Recientemente Censo Piloto a presenta e resultadonan preliminar di Censo Piloto cu a tuma luga na luna di october. Censo Piloto ta en preparacion pa e Conteo General di Poblacion y Vivienda cu lo tuma luga na october 2020. Pa prome bes Censo Piloto tabata completamente digital. 75 encuestador a bishita 2.394 hogar den tur 5 distrito y a haci pregunta tocante di vivienda, hogar y persona cu ta biba den e hogar, cual informacion a wordo procesa via un tablet.


Un tiki historia
E prome Censo na Aruba a tuma luga na aña 1960 cu ayudo di Lago Oil Company. Despues a tene Censo na aña 1972, 1981 y aña 2000 tabata e prome bes cu Pais Aruba a coordina su mes Censo. Prome cu esaki e Censo tabata wordo coordina pa Bureau van Statistiek na Corsou. Cada 10 aña ta tene un Censo y e ultimo biaha cu a tene un Censo na Pais Aruba tabata na aña 2010.


Importancia di colecta data
E mandatario ta enfatisa cu e coleccion di data ta masha importante pa un Pais, pa asina por analisa e desaroyo di un comunidad durante transcurso di tempo. Tambe sector publico y sector priva ta haci uso di e datanan colecta pa varios motibo, pa por ehempel nan por delinea nan maneho a base di informacion corecto.


Privacidad ta garantisa
E informacion colecta lo no wordo divulga na ningun otro instancia, tampoco ningun persona lo wordo identifica. E data colecta ta wordo usa solamente pa produci estadistica. Oficina di Estadistica y e encuestadornan cu a firma un contract, ta mara na un Ley di secrecia. Censo 2020 ta garantisa privacidad a base di e Ley di ‘Statistiek verordening’.


Gradicimento
Minister Maduro ta gradici e expertonan di CBS, tur e encuestadornan y tur persona cu a coopera cu Censo Piloto y ta desea CBS hopi exito cu e preparacionnan pa Censo 2020. E mandatario ta haci un yamada na nos comunidad pa coopera cu Censo 2020, e coleccion di informacion ta sumamente importante pa Pais Aruba y ‘Pasobra Aruba ta conta riba bo’.

​Dos aña pasa, riba un 17 di november, Coalicion MEP, POR y RED a huramenta como Ministernan y a forma Gabinete Wever-Croes. Dos aña, segun Prome Minister Evelyn Wever-Croes, no tabata facil. Na principio di gobernacion mester a ahusta constantemente na e realidad financiero, economico y social cu tabata birando conoci. Despues mester a tuma pasonan dificil pa enfrenta e realidad financiero amargo.
 
Prome Minister a expresa cu ainda nos no ta caminda nos mester ta, pero nos ta riba e bon caminda. Awor, cu determinacion y fiho riba nos vision, Gabinete Wever-Croes ta stabilisando e situacion, creando espacio real pa dentro di poco brinda e alivio financiero necesario na cada ciudadano y brinda proteccion na esnan mas vulnerable den nos comunidad. Gabinete Wever-Croes ta pone e ser humano prome, den tur sentido y nos compromiso ta pa crea bienestar y progreso pa tur ciudadano di pais Aruba.
 
“Dos aña pasa hopi cos tabata pasando den mi cabes momento cu mi tabata subi e trapinan pa bay huramenta como Prome Minister di nos pais, sin por a imagina e magnitud real di tur loke tabata spera nos. Mirando atras mi ta sinti hopi gratitud pa tur e sosten cu mi ta haya di Aruba. Y especialmente di mi casa Kenneth. Mi ta gradici Dios pa e forsa cu E ta duna mi dia aden dia afor. Mi ta gradici cada un di boso pa e sosten, oracion y bon deseonan.
 
Gabinete Wever-Croes ta E CAMBIO cu pueblo tanto a anhela. Sinembargo den dos aña nos no por a coregi e rumbo robes cu nos pais tabata bayendo aden y realisa e cambio completo pa tur hende. E compromiso tey pa logra realisa e cambio ey. Y nos ta cambiando e rumbo negativo pa un rumbo positivo cu speransa di bon futuro pa nos generacionnan nos dilanti. Hunto cu boso sosten lo mi sigui traha pa realisa e cambio mereci pa tur ciudadano di nos pais”, Prome Minister Evelyn Wever-Croes a expresa.

