Parlamentario Endy Croes ta haya hopi tristo e actitud di AVP durante tratamento di e Ley LAFT. Manera ta graba den historia, e tata di e ley LAFT ta Mike Eman y AVP. Desde cu a introduci e Ley aki cual porcierto tabata contra Constitucion, Mike Eman y Parlamentarionan di AVP e tempo aya a legalisa e ley aki contra tur conseho di Hoge Colleges van Staat manera Raad van Advies.


AVP, entreguista y cobarde
Awor cu AVP a haya un oportunidad unico pa corigi nan eror garafal, AVP a bin cu un strategia di cobarde. Hendenan entreguista y cobarde so por actua di e forma aki. AVP a manda un solo orador y otronan tur a nenga pa pone nan nomber pa hiba un debate riba e tema. Por a tuma nota con mayoria di esnan cu a vota VOOR pa e Ley di LAFT na 2015 tabata troce den nan stoel. Marlon Sneek, Mervin Wyatt Ras, Jennifer Reyes ta entre otro e entreguistanan cu a vota pa e Ley aki na 2015. Hunto cu nan demas coleganan cada rato nan tabata bandona sala momento cu politiconan di Fraccion di MEP tabata hiba palabra. E berdad sunu tabata wordo treci dilanti y nan “guilty feelings” como bende patria tabata bin dilanti y nan tabata basha na careda. Un hende mester por tin common sense. Pues AVP ta carece di tur esaki.


No tin principio, ni caracter
No tin balor di e lucha di Status Aparte, no tin principio, no tin curashi, no tin caracter pero no mas ta algun “ja knikkers” pa haci locual Mike Eman e tempo aya tabata manda Parlamento como un opdracht. Parlamentario Endy Croes a sigui splica cu a opta pa corigi e Ley mediante un amienda siguiendo a pie de la letra consehonan di Raad van Advies. Alabes den Staatsregeling di Aruba tambe tin ancra na artikel V.13 lo siguiente: Bij landsverordening worden regels gesteld ten einde de rechtmatigheid van het bestuur en de deugdelijkheid van het financieel beheer te waarborgen. Staatsregeling ta mas halto cu Ley y aki den esaki ta regla. Pues pakico AVP tin tanto miedo? Actitud di tur e Parlamentarionan di AVP a wordo considera como Parlamentarionan di Panlefi.


Locual a pasa diahuebs ultimo a indica hopi cla ki sorto di representante Aruba tin den Parlamentarionan di AVP. Casi nunca durante siman nan no ta na trabao y ora tin reunion pubico nan ta yega y ta scoge pa no hiba palabra ni debati riba algo cu nan mes a aproba na 2015. Parlamentario Croes ta termina bisando cu “het kan verkeren”!

Parlamentario Endy a reacciona riba tratamento di Ley di LAFT cual a tuma lugar diahuebs ultimo den Parlamento di Aruba. Mike Eman y AVP debi na un maneho financiero di ‘ondeugdelijk bestuur’ a wordo frena na aña 2014 mediante un KB esta un Koninklijk Besluit. Si pueblo ta corda Hulanda dia 11 di juli 2014 a prohibi Gobernador pa firma Presupuesto 2014 cual porcierto tabata hopi laat y cu hopi geshoemel. Un deficit di 9.3% di e depth to GDP, esta un buraco di mas di 400 MIYON florin. Pa Mike Eman y AVP e fiesta mester a continua. Por corda compania Horizon Consultancy di e propio Richard Arends a strica 4 MIYON for di saco di pueblo pa conseha Mike Eman. “Pisca cu Poeshi”.


Ley LAft contra constitucion
Tur esaki a desemboca cu Mike Eman a bay bao di un palo cu un welga di hamber batiendo weya pidiendo Gobernador pa “firma awor”. Nos tur por corda e show aki acompaña cu bebemento di Ensure scondi den anochi. Hulanda a bin cu un protocol 2 di mei 2015 cual protocol a haya un bida propio cu ‘wettelijke grondslag’ momento cu Parlamentarionan di AVP dia 27 di augustus 2015 tur a grita VOOR pa asina pasa un ley contra nos Constitucion, contra consehonan di Raad van Advies y te hasta Raad van State mas despues tambe a vocifera su mes cu esaki ta contra Constitucion.


