Un evento, cu Prome Minister a expresa di tawata sumamente ameno y interesante durante e di 74 Reunion General di Nacionnan Uni (‘General Assembly’) na New York, tawata e evento organisa pa Reina Maxima na unda cu Reina Maxima a duna un raportahe hopi amplio di su trabounan como e “Special Advocate” di Nacionnan Uni.


Reina Maxima, 10 aña pasa a wordo apunta como “Special Advocate” di Nacionan Uni cu e mision pa logra inclusion financiero. Su meta ta pa mas y mas hende na mundo tin acceso na cuentanan bancario. Esaki ta duna e hende e caminda pa independencia. Reina Maxima a presenta un reportahe di su trabounan impresionante den varios parti di mundo. Melinda Gates tambe a conta di su expereincia cu Reina Maxima.


“Esaki tawata un presentacion hopi impresionante. E trabounan cu Reina Maxima ta desplega ta hopi importante y necesario pa e ser humano haya su luga central den nos mundo”, Prome Minister Evelyn Wever-Croes a duna di conoce.


Riba e potret ta mustra cu Prome Minister tabata sinta banda di su Mahestad Willem Alexander kende atentamente tawata atende e presentacion di Reina Maxima. “Un Rey hopi orguyoso di su casa”, Prome Minister a expresa.

Na comienso di e siman di Asamblea General na Nacionnan Uni na New York, Prome Minister Wever-Croes a reuni cu lídernan muhe y ehecutivonan di Wall Street y sector priva, unda cu el a presenta e vision di Aruba pa desaroya pilarnan nobo di economía, y particularmente un economia di conocemento. Den e seno aki a explora colaboracionnan nobo unda cu Aruba por ofrece un situación win-win pa inversionistanan cu ta sostene desaroyo sostenibel.


Tin hopi interes y oportunidad pa partner cu Aruba riba tereno di social innovation pa desaroya solucionnan pa retonan riba tereno di educacion, futuro di trabou, cambio di clima y derecho di hende muhe. E evento a wordo haci posibel Danki na Fiduciary Trust International.


“Esaki tawata un desayuno combina cu un reunion cu mi a organisa na unda cu mi a comparti e historia y visionnan di Aruba cu esnan presente y na unda mi a haya e oportunidad tambe pa scucha di nan nan tin interes den Aruba pa yuda crea desaroyonan specialmente den tecnologia pa asina crea mas transparencia y integridad. Cu e reunionnan aki, Aruba ta wordo promove mas ainda cu e speransa cu nos lo haya ayudonan pa crea mas desaroyo y posibilidad pa nos pueblo”, Prome Minister a duna di conoce.

Esaki ta un siman yen di reunion y encuentronan pa nos Prome Minister di Aruba Evelyn Wever-Croes. Durante e siman aki, Prome Minister ta na New York pa asisti varios reunion y evento di nivel halto na e di 74 Reunion General di Nacionnan Uni. Un delegacion di Reino Hulandes consistiendo di Su Mahestad Rey Willem Alexander y Reina Maxima, Premier di Hulanda, Rutte, Prome Minister Wever-Croes di Aruba, Prome Minister Rhuggenaath di Corsou y Prome Minister Marlin-Romeo di Sint Maarten. Minister Blok di Relacionnan Internacional, Minister Kaag di Comercio Internacional y Cooperacion pa Desaroyo, Minister Niewenhuizen di Infrastructura y Maneho di Awa, Minister Bruins di Salubridad y Sport, y di Aruba Minister Lampe di Educacion, Ciencia, y Desaroyo Sostenibel.


Diamars a tuma luga un reunion cu Secretario General di Nacionnan Uni señor António Guterres hunto cu Rey Willem Alexander y Reina Maxima, y e Prome Ministernan di Corsou, St. Maarten, Hulanda y Ministernan Hulandes Kaag y Blok. Durante e reunion Rey Willem Alexander y cada Premier a trece e puntonan dilanti corespondiente na cada pais.


“Ami a gradici Nacionnan Uni pa sostene nos como pais chikito pa nos ta fuerte pa para riba propio pia. Mi a invita Nacionnan Uni, pa e proyectonan cu nan mester ehecuta den paisnan grandi, nan test nan cerca nos prome y asina nan ta yuda nos. Epecialmente riba tereno di combati problemanan social, specialmente violencia contra mucha y hende muhe, integridad y bon gobernacion, innovacion y e-Government”, Prome Minister a duna di conoce.


Señor António Guterres a keda hopi inpresiona cu e informacionnan cu el a ricibi for di e delagacion Hulandes y a expresa cu esaki tawata un bon reunion cu sigur lo wordo teni den plannan di Nacionnan Uni.

