Minister Dangui Oduber:Gobierno di Aruba a honra Sr. Gerrith Griffith cu un reconocimento pa su añanan di servicio dedica den e sector Hotelero como GM di Divi Aruba Phoenix Beach resort.

Siman pasa a tuma lugar e despida di Sr. Gerrith Griffith como General Manager di Divi Aruba Phoenix Beach Resort. Sr. Gerrit Griffith ta un persona cu di forma indiscutibel ta lagando atras un legado di 43 aña, unda cu tur persona cu por a crusa caminda cu ne, por bisa di tin un memoria agradabel di su persona. Mundo di turismo no ta algo facil, mas ainda ora cu nos tur ta depende di dje. E ta un responsabilidad enorme cu mester carga cada dia cu pasenshi y hopi dedicacion. E atencion caluroso cu ta caracterisa Aruba como producto, a ser bon representa durante e ultimo 43 añanan aki den su persona.


Pa e motibo aki, gobierno di Aruba a invita Sr. Griffith pa ricibi un reconocimento di parti di Gobierno di Aruba caminda a tuma e oportunidad di gradici Sr. Griffith pa tur loke ela bini ta haci pa pais Aruba.


“Palabranan di gradicimento no ta suficiente pa dirigi y expresa na Griffith, sinembargo e ta mas cu mereci, pa den nomber di no solamente gobierno, sino di henter pueblo di Aruba pa gradici Sr. Griffith pa a duna un bon ehempel. Nos ta spera cu Sr. Griffith gosa di e retiro bon mereci, y aunke ya caba bo a duna Aruba mas di loke nos por a pidi, nos kier dunabo danki pa sigui duna Aruba un parti di bo curason.”