Manipulacion cu informacion
Diahuebs ultimo sinembargo Richard Arends tabata e unico orador di AVP den sala di Parlamento. Otronan manera Dowers, Benny Sevinger, Mike de Meza, Mervin Wyatt Ras, lider di Fraccion Marlon Sneek tur a cobardia y no a hiba ni un solo palabra. Pues nan no tabata apto pa defende un ley cu nan mes a introduci. Desde cu a aproba e ley aki na 2015 AVP a entrega un parti di nos Status Aparte riba e aspecto financiero. Richard “Horizon” Arends den su “betoog” a splica cu na 2014 AVP a haci un ‘eenmalig overdracht’ na APFA y esaki a causa cu e dept to GDP a alcansa 9.3%, esta un deficit di mas di 400 miyon florin pa cu aña 2014. Parlamentario Endy Croes ta lamenta masha hopi con despues cu Mike Eman y Richard Arends cu partido AVP a ruina Aruba na un manera sin escrupulo ainda Richard den Parlamento kier manipula pueblo cu informacionnan incorecto. Parlamentario Endy Croes den su “betoog” a lansa e pregunta mesora den direccion di AVP.


Debe extra di 2.2 Biyon
Endy Croes a presenta un tabel oficial di Banco Central unda tin cifranan extra oficial alrespecto deficitnan causa pa AVP den cada aña di nan Gobernacion. Na aña 2010 manera AVP a sinta, AVP a percura pa un deficit di 189 MIYON. Pues mester a presta 189 MIYON pa cera e buraco den presupuesto di placa cu AVP tabata malgasta extra cu no tabata tin. Na aña 2011 esaki a aumenta pa 325 MIYON. Na aña 2012 esaki a alcansa 443 MIYON y Hulanda tabata hopi preocupa desde aki. Na aña 2013 e deficit tabata 333 MIYON y na 2014 esaki a alcansa 406 MIYON. Pues di 2010 pa 2014 den un tempo record Mike Eman y AVP a crea un debe extra pa pais Aruba di 1.7 BIYON esta 1700 MIYON florin y ainda tabata falta e tempo aya 2015, 2016, 2017 unda e debe a surpasa 2.2 BIYON extra cual tin e stempel y seya di Mike Eman y AVP. Parlamentario Endy Croes no por compronde e actitud y splicacion infantil di Richard Arends tratando di ‘praat goed’ locual e sa masha bon cu no ta asina.
​
Mega Debe tin nomber y fam: Mike Eman y AVP. Richard Arends manera un discipulo di Mike Eman y AVP kier hunga comedia barata pa purba scapa nan peyeho.


Parlamentario Endy Croes a termina bisando cu ohala hendenan di AVP cu a hinca Aruba den e debacle financiero aki por tin un tiki curason y poco honor pa ta sincero cu pueblo enbes di continua cu e politica di mentira y manipulacion.

Diasabra anochi, den un Renaissance Convention Center completamente yen, a tuma luga e Show di Modelahe “Sea Bunita, Sea Bo Mes” na unda cu e modelonan special, acompaña pa nan celebridadnan, a haya trato di tapijt cora y a desfila riba pasarela dilanti un publico hopi anima.


Premier Evelyn Wever-Croes, riba e anochi special aki, a modela cu su modelo special Johnisha Medina, y a expresa alegria y orguyo gradiciendo Johnisha y mayornan pa brinda su persona e honor di a modela hunto cu Johnisha.


“Tawata un anochi espectucular den cual nos muchanan special a haya e atencion special. Nan ta realmente un bendicion!”, Premier Wever-Croes a expresa.


Premier Wever-Croes tawata tin e honor durante e anochi special aki pa reconoce dos “Hoben di Excelencia”, Ilaijah Croes, nos reina hubenil di carnaval 2019, y Shawndre Geerman, nos prome hoben special cu a bay modela riba tarima internacional. Ambos a demostra cu no tin limite na e posibilidadnan di nos muchanan special y asina ta fomenta inclusion.


Pa Gabinete Wever-Croes inclusion tin prioridad. Pa cua motibo tambe Gobierno tin un comision bou direccion di señor Hans Geerman, cu ta inventarisando loke ta e necesidadnan y prioridadnan cu Gobierno mester haci den termino corto, mediano y largo pa asina yena tur buraco cu tin habri ainda. Y ora cu ta asina leu, lo ancra e derechonan di nos hendenan special den un ley pa den futuro gobiernonan tene nan mes na e compromisonan cu nos hendenan special. Esaki ta un paso hopi importante den e direccion pa brinda un miho calidad di bida na esnan mas vulnerable den nos comunidad.