Dialuna ultimo Minister Ruiz-Maduro a haci apertura di e di dos tayer di National Risk Assessment (NRA) cu a wordo organisa pa Banco Central di Aruba hunto cu Banco Mundial y cu a tuma luga na Aruba Marriott Resort. E tayer di NRA a wordo duna pa ehecutivonan di Banco Mundial pa ehecutivonan den sector publico y sector priva cu ta traha riba e tereno di combatimento di labamento di placa y financiamento di terorismo.


E prome tayer a tuma luga aña pasa y e expertonan di Banco Mundial a asisti e participantenan cu un metodo pa compila y procesa informacion necesario pa yega na un mapa di e riesgo y vulnerabilidad cu Aruba tin, pa wordo malusa pa criminalnan pa laba placa y combati terorismo.


E mandatario ta contento cu sector priva tambe ta participa activamente den e ‘National Risk Assessment’ ya cu ta hopi importante pa ricibi informacion practico di e sector priva y nan participacion hunto cu sector publico ta yuda crea mas consientisacion tocante di e tema aki.


E 'National Risk Assessment' ta sumamente importante pa nos Pais ya cu Aruba ta wordo evalua pa Caribbean Financial Action Task Force (CFAFT) na 2020 y e informacion compila ta yuda na proteha nos Pais contra e menasa di labamento di placa y financiamento di terorismo.


E mandatario ta gradici e ehecutivonan di Banco Mundial pa nan asistencia y e participantenan pa nan colaboracion pa bini cu un rapport di NRA y un plan di accion cu ta na beneficio di nos Pais Aruba.

Recientemente Minister Ruiz-Maduro a presencia un bunita show dedica na 30 aña di moda di Ronchi de Cuba. E mandatario a disfruta di henter e show y di e testimonionan di e modelonan cu a expresa nan gratitud pa tur locual nan a siña y a experiencia cu e oportunidad cu Ronchi a brinda nan den e mundo creativo di moda na Aruba.
​
Minister di Cultura ta felicita Ronchi de Cuba y henter su elenco pa e bunita show dedica na 30 aña di moda. Alabes e mandatario ta gradici Ronchi pa semper ta kere den Aruba, den nos hendenan y especialmente nos hobennan.

No ta un secreto publico den ki situacion gabinete Wever Croes e hereda nos pais. No ta solamente un crisis financiero, un pais bancarota nos a hereda, tambe nos a hereda un crisis social nunca antes bisto. Colega minister di asuntonan social no a duda ningun momento y a activa tur su esfuerzo y energia pa cuminsa e proceso pa introduci un social crisis plan cu tey pa atende tur e problemanan social cu pais Aruba tin. Ta hopi importante pa remarca cu e social crisis plan aki a wordo aproba unanimamente pa 21 miembro di parlamento di Aruba. E hecho aki ta confirma cu tur hende riba e pais aki a mira e importancia di e plan aki.


Cu awe e plan aki ta wordo cuestiona pa CAFT y gobierno Hulandes ta un lastima.
Semper ta bon pa informa comunidad kiko tur ta wordo haci cu e placa di e plan social aki. Pa nos maneho di salud publico e plan aki ta di vital importancia. Na e momentonan aki tin hopi hoben cu tin sea problema di comportacion, problema di adiccion of problema mental. Cu e fondonan disponibel a atende cu e problemanan aki cu ta afecta comunidad enormemente. A percura pa bin un investigacion riba e uzo y consumo di droga na Aruba. Desde aña 1987 un investigacion asina no a wordo haci mas. Ta imporrante pa tin datos pa determina un maneho.


A percura pa pone placa disponibel pa e proyecto B-Smart di FADA. Un proyecto caminda FADA ta pasa tur scol pa duna informacion riba e consequencianan di adiccion. Kiko ta pasa cu bo mente y salud na momento bo tin un adiccion. Pa hopi anja largo a papia di e proyecto aki pero nunca tawata tin fondo pa nan.
Un otro bunita proyecto ta e Fact-Team pa mucha y hoben.
Hunto den un team a logra yega na e concretisacion aki di e proyecto aki caminda cu colega Minister Glenbert Croes a yuda tambe grandemente. Esaki a wordo sosteni grandemente door di e Social Crisis Plan. T’asina cu for di 20 di september, 2019 en adelante 24 ora pa dia por yama e central “meldpunt nummer” pa haci melding si tin un mucha of hoben cu problema di comportacion. Esaki tambe ta conta pa e hoben of mucha cu tin problema cu adiccion of problemanan mental. Pues sigur un proyecto cu Aruba lo bay beneficia grandemente di dje pasobra manera ta conoci e problemanan social riba tur nivel y clase ta grandi y aunke hopi di nan ta keda scondi pasobra famianan tin berguensa di sali afo cu esakinan. Awor e proyecto aki lo yuda pa evita situacionnan cu lo sali for di man y asina perhudica cualkier mucha, hoben y hasta su famia.


