Un bunita iniciativa na cuminsamento di aña di Innovacion y Enseñansa
Diasabra ultimo, SKOA a tene su prome expo, SKOA Expo 2020 cu tawata un bunita iniciativa di SKOA na cuminsamento di aña di Innovacion y Enseñansa. 46 scol di kleuter, basis y voortgezet onderwijs a expone nan material den bunita decoracion y tur tawata cla pa brinda informacion na tur esnan cu a bishita e Expo. E docentenan ta sumamente entusiasma y ta demostra un pasion y amor grandi pa enseñansa di nos muchanan.

Prome Minister Evelyn Wever-Croes a bishita e Expo y a keda hopi impresiona cu e avansenan cu e scolnan na Aruba tin especialmente riba e tereno di innovacion. A tuma Prome Minister 3 ora y mey total pa bishita tur e tentnan di e 46 scolnan di SKOA na unda cu Prome Minister a trata pa combersa cu nan tur un tiki y scucha nan idea y proyectonan den enseñansa.

“Mi a keda hopi impresiona pa tur e trabou cu ta wordo haci den enseñansa, cu e poco medionan cu ta wordo poni disponible y mi ta mas comprometi pa den e aña aki di Innovacion y Enseñansa logra e innovacionnan den enseñansa cu e scolnan tanto ta pidi p’e. Mi ta felicita SKOA cu e bunita iniciativa aki. El a trece scolnan hunto den un bon ambiente. E pasion di e docentenan y nan dedicacion ta hopi obvio. Den nomber di Gobierno di Aruba mi ta gradici SKOA y tur docente pa nan amor pa enseñansa y pa e muchanan. Cu e expo aki, SKOA a demostra cuanto diferente opcion tin pa enseñansa di nos muchanan”, Prome Minister a expresa.
​
Retonan ta grandi pero logronan tambe ta hopi grandi. Pabien SKOA cu e iniciativa aki. Danki na tur maestro di Aruba pa e amor y dedicacion na nos enseñansa y nos muchanan. Pabien na tur scolnan cu a participa na SKOA Expo 2020, un tremendo evento den cual tur 46 scol di SKOA a reuni.

Diabierna ultimo un delegacion di Aruba consistiendo di Minister di Turismo, Salubridad Publico y Deporte, Sr. Dangui Oduber hunto cu CEO y Director di Aruba Tourism Authority (A.T.A.) y Aruba Ports Authority (APA), Sra. Ronella Tjin Asjoe-Croes y Sr. Marc Figaroa, como tambe Consehera di Minister di Turismo, Srta. Sharlyze Romano, CFO di APA, Sr. Humphrey Tromp y Cruise Manager di A.T.A., Sr. Mario Arends, a sostene diferente reunion dirigi riba turismo crucero. Entre otro a reuni cu Carnival Cruise Lines na Miami, unda a toca diferente topico di importancia pa e industria di crucero di Aruba.

Durante e reunion aki, Carnival Cruise Lines a duna Aruba e grato noticia cu Aruba a conquista e promer puesto como e mihor destinacion y puerto riba nivel mundial. Esaki a surgi a base di puntuacionnan cu pasaheronan di e linea di crucero ta duna na diferente aspecto di nan vacacion y itinerario di e biahe crucero manera calidad di servicio, amabilidad, compras, restaurantnan, infrastructura, etc.

Aruba ta consistentemente un destinacion fuerte, cu semper ta score bon, y cu a tuma e puesto di promer lugar na 2019. Aruba su averahe den e ultimo aña ta riba 9 punto (10 ta e maximo), cual ta un puntacion sumamente positivo y cu a duna Aruba e empuhe necesario pa logra obtene e posicion di mas halto den e region di Caribe y di mundo. Ehecutivonan di e linea di crucero a expresa hopi elogio pa Aruba. Aruba ta un destinacion y puerto ehemplar pa Carnival Cruise Lines. E linea di crucero a accentua e importancia di con Aruba ta desplega trabou di equipo cu un colaboracion estrecho entre Aruba Tourism Authority y Aruba Ports Authority implementando e maneho estableci pa Minister di Turismo y Gobierno di Aruba.

Carnival Cruise Lines ta e linea di crucero di mas grandi na mundo y a trece casi 200 mil turista crucero na aña 2019.
​
Minister Dangui Oduber a expresa su satisfaccion grandi y a enfatisa e importancia di e partnership entre Aruba y Carnival Cruise Lines y a compromete pa sigui traha den e mesun forma pa mantene y amplia e bentaha competitivo cu actualmente Aruba ta gosa di dje.
Minister Dangui Oduber ta felicita A.T.A., APA y tur esnan cu ta traha den e industria aki ya cu logronan manera esaki ta bin a base di trabou hopi duro pa asina por brinda e mihor experiencia posibel na nos bishitantenan. E Minister ta indica cu esaki ta sirbi como estimulo pa sigui bai dilanti y mester sirbi como un momento pa wanta nos skerpi, a yega number 1 mester sigui haci esfuerso pa mantene esaki.