Premier Evelyn Wever-Croes ta gradici Fundacion Sea Bunita Sea Bo Mes y specialmente Hans y Marianela Geerman cu e bunita iniciativa aki. E aña aki ta di 4 aña cu ta organisa e show di Modelahe “Sea Bunita, Sea Bo Mes poniendo asina nos muchanan special den un luz special.

Diasabra ultimo a tuma lugar den Centro Deportivo Frans Figaroa e prome competencia di Baile Deportivo pa Scolnan Avansa den cuadro di Olimpiada Escolar. Por a mira un publico grandi consisti di mayornan, famia y fanaticadanan di e scolnan presente cu a bin pa apoya. Un total di 6 grupo a participa di cual e premio di prome lugar a bai pa Colegio Arubano cu e grupo “Colegio Dance Crew”.


Presente na e competenci aki tabata nos Minister di deporte, Sr. Dangui Oduber kende tabata tin e honor di premia e ganadornan di e competencia di Baile Deportivo. Na mes momento Minister a expresa con contento eta di ta awe presente y di mira tanto hende bin apoya nos hobennan.


E olimpiada escolar ta un evento cu pa hopi aña a ser descontinua, pero bou di e maneho nobo di deporte, a percura pa trece esaki bon, stimulando di e forma aki deporte cerca nos hobennan.
E mandatario a trece dilanti cu na momento cu su persona a drenta gobierno e la pone den su maneho pa cuminsa bek cu e Olimpiada Escolar. “Esaki ta parti di nos vision pa stimula deporte, stimula nos muchanan pa haci deporte y participa activamente na deporte y olimpiada escolar ta algo instrumental den e vision aki”.


Finalmente e mandatario a gradici IBiSA pa organisa y planea e Olimpiada Escolar como tambe a gradici Departamento di Cultura.Minister ta manda un biaha mas pabien na e ganadornan di e Baile Deportivo y ta premira cu otro aña esaki lo bai ta hopi mas grandi.

Den presencia di Minister di Turismo Sr. Dangui Oduber, Sr. Nelson Cortes y ekipo di American Airlines, Aruba Tourism Authority, ehecutivonan di Aruba Airport Authority N.V. y demás invitado a yama bon bini na e vuelo nobo y directo for di La La Guardia Airport (LGA) na Queens, New York.


“Den e ultimo aña nan aki como Minister di Turismo nos a conoce desaroyonan sumamente positivo den e area di Aviacion caminda entre otro na december 2018 nos a agrega 2 vuelo directo di American Airlines: uno for di Chicago y uno for di Dallas. Awe un biaha mas nos ta agrega otro vuelo directo di American Airlines na e lista di logronan esta un vuelo for di La Guardia Airport di Queens, New York. Un di e mercadonan mas grandi y importante di Merca. Cu e vuelo aki nos ta sigui fortalece Aruba como un destinacion turistico.”


E vuelo di La Guardia-Aruba ta un logro grandisimo considerando e hecho cu ta unicamente 2 destinacion American Airlines ta bula for di La Guardia New York pa Caribe di cual Aruba ta un di nan.
E hecho cu den pasado gobierno di MEP a logra pa Aruba tin pre clearance pa merca tawata instrumental den e decision di American paso e aeropuerto di La Guardoa ta un aueropuerto nacional. Esaki ta demostra cu ora MEP ta den gobierno nos ta goberna cu vision pa futuro.


E vuelo nobo aki lo ta un vuelo di diasabra cu Boeing 737-800 cu no menos di 16 asiento den first class y 144 asiento den e cabina principal. Pasaheronan cu vuelo pa La Guardia lo sali for di Aruba 14:10 PM y lo yega La Guardia 19:00 PM


“American Airlines ta un partner valioso pa nos destinacion, y como cu aumento di airlift ta crucial pa Aruba su crecimento turistico y exito continuo, e buelo nobo aki ta sigui integra nos sector turistico den un mercado esencial cu ta New York City,” asina Ronella Tjin Asjoe-Croes, CEO di Aruba Tourism Authority a bisa.