Sigur un pabien na Minister Dangui Oduber y Minister Glenbert Croes pero tambe pa henter e gabinete Evelyn Wever-Croes cu inicio y apertura oficial di e proyecto importante aki pa Aruba.
Nos ta spera cu CAFT y gobierno Hulandes mira e importancia di e continuidad di e social crisis plan aki pasobra nos NO por imagina cu nan lo desea di para esaki y para responsabel pa loke sosode caba na Aruba pa motibo di negligencia di atende cu problemanan social di un pais!

“Tin algun reunion planea pa asina enfoca riba tur e retonan cu cada pais ta enfrenta y pa haya sosten pa yuda nos Gobiernonan”.






E biaha aki, ta e di 74 Reunion General di Nacionnan Uni ta e luga di encuentro pa e Prome Minsiternan, di Aruba, Corsou y Sint Maarten. Prome Minister Evelyn Wever-Croes di Aruba, Prome Minister Eugene Rhuggenaath di Corsou y Prome Minister Leona Marlin-Romeo di Sint Maarten ta formando parti di e delegacion di Reino Hulandes pa diferente reunion y evento e siman aki na e sede di Nacionnan Uni na New York.


E tres Prome Minister, probechando di e oportunidad cu nan ta hunto na New York, tin algun reunion planea pa asina enfoca riba tur e retonan cu cada pais ta enfrenta y pa haya sosten pa yuda nos Gobiernonan. Desde cu a tuma over gobernacion november aña pasa, Gabinete Wever-Croes a cuminsa traha pa mehora y estrecha e lasonan entre Aruba, Corsou y Sint Maarten. Tur tres pais ta enfrentando retonan grandi. Solamente si nos para hunto den retonan similar, nos por ta hopi mas fuerte y resiliente pa enfrenta nan. Pa nos ta miho prepara y pa despues nos por yuda otro.


Nos ta islanan ruman cu famia y conocinan bibando na e diferente islanan. Historicamente tambe nos tin un laso hopi importante. Y si di berdad nos mester busca aliansa un caminda, nos mester cuminsa busca na e islanan cerca di nos. Pa cua motibo tambe cu mester keda mantene e lasonan fuerte. Mi ta convenci cu Aruba, Corsou y Sint Maartin hunto riba un solo linea, nos lo logra hopi mas beneficio pa bienestar y progreso pa nos pueblonan”, Prome Minister Evelyn Wever-Croes a expresa.


Pa e motibo aki tambe, e tres mandatarionan di Aruba, Corsou y Sint Maarten ta uza tur oportunidad cu nan haya y ta pone tempo disponible pa reuni y discuti topiconan en comun.

Na na e sede di Nacionnan Uni na New York e siman aki ta tumando luga e di 74 Reunion General di Nacionnan Uni (‘General Assembly’). E Reunion General di Nacionnan Uni ta un reunion anual cu ta trece 193 estado miembro pa discuti y traha riba varios reto internacional entre otro desaroyo, cambio di clima, paz y siguridad y mucho mas.


Aruba ta formando parti di e delegacion di Reino Hulandes. E delegacion aki ta consisti di Premier di Hulanda, Rutte, Prome Minister Wever-Croes di Aruba, Prome Minister Rhuggenaath di Corsou y Prome Minister Marlin-Romeo di Sint Maarten. Minister Blok di Relacionnan Internacional, Minister Kaag di Comercio Internacional y Cooperacion pa Desaroyo, Minister Niewenhuizen di Infrastructura y Maneho di Awa, Minister Bruins di Salubridad y Sport, y di Aruba Minister Lampe di Educacion, Ciencia, y Desaroyo Sostenibel tambe ta presente. Ademas e pareha real Rey Willem-Alexander y Reina Maxima tambe ta forma parti oficial di e delegacion di Reino Hulandes.


“Na e Asamblea General di Nacionnan Uni, Reino Hulandes ta wordo representa pa Rey Willem Alexander y tur 4 Prome Ministernan di Reino. Esaki ta duna nos e oportunidad tambe pa atende temanan manera relacion den Reino, na e nivel mas halto den Reino”, Prome Minister Evelyn Wever-Croes a duna di conoce.

