“Un periodista cu a entrega su Sharenan di Bon Dia Aruba a cambio di su libertad”

Parlamentario Endy Croes a splica cu no ta su custumber pa ataca periodista. Pero ora tin periodistanan cu kier pretende cu nan no a kibra un copi ta na su lugar pa recordanan nan propio historia y realidad di bida pa pueblo sa ta ken nan ta. Un periodista normalmente tin un bunita trabao di mantene un pueblo informa den balance cu realidad. Momento cu bo perde e realidad di bista mester tin un hende cu por pone bo na bo lugar.


Toko lastrando hende drechi
Parlamentario Endy Croes a tuma nota cu Toko Winklaar den su papelucho cu ya no tin acogida kier lastra hende drechi. No solamente lastra hende pero saca noticianan for di nan contexto. Te hasta ta troce articulo cu un politico manda y ta cambia su contexto pa sirbi proposito di AVP. Ta un secreto publico cu Toko Winklaar ta un AVP-ista di curason. Nos ta respeta esey pasobra esey ta forma parti di nos estado di derecho y un derecho democratico bibo. Pero momento bo crusa e liña poco di mas nos mester recorda pueblo ta ki sorto di hende bo ta. Pa Toko Winklaar nada di e gobierno aki no ta bon. Tur cos ta malo! Unda Toko tabata ta e ultimo 8 añanan? Toko nunca kier papia di e desaster cu AVP su amonan a causa? Que hubo di e Mega Debe? Toko a letterlijk “chupa” tras di Mike Eman pa asina por a bira Directeur na Tele Aruba. Cifranan ta mustra cu Toko a haci un desaster na Tele Aruba y ni Mike ni AVP kier a renoba su contracto mas. Parlamentario Croes a splica di lo bin bek cu tur e cifranan di Tele Aruba bao di maneho di Toko y lo laga pueblo mes saca su conclusion.


Prohibi pa lubida
Toko Winklaar kier ple mas Santo cu Papa di Roma. Pa esnan cu por corda Toko Winklaar tabata un anti-Betico y tempo aya cu Toko tabata traha pa corant Extra a laga pinta Betico cu scremento humano riba su cabez. “Prohibi pa lubida”. Esnan cu ta corda por compronde kico mi kier splica. Esaki a tuma lugar den pleno lucha pa nos Status Aparte. Toko Winklaar awe kier ple Santo manera Papa di Roma? Wel Toko Winklaar a horta Bondia Aruba na un manera feroz. E tempo aya a entrega keho di ladronicia contra Toko Winklaar y Toko a wordo deteni y a wordo cera pa ladron. Kisas no ta tur hende ta corda pero nos t’ey pa recorda pueblo di esaki. Ta bon pa rato rato nos recorda pueblo Toko su historia berdadero. Toko a wordo conseha pa su defensornan e tempo aya siendo den prison pa e gaña bira malo. Asina Toko a sali di prison y a wordo manda Hospital unda 24/7 tabata tin guardianan di preso para na e camber di hospital cuidando e supuesto ladron aki. Kico a tuma lugar mas despues? Doñonan di Bon Dia Aruba a yega na un areglo cu Toko Winklaar pa Toko traspasa su “Sharenan” di Bon Dia Aruba pa e doñonan a cambio cu nan lo retira e keho di ladronicia contra Toko pa Toko por recobra su libertad. Parlamentario Croes ta reta Toko pa desmenti esaki!. Pues esaki ta netamente e berdad di Toko, e ladron di Bon Dia Aruba.


Alaba tur locual ta malo
Segun Parlamentario Croes e no lo ta den politica pa semper y no tin problema pa saca berdad pa pueblo compronde e manipulacion y hendenan cu Mike Eman tabata carga den teblachi basta nan alab’e. Toko ta un di nan. Alaba tur locual ta malo sin importa cu Aruba ta sink! Segun Croes, tristo pa mira unda Aruba ta para awe hustamente pa mentenan putri manera Toko cu kier bira miyonario riba custia di pueblo sin importa nan e prijs cu esaki lo
costa Aruba. Pueblo hendenan manera Mike Eman, AVP y Toko Winklaar nunca pero nunca mas. Saca bo conclusion y mi lo keda en espera di Toko su reaccion.