E aerolinea tin un presencia fuerte den Caribe cu mas di 900 buelo semanal durante e high season na 38 destinacion. Actualmente American ta opera servicio henter aña for di Aruba pa Charlotte, Dallas/Fort Worth, Philadelphia, Miami y New York y servicio temporal for di Chicago. E ta importante pa menciona cu e buelo aki ta posibel danki na e facilidad di US Pre-Clearance na aeropuerto, mirando cu La Guardia Airport no tin nan propio facilidad di imigracion.


Den nomber di Gobierno di Aruba mi kier a felicita Aeropuerto di Aruba, Oficina di Turismo y specialmente e ekipo completo di American Airlines pa e logro grandi cu nos ta celebra awe. Ta keda demostra cu minister Dangui Oduber ta trahando duro cu resultadonan concreto pa nos unico pilar economico. Su accionan y decisionan ta muestra di esaki.

Den e reunion publico di Parlamento di diahuebs ultimo relaciona cu e Landsverordening Aruba financieel toezicht (LAft), parlamentario Shailiny Tromp-Lee den su discurso a trece dilanti cu e dia ta uno historico y peculiar, pero tambe un dia di sentimentonan mixto. E motibo ta cu na momento cu su persona a repasa tur e documentacion encuanto e historia di CAFT te cu awe, esaki a yen’e cu hopi rabia y cu un sentimento grandi di decepecion. Rabia pasobra te dia di awe pa su persona ta incomprendibel con Gabinete Mike Eman tabatin e caminda asina hancho habri pa a crea un situacion financiero penoso cu a duna hustificacion na Hulanda pa bin interveni den nos asuntonan y te cu nan a yega na e punto cu nan ta haya necesario pa duna Gabinete Mike Eman un Koninklijk Besluit, un KB, na 2014.


Ora cu desde 2014 lo a spera cu e caminda lo a bira mas smal ta bin resulta cu desde e momento ey te cu 2017 e situacion a bira mas deplorabel, cu deficitnan nunca antes realisa den historia di nos Pais. Esaki sigur ta un indicacion fuerte cu nos institutonan di supervision no a cumplí cu nan tarea di supervisa. Lastimamente tambe na mes momento mester trece e realidad padilanti cu gremionan tabata masha pasivo y no mucho critico.


Esaki a conduci cu Gabinete Wever-Croes a hereda un Pais na rand di bancarota y sin su autonomia financiero. Pero desde un principio Gabinete Wever-Croes a bin ta trahando incansabelmente pa saca Aruba di e desaster financiero hereda. Gobierno a prepara un Memorandum Financiero Economico cu ta stipula con ta bay saca Aruba di nos problemanan financiero. Alabes Parlamentario Tromp-Lee a enfatisa cu e tin tur confiansa cu nos Gobierno lo bay percura pa logra cu pa aña 2019 nos lo logra un deficit di 0,5 di GDP.


Trabaonan di CAFT por a caba na 2018 si AVP su desaster ocasiona no tabata asina grandi, si nos situacion financiero no a keda masacra y pa no papia mes di tur e proyectonan PPP. Debenan crea sin cu nan tabatin e decencia di indica of percura pa e fondonan necesario pa paga esakinan. Loke AVP mester a haci desde un principio, awe ta Gabinete Wever-Croes mester bay haci!


P’esey e parlamentario ta realisa tambe cu nos ta na preambulo di finalisacion di e Commissie Financieel Toezicht. Mediante di e amienda cu a ser presenta durante e reunion den Parlamento ta bay inicia cu finalisacion di e entrega di nos autonomia financiero cu nunca mester a tuma lugar y alabes ta pone e prome paso concreto pa nos por cuminsa adkiri nos autonomia financiero bek. Nos lo percura pa nos pone nos estado di derecho funciona manera debe ser.


Parlamentario Tromp-Lee a termina bisando cu Parlamento a demostra cu nos ta asumi debidamente nos trabou di control y cu e tin tur confiansa cu Gobierno lo sa di ehecuta su trabao ehecutivo manera mester ta p’asina hunto cu parlamento saca nos Pais di e crisis financiero, crisis economico y crisis social cu nos ta den.