E siman aki, Prome Minister Evelyn Wever-Croes ta atendiendo diferente reunion y evento di nivel halto na e di 74 Reunion General di Nacionnan Uni (‘General Assembly’) na New York.
E Reunion General di Nacionnan Uni ta un reunion anual cu ta trece 193 estado miembro pa discuti y traha riba varios reto internacional entre otro desaroyo, cambio di clima, paz y siguridad y mucho mas. E reunionnan aki ta tuma luga tur aña cu tur e miembronan na e sede di Nacionnan Uni na New York. Aruba ta formando parti di e delegacion di Reino Hulandes.


E meta di e biahe aki ta pa crea partnerships pa por yuda resolve retonan social economico y pa logra un desaroyo mas sostenibel di nos isla. E ambicion di Aruba pa fortalece relacionnan cu organisacionnan paden y pafo di Nacionnan Uni y sector priva lo yuda nos logra nos metanan mas lihe.


Un reunion hopi importante na comienso di siman, segun Prome Minister, tawata cu Executive Director di UN Women sra. Malambo. UN Women a aproba pa yuda nos traha un maneho riba e posicion y hende muhe na Aruba. Esaki ta e prome logro grandi di e siman aki.


“UN Women a comete su mes pa sostene Aruba pa bin cu un maneho integral pa cu e desaroyo di hende muhe/ igualdad di genero. UN Women su oficina regional lo organisa un mission di profesionalnan riba e tereno aki p’asina por yuda crea un ambiente y comunidad na unda lo por conoce mas igualdad den oportunidad, trato y responsabilidad entre hende homber y hende muhe. E enfoke grandi lo ta riba crea oportunidad pa ser femenino for di edadnan young caba”, Prome Minister Evelyn Wever-Croes a duna di conoce.


Esaki sigur ta un logro grandi pa nos pais y pa nos mucha y hendenan muhe en general na unda cu e hende muhe por haya mas oportunidad pa desaroya den igualdad den tur tereno. E meta ta pa no laga niun hende atras.

Durante un conferencia di prensa Minister Ruiz-Maduro a brinda informacion tocante di e topico di BBO, BAZV y BAVP riba recibo. E cambionan den Ley di BBO, BAZV y BAVP a drenta na vigor dia 1 di januari 2019. Gobierno di Aruba a duna e comerciantenan espacio di nuebe luna, esta te dia 1 di october pa por a haci e adaptacionnan di acuerdo cu e Ley. Na comienso di e luna aki, Gobierno a organisa reunionnan cu algun ‘stakeholders’. Durante e reunionnan aki e comerciantenan a trece nan preocupacionnan dilanti. Teniendo na cuenta e interes general di e pueblo consumidor y e comerciantenan a dicidi cu entrante 1 di october, tur comerciante mester ofrece un solo prijs pa su articulo/servicio y no mag cobra e cliente un otro suma na caha. Pero Gobierno ta permiti e comerciante pa menciona e porcentahe di e suma di BBO, BAZV y BAVP corecto - di acuerdo cu e Ley- riba e recibo.


Transparencia pa consumidor y comerciante
Na e manera aki e consumidor por tin e transparencia necesario, ya cu e prijs cu e producto tin riba reki ta e prijs cu e consumidor ta paga na caha. Gobierno a duna oido na e preocupacion di e comerciante y ta permiti e comerciante pa specifica BBO, BAZV y BAVP riba e recibo.


Gremionan ta informa
Minister Ruiz-Maduro a informa cu Gobierno a manda un carta pa e gremionan pa informa cu Gobierno a tene nan preocupacionnan na cuenta y cu Gobierno a yega na un decision balansa cu ta beneficia tanto e consumidor como e comerciante.


Otro pais tambe ta aplica e manera aki
E dignatario a subraya cu e manera aki no ta un manera desconoci, ya cu e ta wordo usa entre otro na Hulanda, Corsou y Colombia. E tipo di belasting por ta otro, pero e parti di transparencia di prijs ta mescos. Na e paisnan aki e prijs di e producto cu bo ta mira riba reki, ta e prijs cu bo ta paga na caha y na caha e impuestonan ta wordo specifica.


Danki na tur e comerciantenan cu a haci e cambionan
Tin algun supermercado, minimarket y hardware store grandi cu ya caba a haci e cambionan di acuerdo cu e Ley y a inclui e BBO, BAZV y BAVP den e prijs di nan productonan. E mandatario a gradici tur e comerciantenan cu ya a cumpli cu e cambionan di acuerdo cu e Ley di BBO, BAZV y BAVP. Di e manera aki Gobierno a yega na e transparencia necesario pa tanto e consumidor y e comerciante y a brinda un solucion pa e preocupacion di e comerciantenan.