Tur indicador importante ta confirma cu AVP no tin e capacidad pa dirigi nos economia y finansa publico

Annual Statistical Digest 2016:
Tur indicador importante ta confirma cu AVP no tin e capacidad pa dirigi nos economia y finansa publico

Durante e ultimo lunanan aki prome cu eleccion 2017, exponentenan di partido AVP ta haciendo intentenonan sobrehumano pa pinta un panorama sumamente positivo pa loke ta e desaroyo economico y financiero di nos pais. Sin duda cu pais Aruba lo por a experencia un desaroyo beneficioso y alentador si na principio di Gabinete Mike Eman nan por a administra den forma huicioso tur e fondonan cu a ser laga atras pa e gobierno di MEP na 2009 y cual suma a yega na mas di 970 miyon florin y si e gobierno derochado aki no a endeuda nos pais tambe cu debenan biyonario y cual megadebe no a conduci na creacion di cuponan di trabao duradero pa nos comunidad. Tur esaki ta ser refleha tambe den e cifranan recien publica den e Annual Statistical Digest 2016 di Banco Central. For di e publicacion aki partido MEP a compila un tabel caminda por mira e indicadornan di mas importante pa loke tabata aña 2016 y compara esaki cu 2015.
 
Un y tur por mira cu nos GDP y GDP per capita, tanto nominal como real, a cay na 2016. Pues ta muestra palpabel cu no tabata tin crecemento den nos economia den e ultimo añanan. Nos turistanan stay-over na 2016 tambe a cay y asina mes cu e gobierno aki di AVP/POR ta haya casi 100 miyon florin pa promocion di nos turismo, compara cu tempo di Gabinete Oduber caminda solamente 25 pa 30 miyon florin tabata ser hinca na promocion di turismo pero treciendo alabez turistanan di calidad pa Aruba. Di otro banda indicadornan importante manera cifra di inflacion, desempleo y debenan di gobierno a aumenta, lagando pueblo sinti un sabor amargo pa loke ta henter e desaroyo economico y financiero di nos pais. Tur e cifranan menciona den e tabel no ta gaña y ta contradeci henter e manipulacion y engaño constante di partido AVP.
 
Y pa loke ta aña 2017, no tin ningun perspectiva cu e situacion lo mehora na man di e gobierno manipulado aki, ya cu gobierno no ta haciendo ningun intento pa forsa cumplimento di e contract cu nan a firma cu CITGO y habri e blender pa caba, pero tur dia ta papia si cu esaki lo bay ta e salbabida di henter e economia Arubano. 15 luna a pasa caba desde cu a firma e contract na Venezuela y te ainda ni padilanti ni patras!
 

---