Parlamento di Aruba diahuebs 6 di juni a trata e cambionan den ley di LAFT na unda cu Parlamento a aproba cambio den ley di LAFT. E cambionan ta basicamente dos, maske cu Gobierno kier a haci mas cambio, pero a dicidi di laga eseynan pa momento di introduci e propio Begrotingskamer. Den e cambio aki Gobierno ta propone e normanan di deficit y surplus nobo, y ta regla e nombracion di ex-politiconan den e college.


Den su disertacion, Prome Minister a elabora riba diferente punto poniendo enfasis riba e Begrotingskamer cu lo wordo introduci aki dos aña pa asina Aruba tin su propio supervision financiero.


HERENCIA FINANCIERO DEPLORABEL
Despues cu Gabinete Wever-Croes 1 a sinta, tur hende a wordo confronta cu e realidad financiero di nos pais. Deficit hopi mas halto cu premira, no cumplimento cu ‘deadline’ pa entrega presupuesto y cuenta anual y cantidad di recibo di e gobierno anterior cu tabata ‘pop up’ di sorpresa cu Gabinete Wever-Croes 1 mester a paga. Institutonan di supervision no a cumpli cu nan tarea di supervisa y gremionan cu mester tabata critico, tabata keto mientras e gobierno anterior a hiba Aruba na borde di bancarota. Locual tabata peor ta cu e normanan poni den ley no a wordo cumpli cu nan y no por a wordo cumpli cu nan tampoco. Aparte di esaki tabata tin total desconfiansa den Aruba. Tanto Hulanda como rating agencies no tabata tin confiansa mas. E credibilidad di Aruba tabata na peliger.


NORMANAN NOBO
Gabinete Wever-Croes 1 a prepara un memorandum financiero economico cu ta stipula un caminda con pa saca Aruba for di e problemanan financiero. A base di e memorandum aki a presenta un presupuesto pa 2019 den cual ta baha e deficit di 149 miyon florin den 2018 pa 25 miyon florin den 2019 y pa 2020 ta premira un surplus pa prome biaha den hopi tempo. Den un reunion publico na september 2018 Parlamento a aproba e normanan aki den un mocion.


PROTOCOL 2018
A base di e memorandum financiero economico y e aprobacion di Parlamento, Minister President Evelyn Wever-Croes y Minister di Finansa Xiomara Ruiz-Maduro a bay negocia un protocol nobo cu Hulanda pa asina crea un base di confiansa y pa evita un otro KB. Na november 2019 a yega na palabracion cu pa aña 2019 lo tin un deficit di maximo 0.5% di GDP, pa 2020 lo tin un surplus di minimo 0.5% di GDP y pa 2021 y despues lo tin un surplus
di minimo 1% di GDP. Di e forma aki lo saca Aruba for di deficit y Aruba por cuminsa paga su debe bek.
E protocol aki a trece bek trankilidad den e relacion cu Hulanda. Tambe a pone e fundeshi pa e confiansa por bolbe. Indudablemente lo no ta facil pa cumpli cu n’e, pero Gabinete Wever-Croes 1 lo cumpli cu n’e. No pa tene Hulanda contento sino pa Aruba mes.


CAMBIO DI LEY
E normanan aki mester wordo cambia den ley y esey ta e cambio cu a wordo trata den Parlamento diahuebs 6 di juni.


EX POLITICONAN
Dia gobierno di AVP a pasa e ley di LAFT, na ultimo momento e Fraccion di AVP a pone un prohibicion cu ex politiconan no por forma parti di e CAFT. Segun nan a bisa e tempo ey, pa asina Nilo Swaen ni Nel Oduber por bira miembro di CAFT un dia. Sinembargo Gabinete Wever-Croes 1 ta di opinion cu nos no mester limita nos mes pasobra nos tin algun ex politico cu lo ta hopi bon pa ocupa un funcion den CAFT. E parti di e cambio aki tambe ta inclui den e ley cu a wordo trata den Parlamento.


RUMBO POSITIVO
E protocol firma y e maneho financiero serio di Gabinete Wever-Croes 1 a cuminsa duna su frutonan positivo. IMF a publica un rapport positvo den cual ta demostra cu e confiansa tey bek atrobe den Aruba, debi na e maneho responsabel, firme y realistico pa atende cu finansas.
Aruba a mantene tambe e rating di Fitch, cu casi a bay perdi debi na mal maneho di gobierno anterior. Ta danki na e vision nobo di Gabinete Wever-Croes 1 Aruba no a perde e rating. Y tin mas interes awor den Aruba pasobra tin un biento fresco, tin un gobierno nobo cu ta pone e ser humano central, y p’esey ta determina di pone finansas publico na orden bek. Awor tin un Minister di Finansa cu sa di e materia y ta tuma e decisionnan necesario cu caracter y firmesa, decisionnan necesario pa hiba Aruba padilanti.