17 di November ta marca dos aña cu Gabinete Wever-Croes a tuma e reto financiero, economico y social di nos pais pa asina hiba nos pais den e rumbo positivo pa laga nos generacionnan futuro cu un miho Aruba. Dos aña, cu apesar di tur e retonan aki, nos a progresa y cumpli considerabelmente cu nos plan di maneho pa pone e ser humano central especialemente cu e fondonan cu nos a pone disponibel den e maneho social, algo cu e gobierno anterior a neglisha completamente lagando atras un situacion social cu ta causa nos pueblo hopi dolor. Tambe cu e bon noticia cu Aruba a cera Presupuesto sin deficit, ta un prueba mas cu Gabinete Wever-Croes ta trahando cu visionnan grandi y real y determina pa logra progreso y bienester di nos pais merece. Gobierno di Aruba ta orguyoso di e hopi logronan obteni den dos aña.

Riba e tereno economico, pa prome biaha Aruba a publica un vision economico 2019-2022 pa un economia fuerte y resiliente, den cual ta describi cual ta e areanan cu lo concentra riba dje den e periodo nos dilanti pa genera desaroyo economico di cual ta forma parti 6 sector prometedor pa diversificacion di Aruba su economia. E 6 sectornan prometedor ta den:

1) diversificacion di Turismo entre otro pa Turismo di Cultura, Deporte, Aventura y Turismo Medico. 2) Economia di conocemento entre otro di technologia solar y di oceano, educacion avansa den ciencia, technologia, ingenieria, matematica y solucionnan di ICT. 3) Agricultura.

4) Logistica, entre otro servicio aereo, y portuario. 5) Economia Circular, pa negoshi den material di desperdicio y recyclahe. 6) Industria Creativo, pa negoshi chikito y mediano den arte, musica, diseño grafico fotografia, diseño di website studio arte y moda.
 
Bou e maneho di Gabinete Wever-Croes, Turismo cu ta nos pilar economic, a conoce un crecemento considerabel y cu cifranan positivo, apesar di tur e retonan. Januari te cu September 2019: Aruba su turismo a aumenta cu 5.7% y entrada pa camber di hotel a aumenta cu 8.4%. Prome tres lunanan di 2019, turismo a contribui cu Awg. 1094.1 miyon florin na nos economia. Varios proyecto a inicia y of ta den plan pa cuminsa pa asina eleva nos Turismo y alabes duna nos pueblo miho luganan di recreacion familiar.

E grito di pueblo pa un pais mas sigur, a haya atenion. Nos pais a bira mas sigur! A trece e helicopter bek, ta trahando pa pone e di 2 helipad na san Nicolas, a baha ladronicia na e casnan residencial, a trece e radar bek pa asina por controla nos fronteranan miho hunto cu e metal sharks, Cuerpo policial a haya tur material necesario, di Wifi den oficinan te cu autonan nobo cu nan mester pa nan eherece nan trabou mas eficiente.
 
Poniendo e ser humano central, Gobierno di Aruba a amplia e canasta basico cu 22 producto, mientras Minister di economia ta trahando pa bini cu un mercado popular, Gobierno kier facilita un luga pa esaki bin tanto na Oranjestad como na SN. E meta ta pa e consumidor por cumpra productonan na prijs di costo.
​
Gabinete Wever-Croes a absorba aumento di gasolin na april cu 16 cen, na mei cu 13.9 cen y na luna di juni cu 7.6 cen, total 37.5 cen pa asina pueblo no haya un aumento drastico.
 
Crisis plan Social hunto cu sector priva a logra bini hunto y pecura pa tur mucha cu ta bay Trai Merdia y no tin cuminda, haya cuminda. Ta trahando cu tur fundacionan pa duna e parti social e importancia cu nunca nan a haya.
 
