REAPERTURA DI FRONTERA DIARANSON 1 DI JULI 2020:

“Un stap grandi pero necesario pa asina por cuminsa desaroya e economia di pais Aruba”


Diaranson 1 di juli 2020 ta un dia hopi importante den e trayecto di maneho pa loke ta trata Covid-19 na Aruba, e reapertura di frontera. Durante e conferencia di prensa di Gobierno di Aruba dialuna mainta, Prome Minister Evelyn Wever-Croes a splica e importancia pa cu e reapertura di frontera. Esaki sigur, Prome Minister a enfatisa, ta un stap grandi pero necesario pa asina por cuminsa desaroya e economia di pais Aruba. E situacion financiero actual di nos pais ta critico y no por permiti Gobierno sigui fia placa pa FASE y LoonSubsidie sin tin niun entrada.


Aruba ta habriendo su frontera bek y cu hopi rekisito, pasobra apesar di e situacion, bienestar general di nos comunidad ta keda central. E exigencianan pa e turista cu lo kier bishita Aruba ta halto y costoso y ta causa incertidumbre den comunidad pero pa Gobierno di Aruba e bida di nos hendenan bal hopi y ta keda na prome luga.


Un di e exigencianan pa habri frontera ta cu tur hende cu drenta Aruba mester ta negativo di COVID. E test aki por wordo haci na pais di origen of na yegada na Aruba. Diasabra ultimo a haci un test-run cu un vuelo cu a yega y tur cos a bay manera mester ta mustrando asina cu Aruba ta cla pa ricibi su bishitantenan.


E test di COVID ta importante pa asina por filtra e casonnan di personanan cu por tin e virus sin cu nan sa y asina evita cu nan ta drenta Aruba cu n’e. E test ta costa $75 y aunke cu pa hopi hende e ta caro, apenas e ta yega pa cubri e gastonan y ta pa e motibo aki e otro paisnan ta cobra hopi mas placa pa e test aki.


Aparte di e test, Aruba ta exigi un seguro cu no solamente ta cubri e gastonan medico sino tambe e gastonan di isolacion di e turista. Un tursita cu desaroya e virus aki na Aruba lo mester bandona su hotel y no lo por bolbe su pais tampoco ya cu niun aerolinea lo acepta pa transporta un persona cu tin e virus aki. Den casonan asina e persona aki lo mester un otro luga pa acomoda su mes. Gobierno lo yuda e personanan aki busca un luga pa ta comodo pero no por cubri e gastonan aki ya cu e suma por bira basta halto mirando cu tin patient ta keda 4
siman positivo di COVID-19. Esakinan ta e motibonan pakico un seguro medico normal no ta suficiente.


Tin hopi hende ta haña e condicionnan aki hopi estricto y caro pero talves no ta balora nan mesun bida. Gobierno di Aruba si ta duna balor na bida di cada ciudadano y ta pidi pa respeta e decisionnan aki tuma den bienestar di nos hendenan. Gobierno di Aruba ta pidi cada ciudadano pa uni hunto y ban atene nos mes na e reglanan di distanciamento social, higiene y si bo ta sinti un sintoma yama bo dokter pa haci e test.


“Ta importante pa nos tin un agenda nos dilanti y esey ta Aruba. Ningun agenda politico ni scondi, ban laga esey pa otro aña. Aruba mester trankilidad pa por atrae nos turistanan bek apesar di e exigencianan halto y costoso, trankilidad pa cuminsa lanta e pais aki bek y pa tin cupo di empleo bek, pa e 37 mil personanan cu ta na riesgo di perde nan trabou pa nan tin un pan riba mesa.
Ban uni pa pone Aruba na prome luga. Aruba a yega di pasa den hopi situacionnan dificil y a surpasa cada un di nan. Mi ta sigur cu poniendo Aruba na prome luga, nos lo surpasa e crisis aki y sali un biaha mas exitoso”, Premier Wever-Croes a termina bisando.