BEGROTINGSKAMER
E protocol 2018 ta e base pa Aruba haya e autonomia financiero bek, y e cambio di e Laft di awe ta e preparacion pa esaki. Segun e protocol en todo caso aki dos aña Aruba lo introduci su propio e Bgrotingskamer cu lo ta encarga cu e supervision financiero. Preparacionnan ta andando caba pa asina e Begrotingskamer cuminsa funciona mas trempan pa asina aki dos aña por tuma over e tareanan di CAFT sin problema.


“Poco poco pero sigur nos ta saca Aruba for di e abismo financiero cu nos a encontr’e na 2017. Pasobra nos ta pone e ser humano central y e ser humano no por desaroya cu un debe gigantesco asina. Nos ciudadanonan merece un miho calidad di bida y esey nos ta determina pa brinda nan”, segun Premier Evelyn Wever-Croes.

Recientemente Minister Glenbert a reuni cu dirigentenan di Fundacion Bon Nochi Drumi Dushi, un instancia cu tin un tarea fundamental den formacion di nos muchanan.


Bon Nochi Drumi Dushi ta un iniciativa di Olga Buckley, como parti di e tesina cu el a skirbi como finalisacion di e curso di Papiamento di Di Tres Grado, na aña 2007, organisa pa Insituto Pedagogico Arubano. Contrario na loke ta usual, no a desaroya e proyecto pa e tesina, pero a skirbi e tesina como sosten pa e proyecto.


A tuma algun tempo prome cu a pone tur piedra hunto, pero por bisa cu Bon Nochi Drumi Dushi ta un proyecto solido cu un fundeshi fuerte. Na 2007, hunto cu Rubia Bernabela, Olga Buckley a sondea prome na algun cas, tanto pariba como pabou di brug, con lo ricibi e idea di bishita cas pa lesa y conta storia. E reaccion tabata masha hopi positivo mes.

​
Meta Bon nochi, drumi dushi, tin como meta promove lesamento na cas, cu e enfoke riba e placer cu lesamento ta duna. A scoge e momento prome cu e mucha bay drumi pa diferente motibo. Na prome luga e momento di bay drumi ta e momento cu e mucha ta tuma despedida di e dia yen di actividad y hopi biaha yen di agitacion y stress. Banda di esey, hopi biaha mayornan no tin suficiente tempo pa lesa pa nan yiunan, apesar cu lesa pa un mucha 15 minuut prome cu e bay drumi ta stimula un contacto intimo entre e mayor y su yiu.


Cu e meta aki den mente, recientemente Minister Glenbert Croes a reteira su apoyo total na e fundacion aki cu nos muchanan y nan futuro como su punto di salida.

“Disciplina, lealtad, amor y determinacion ta guia mi contribui miho na mi pais”


Señora Grace Koolman, Secretario di Conseho di Minister di Gabinete Wever-Croes I a cumpli 40 aña den servicio di Gobierno diabierna 7 di juni. Señora Koolman a cuminsa traha den Gobierno desde 1977. Sinembargo, ora cu Partido MEP a perde eleccion na 1985, Gabinete Henny Eman a mand’e cas. Despues di 3 luna, el a bay traha na Directie Financien na unda tampoco e Gobierno di e tempo ey a permiti’e traha cu trankilidad pa cua motibo Señora Koolman a dicidi di entrega su retiro na 1987. Na februari di 1989 sinembargo, Señor Guillermo Trinidad, (dfm) a pidi Grace pa traha cu n’e. Pues asina Grace a drenta bek den Gobierno.


Grace semper a expresa su gratitude pa e confiansa cu el a ricibi di politiconan y gobernantenan di nos pais, den e caso aki di Partido MEP. Durante su carera, Grace tawata tin e privilegio di a traha cu 3 Lider cu a marca historia di nos Pais. El a cuminsa traha cu Señor Nelson Orlando Oduber, despues cu Señor Betico Croes (dfm) y na final di su carera, Grace ta bek na Bestuurskantoor danki na nos Minister President actual, Señora Evelyn Wever-Croes y ministernan di MEP specialmente, y henter Gabinete, kendenan a sostene e proposicion di Minister President cu su nombracion como Secretario di Conseho di Minister di Gabinete Wever-Croes I.