Manera ta conoci, Hulanda a pone un suma di placa disponibel pa Aruba por atende cu e impacto di e crisis di Venezuela. Di e fondonan aki un di e fundacionnan cu ta bay wordo yuda finacieramente ta Fundacion Hende Muher den Dificultad (FHMD). Durante su bishita cortico na Aruba, Minister Knops hunto cu Minister President a bishita e fundacion aki pa haya informacion di e proyecto cu ta uno sumamente interesante.


Na e momento aki FHMD ta duna asistencia na hende muhe y hende homber den dificultad of den relacion abusive. Tambe nan tin un shelter disponibel pa asina por protehe mamanan cu nan yiunan cu ta bibando violencia domestico. Actualmente e shelter aki ta conta cu un total di 5 unit, pero cu e fondo adicional cu e fundacion a haña por extende cu mas o menos 6 unit mas. Tin diferente otro instancia cu tambe a realisa cu e casonan aki ta un problema grandi na Aruba y a duna promesa pa tambe contribui monetariamente na e fundacion aki haciendo posibel cu e shelter aki por haña te hasta 10 unit mas.


E cantidad di personan buscando sosten na e fundacion aki ta creciendo especialmente den e ultimo temporadanan aki cu e crisis di Venezuela, ya cu tin hopi hende muhe Venezolano ta busca asistencia cerca FHMD. E fundacion ta buscando e manera pa atende cu esaki miho posibel.


Durante e reunion e Directora di FHMD, sra Suzy Kock y su coordinadora sra. Magaly Maduro, a duna un splicacion amplio y pasiona di tur loke e fundacion ta haciendo na e momentonan aki y con e fondonan adkeri for di Hulanda lo ser uza p’e fundacion.


“Lamentablemente abuso domestico y violencia contra hende muhe ta aumentando na Aruba y p’esey a considera di suma importancia pa duna e sosten financiero na e fundacion aki cu ta haciendo un bon trabou den yuda e victimanan cu den hopi caso ta hende muhenan y siña nan con pa para bek riba nan pia”, Prome Minister Evelyn Wever-Croes a expresa.


Minister Knops tawata sumamente impreciona cu e reunion na FHMD y satisfecho cu tur e informacion cu e la ricibi.

Minister Maduro ta informa cu desde 1 di januari 2020, Departamento di Aduana a introduci un sistema nobo di registracion ‘Registered Exporter System’ (REX) pa e comerciantenan cu ta exporta producto di origen Aruba pa Europa. Cu introduccion di REX, e Certificado di Origen ‘EUR1 certificate’ ta bira obsoleto.


Proceso
Exportadornan cu ta desea exporta productonan pa Europa y kier haci uso di e tarifanan preferencial mester haci un peticion na Departamento di Aduana pa wordo registra den e sistema REX. Tambe por haci un pre-registracion online door di yena e formulario riba https://customs.ec.europa.eu/rex-pa-ui/ y firma, print, scan y email e documento pa info@douane.aw pa asina por inicia e proceso, pero mester entrega e documento original na Departamento di Aduana.


Beneficio
E sistema nobo REX ta acelera e procedura na Aduana. Unabes cu e exportador su registracion wordo aproba e por keda usa e mesun number di REX. Cu esaki e por traha su mesun Prueba di Origen (Attest van Oorsprong), pa cada bes cu e mester di exporta producto. E Prueba di Origen ta simpel y facil pa traha .


Reglanan
E mesun reglanan pa determina origen di e producto ta keda vigente. E exportador ta responsabel pa emiti e documentacionnan corecto pa verifica e origen di e productonan. Tambe e mester cumpli cu e procedura di Aduana y ta keda responsabel pa e transporte di e productonan pa Europa.
Por haya mas informacion riba www.douane.aw of por yama sra. Carondina Leijdekkers of sra. Eliane Riley na 523 8888.
Minister Maduro ta gradici e funcionarionan dj Departamento di Aduana cu a traha duro riba e proyecto di REX pa asina por a introduci esaki na Aruba.

Durante su bishita cortico na Aruba na cuminsamento di siman, riba peticion di Minister Knops di Asuntonan Interior, Prome Minister hunto cu e delagacion Hulandes a haci un bishita na e instituto medico IMSAN na San Nicolas. Motibo di esaki ta teniendo cuenta cu siendo Boneiro parti di Hulanda, busca e posibilidad di cooperacion pa por traha cu Aruba riba e tereno di cuido medico. IMSAN na e momentonan aki tin un desaroyo ambicioso andando na unda a inverti den ekiponan hopi moderno y ofreciendo un servicio di calidad.


