San Nicolas Visitor Information Center a cuminsa ricibi turistanan

Desde cu frontera a cuminsa habri dia 1 di juli pa Canada, Caribe y Europa por a tuma nota cu poco poco nos Turismo ta reactiva. Nos ta contento di mira cu e turistanan aunke den tempo nan dificil di COVID-19 ta yega nos isla y ta adapta nan mes na e “normal nobo”. Manera minister a anuncia na comienso di e aña aki, e oficina ta fungi como e curason y centro di informacion pa turista na San Nicolas unda nos bishitantenan por disfruta di “walking tours” y tambe por siña mas di nos dushi isla riba e television nan interactivo. Hopi di esnan cu a bishita e siman aki tabata tin inmenso interes den e mural artwork nan cu tin rond den San Nicolas. Naturalmente e San Nicolas Visitor Information Center a adapta nan servicio pa motibo di higiena y ta mantene nan mes na tur e protocolnan di DVG. Recien Rodgers Beach tambe por a conta cu e pier nobo cu lo bai atrea mas Turista. Minister Dangui Oduber su maneho di Turismo ta pa contribui positivamente na turismo pariba di brug y poco poco aunke den tempo dificil lo continua di cumpli cu San Nicolas. Turismo ta nos forsa y e driver principal di nos economia.