“Disciplina, lealtad, amor pa bo trabao pero tambe e determinacion pa sigui ‘upgrade’ bo mes pa contribui miho na bo pais ta locual semper a guia mi”, ta palabranan expresa pa Grace pa splica 40 aña den servicio di Gobierno.


Grace ta defini su lealtad y determinacion recitando Palabra di Dios den Colosensenan 3:23 cu ta bisa: Haci tur cos di henter boso curason como sifuera ta pa Señor bo ta traha y no pa hende!


Gobierno di Aruba ta felicta Señora Grace Koolman y ta gradici’e pa su amor y lealtad trahando 40 aña largo pa nos pais. Na e ocacion aki, Gabinete Wever-Croes durante reunion di Conseho di Minister, a entrega Grace un bunita recuerdo rondona di tur minister, famia y tur esnan cu ta traha di cerca cu Grace.

Ta obvio cu e unico meta cu parlamentario Mervin Wyatt Ras y AVP tin ta pa bruha tera pa purba score politicamente a costo di e problemanan social cu ta azotando Aruba. Sra. Wyatt Ras ta dispuesto pa hunga cu dolor di hende, cu ta pasando den dificultadnan social, djis pa por yega na su meta descara.


Un biaha mas parlamentario Wyatt Ras a demostra esaki cu su expresionnan, cu e ta fomenta fake news den nos comunidad. Sra. Wyatt Ras ta trece informacion eroneo pa purba descredita maneho di un Minister y un Gobierno cu si a sa y ta pone e problemanan social como prioridad. Parlamentario Wyatt Ras cu su fake news ta atacha fundacionnan y departamentonan cu ta trahando intensivamente pa trece un structura nobo pa combati e crisis social riba nos isla. E ta desacredita profesionalnan den e tereno social, salubridad publico, husticia y enseñansa cu a pone schouder bou di e crisis, cu su gobierno di AVP a ignora, neglisha y sconde pa e comunidad. Su unico meta ta di purba rebaha y desacredita Sociaal Crisisplan (SCP).


Den pasado, na mas di un ocasion, a invita parlamentario Wyatt Ras pa no keda para un banda. A invit'e bin duna un man pa aporta na e crisis social riba nos isla. Te hasta a estrecha un man durante reunion di parlamento y reconoce sra. Wyatt Ras pa logronan den e tereno social pa asina elimina e aspecto partidista cu AVP kier crea riba e topico aki. Pero su mascarada a cay y lamentablemente no a resta ni un suspiro social mas den e alma di sra. Wyatt Ras.


Parlamentario Wyatt Ras ta bisa cu ta solamente 17% a ser gasta di fondonan di Sociaal Crisisplan (SCP), cual ta un mentira y por ser cataloga como fake news. Sociaal Crisisplan a demostra di tin transpariencia completo cu raportahe cada 3 luna na Gobierno y Parlamento di Aruba pa informa exactamente con e 31 proyectonan ta canando. Actualmente e percentahe di fondonan di Sociaal Crisisplan inverti ta 24% y mayoria di e proyectonan ta desaroyando segun e plannan presenta. Ta informa parlamentario Wyatt Ras cu tur proyecto ta wordo monitorea y controla pa asina tin transparencia completo den ehecucion di cada proyecto. Gabinete Wever Croes ta un Gobierno responsabel cu no ta yega spart placa pa loco. Al contrario, cada cen inverti ta planifica conforme cada proyecto y necesidad di cada instancia, pa kwartaal.


Ta enfatisa na Sra. Wyatt Ras cu tur informacion corecto ta disponibel y na su disposicion. E number di telefon pa yama ta 528.1100 e number unda antes e mes a traha. Ta tristo si cu mester constata cu te dia di awe, ni Ministerio di Asunto Social ni Departamento di Asunto Social no ricibi ni un carta, ni un email ni un yamada di parlamentario Wyatt Ras pa informa su mes corectamente di e desaroyonan actualisa di Sociaal Crisisplan, corda pa haya un yamada di apoyo y cooperacion for di e parlamentario aki. Aruba, 6 di juni 2019.