VISA TA FORMA PARTI INTEGRAL DI UN SERIE DI MEDIDA PA CONTROLA E FLUHO MIGRATORIO REGULAR DI VENEZUELA

Riba e situacion di Venezuela, Prome Minister Evelyn Wever-Croes a indica den conferencia di prensa di Gobierno di Aruba dialuna mainta, cu no tin mucho cambio riba esaki pero e ta sigui ta un situacion hopi delicado. Comienso di siman a habri cu un reunion entre Prome Minister y e Crisis Team apunta pa Gobierno di Aruba pa conseha Prome Minister riba e tema aki pa discuti si tin desaroyonan nobo riba e situacion di Venezuela. Prome Minister a informa cu frontera ta keda cera te cu December segun e fecha stipula na comienso di luna pasa mientras cu Gobierno ta evalua e pasonan cu lo mester wordo tuma.


Siman pasa diabierna, Aruba y tur otro país den Reino a anuncia e introduccion di un visa como rekisito pa esnan di nacionalidad Venezolano cu kier biaha pa paisnan di Reino. Despues di varios luna di consulta intensivo entre e Minister di Relacionnan Exterior di Reino y e Minister-Presidentnan di Aruba y Corsou, a yega na e decision cu lo introduci un visa temporal pa tur bishitante portador di un paspoort Venezolano. E medida aki ta uno cu ta competencia di e Ministro di Relacionnan Exterior di Reino, ya cu maneho di visa ta un asunto cu ta regarda Reino Hulandes.


A yega na e decision aki despues di a constata cu e situacion na Venezuela a empeora, ademas cu e incidencia di migracion iregular for di e pais aki den direccion di paisnan bisiña a conoce un aumento alarmante. Tur esaki a conduci cu ya caba varios pais, e.o. Peru, Panama, Ecuador, Guyana, Trinidad & Tobago y Chile a dicidi di introduci un visa pa tur portador di un paspoort Venezolano.


Introduccion di e visa aki ta forma parti integral di un serie di medidanan cu ta wordo tuma pa controla e fluho migratorio regular di Venezuela den direccion di nos islanan. E tempo cu e medida aki lo keda na vigor ta depende di e desaroyonan na Venezuela. Na momento cu e condicionnan aki mustra cambionan faborabel, e medida lo por wordo elimina. Introduccion di e visa lo tuma 6 luna. E proceso di su introduccion ta exihi tempo, pa motibo cu lo mester aloca e medio y personal adicional necesario na e Embahada di Reino na Caracas pa por procesa e peticionnan pa visa.


Otro medidanan complementario pa contra-aresta e fluho migratorio ta consisti di e.o. un ESTA-A, pa autorisacion di e viahe, e Advanced Passenger Information system pa controla e
informacion adelanta di tur biahero y e introduccion di Pre-boarding checks, cual ta un procedura pa controla tur biahero previo na borda e avion.


Ta importante menciona cu e medida di visa lo conoce algun excepcion. Pasaheronan cu ta den posesion di un visa valido of un permiso di estadia pa e paisnan Merca, Canada, Inglatera (Reino Uni) y Irlandia, no tin mester di un visa pa biaha pa Aruba, Corsou of Boneiro.


E situacion di Sint Maarten ta un poco diferente, debi na e particularidad cu e isla ta uno dividi den un parti Frances y e otro Hulandes. Pa e introduccion di e visa ta efectivo, lo negocia cu e autoridadnan Frances pa por efectua e control necesario di e medida di visa. Na final Sint Maarten tambe lo forma parti di e programa di visa.


“E peticion pa e visa en cuestion mester wordo haci na Embahada di Reino na Venezuela. Aruba mes no tin ningun papel pa hunga den esaki pa motibo cu e maneho di visa ta un asunto cu ta regarda Reino Hulandes y ta cay bou di Ministro di Relacionnan Exterior di Reino. Esakinan ta pasonan cu nos ta tuma pa si acaso nos yega na na apertura di frontera, nos tin un miho control di bishitantenan. Gobierno ta keda monitoria e situación aki tur dia”, Prome Minister Evelyn Wever-Croes a enfatisa.