E delegacion a wordo ricibi pa Director Dr Joel Rajnherc cu a duna nan un recorido di e edificio. E facilidadnan cu IMSAN ta ofrece ta uno di admira y a laga Minister Knops y Minister President hopi impresiona specialmente e servicio y personal cu ta asina atento y cla pa brinda e miho servicio na comunidad.


E inversionnan cu a wordo haci den IMSAN ta inversionnan miyonario pero cu awe Aruba tin su departamento di radiotherapie cu ta unico den nos region na unda por duna bestralingen na e pashentnan di cancer aki na Aruba mes. Esaki sigur ta un adelanto enorme ya cu personanan cu tin cancer no mester wordo aleha di nan famia pa bay tuma bestraling den exterior na unda cu e estadia ta uno semper hopi largo.


E departamento di radioterapia ta uno hopi beneficioso pa pais Aruba pasobra tanto e patient y e familiar por sigui cu nan trabou aki na Aruba durante e tratamento aki y alabes mantene e union familiar mientras e pashent ta pasa den e proceso doloroso aki.


Minister Knops a keda hopi impresiona y a menciona cu awor e lo hiba e informacion Hulanda y traha mas riba e cooperacion entre Aruba y Boneiro. Cu esaki tambe nos a logra nos meta di turismo medicinal paso na momento cu tin personanan cu ta bin Aruba pa ricibi tratamento medico e ta yuda cu e desaroyo di Aruba su economia.

E mundo di beyesa hopi biaha den nos comunidad no ta haya sosten y atencion suficiente pa loke cada reprentante di beyesa di nos pais ta logra den nomber di pais Aruba. Sinembargo, cada paso cu e representantenan di beyesa dal den e mundo di beyesa tanto local como internacional, no solamente nan ta creando oportunidadnan pa inspira otro hobennan y pa wordo sigui como rolemodel sino tambe nan ta eleva nos bandera den un otro perspectiva cu no ta politico, artistico of comercial. Ora un representante bay den exterior ta nomber di su pais e ta halsa den e caso aki Aruba su nomber ta wordo renombra den paisnan grandi y esaki ta un promocion impagabel. Esaki sigur ta algo cu nos mester aprecia y admira semper.


Diaranson Prome Minister Evelyn Wever-Croes a reconoce y gradici tur nos reinanan di beyesa cu a representa Aruba den certamennan Internacional den aña 2019. Esaki sigur tawata un sorpresa pa e reinanan di beyesa y nan a aprecia e gesto aki na unda cu Gobierno di Aruba ta reconoce nan participacion y logronan, na unda bou nan mesun esfuerso y cu sosten di nan famia ta haci esaki posibel. E deseo sigur cu nan a expresa ta pa Gobierno por yuda prepara esnan cu ta representa Aruba den e parti finaciero.


Esnan presente pa ricibi e Reconocimento di Beyesa pa nan participacion internacional den certamen di beyesa den aña 2019 ta: Danna Garcia, Miss Aruba; Ghislaine Mejia, Miss World Aruba; Daniela Piazza, Miss International; Hanna Arends, Reinado Internacional del Café; Zury Ruiz, Miss Teen Supramational; Ysaura Wong Giel, Mrs World Aruba; Miriam Contreras, Sra Turismo Mundial; Anaidy Binda, Miss Turismo Mundial AUA y Odalis Rivero, Miss Teen Turismo Mundial AUA.

Quality Seal: Un programa di certificacion nobo pa negoshinan den e sector di Horeca


Diaranson anochi a wordo lansa un programa di certificacion nobo pa negoshinan cu ta brinda servicio y productonan di calidad. Minister Dangui Oduber su maneho y vision ta basa usando strategianan pa target y focus riba e bishitante afluente.

​ Ministerio di Turismo ya pa varios tempo tin como obhetivo pa focus riba bishitantenan cu un entranda anual di 150 mil dollar bai ariba. Shifting from volume to value ta sigura y salbaguardia tambe nos recursonan natural y alabes dunando nos mesun hendenan un miho calidad di bida.

Pa por mantene e bishitantenan di calidad consistente lo mester keda eleva producto Aruba en general. Minister Dangui Oduber ta orguyoso di presenta un otro logro pa sigui engrandese e producto turistico mas ainda. Quality Seal lo tin como obhetivo pa reconoce negoshinan local cu den un manera consistente ta brindando servicionan of productonan unico y di calidad halto.

