome Minister a termina gradiciendo tur docente y mayornan pa nan dedicacion den e educacion di nos muchanan y a felicita nan cu e edificio bunita renoba di Imelda Kleuterschool.


Presente na e re-apertura tawata Parlamentarionan Edgar Vrolijk, Shailini Tromp-Lee, Jennifer Reyes y tur maestro di Imelda Kleuterschool.