E tool aki lo encurasha negoshinan, vooral esnan den e sector di horeca pa usa “best business practices”. Den e manera aki negoshinan di calidad lo haya nan reconocimento mereci y asina tambe lo por wordo identifica pa e turista como un “high service, high quality” business. E meta ta cu pronto local y turista lo por cana rond y mira si un negoshi of instancia tin su quality seal bisando cu nan a pasa tur e check items nan riba calidad di producto y servicio brinda na nos turismo. Minister Oduber, ta enthusiasma pa wak e programa “kick-off” y ta spera solamente reaction positivo den e industria.


Turismo ta nos forsa y driver principal.

Turismo na Aruba ta pasando den su miho momentonan den historia di nos pais. Aña 2018 por a wordo considera un di e miho añanan caminda tur indicador a demostra un crecemento.
Aña 2019 no tawata diferente y ta aun un miho aña cu aña 2018. E indicadornan hotelero a demostra un otro aña record pa loke ta trata performance di hotelnan. Nos ta papiando di crecemento riba crecemento cual ta hopi remarcabel.

Segun Aruba Hotel and Tourism Association, aña 2019 e ‘Average Daily Rate’ (ADR) a aumenta cu 6.2% compara cu e mesun temporada na 2018. Esaki den cifra ta US$ 259.55 na 2018 compara cu US$ 275.68 pa 2019. E entrada pa camber disponibel, e asina yama RevPAR a aumenta cu 7.5% di US$ 217.64 na 2018 pa US$ 233.89 den 2019. Un crecemento hopi grandi mes den Revpar. E RevPar ta un indicador hopi importante pasobra esaki ta midi e calidad di turista cu ta bin Aruba. Na momento cu ADR y RevPar ta halto manera ta e caso ta un indicacion cu turistanan di calidad ta yegando Aruba y esaki ta conforme e maneho y vision di minister Dangui Oduber.
E anochinan ocupa (ORN) pa camber a aumenta cu 2.3% pa 2019. E ocupacion den nos hotelnan tawata 84.8% cual ta esun mas halto den Caribe.

E cifranan di AHATA ta basa riba 17 propiedadnan cual ta mayoria di e hotelnan cu excepcion di Hilton Aruba Caribbean Resort & Casino.
​
Minister Oduber ta sumamente satisfecho cu e resultadonan aki y kier a manda un palabra di gratitud na ATA, AAA, APA, AHATA, tur otro stakeholder y sigur mas importante na tur empleado cu ta labora den e sector turistico. E ta un logro grandi na momento cu tin cifranan asina alentador cu ta demostra cu nos Turismo ta mas fuerte cu nunca. Pa 2 aña consecutivo bao maneho di minister Dangui Oduber añnan record ta wordo registra den turismo cual sigur ta un señal sumamente positivo. Gabinete Wever Croes ta treciendo e cambio cu a wordo priminti. Turismo ta keda e driver principal di nos economia.

Diamars mainta, Premier Wever-Croes a asisti na un Santo Sacrificio di Misa en conexion cu e celebracion di 105 aña di existencia di St. Dominicus College. Muchanan di e scol y docente y mayornan cu entusiasmo y alegria a ricibi e Premier di Aruba. Prome Minister na su momento tabata tin e oportunidad di duna un discurso chikito na unda el a expresa su gratitud na e ekipo di e scol aki cu a sa di educa hopi studiante cu awe a logra cosnan grandi pa Aruba. Despues di e Santo Sacrificio di Misa, Prome Minister hunto cu Minister Lampe a asisti na un recepcion den koffie camber di e scol.


No ta desconoci cu den e ultimo simannan aki enseñansa ta enfrentando retonan grandi mirando cu scol Cacique Macuarima a ser kima y otro scolnan ta bou menasa di tiramento. Aunke cu e situacionnan aki ta dificil di compronde, ta importante pa comunidad para keto un rato y realisa e margen di e situacionan aki. E tipo di actividadnan desastroso aki no ta algo comun pa Aruba y siguramente no ta loke ta wordo visualisa pa ta e futuro di enseñansa ya cu cualkier atentado contra un scol ta un atentado contra Aruba su eneñansa.


“Apesar di tur e contratiemponan aki, e celebracion di 105 aña di existencia di St Dominicus College ta di celebra ya cu ta algo sumamente bunita y grandi”, Prome Minister a enfatisa.


Prome Minister ta manda palabranan di felicitacion pa tur maestra y maestronan y tambe pa tur alumno cu nan mayornan di e scol aki y ta desea cu e celebracion aki inspira cada maestro/maestra pa sigui duna mas pa cu enseñansa di nos muchanan preparando cada un di nan pa un miho futuro.