Hibando un maneho di nos localnan prome y kitando e ontheffing di gobierno anterior, a logra baha e desempleo di 8.9% (2017) pa 7.3% (2018), desempleo bou di nos hobennan tambe a baha di 19.4% (2017) pa 16.2% (2018). Pa Gabinete Wever-Croes Aruba ta prome, den un situacion dificil a percura pa aumenta e minimum loon cu 53 florin.
 
Reforma Fiscal, e cambio husto a trece alivio pa esnan mas vulnerabel
Gabinete Wever-Croes a elimina impuesto riba entrada y riba salario pa 25 mil ciudadano, a rebaha impuesto riba entrada y riba salario pa 7 mil ciudadano, a baha prima di AZV pa pensionadonan cu 4%, a hisa reparatie toeslag cu 25,- a hisa pensioen di biehes cu 25,- pa pensionadonan soltero y 42,- pa pensionadonan casa. Gabinete Wever-Croes a elimina grondbelasting pa 12 mil ciudadano, a rebaha grondbelasting pa 16 mil ciudadano.
Commercio a haya un rebaho di belasting riba dividend di 25% pa 10% tambe den e reforma fiscal.
 
Gabinete Wever Croes a stop tur bendemento di tereno. A otorga mas cu 1000 tereno na famianan Arubiano, cu tabata wardando desde 1992 pa construi nan propio cas. A pone enfasis riba nos medio ambiente serando e Dump na parkietenbos nos no ta cla ainda, pero esey ta e meta final.
 
Mirando e importancia di integridad pa Gabinete Wever-Croes, na october 2018 a institui e Departamento Bureau Integriteit Aruba (BIA). E departamento aki tin como meta pa aumenta e conscientisacion riba practicanan di integridad y pa sirbi pueblo aceptando yamadanan pa reporta, meld of/y duna keho pa cu falta y kiebro di integridad.
 
Gobierno ta inverti den Enseñansa di Aruba! Ta baha e interes di Aruba lening na 0%. E decision aki a wordo tuma mirando cu Gabinete Wever-Croes ta considera estudio un parti esencial pa progreso di pais Aruba y bahando e interes di e Aruba lening pa 0% ta stimula nos hobennan mas ainda pa sigui studia ya cu na momento cu nan caba nan estudio e lening aki por wordo paga mas lihe.
 
Cu e introduccion un e Plan Educacion Nacional, PEN, studiantenan di Aruba por tin mas opcion di estudio. A será diferente acuerdo atractivo cu diferente universidad, pa amplia e posibilidadnan pa sigui studia sea na Merca of Canada. E cambionan importante aki, sigur ta wordo considera como un inversion den enseñana di Aruba cu lo conduci na forma mas profesional Arubiano pa contribui na e economia di pais Aruba.
 
E vision di Gabinete Wever-Croes pa innovacion a wordo basa riba un necesidad di cambio y di diversificacion. Como Gobierno nos ta comprometi na e Metanan di Desaroyonan Sostenibel (SDGs) y logra e obhetivonan aki pa aña 2020. Door di incorpora innovacion na nos enfoke riba desaroyo sostenibel, lo permiti nos pa probecha e olanan di oportunidadnan pa logra e obhetivonan aki.
Danki na e inversion di 13.05 miyon di e 11 Fondo di Desaroyo di Union Europeo, tin un facultad nobo di Sustainable Island Solutions through Sciences, Technology, Engineering and Mathematics (SISSTEM) na Universidad di Aruba. 
Studiantenan Arubiano como studiantenan den nos region, por obtene nan grado di Bachelor den estudionan di Sciencia, Technologia, Ingenieria y Matematica (STEM) t tambe nan por obtene un Master den Sostenibilidad. Lo ofrece tambe un programa di Post Doctorado (PhD). Hunto cu tur esaki lo establece tambe un Centro Caribense di STEM y un Centro pa por haci investigacion riba Sostenibilidad.
Innovacion na tur scol na Aruba ta un meta di pa Gabinete Wever-Croes. Tur scol básico publico ta hayando Smart boards pa nos muchanan no keda atras.
 
Nos compromiso pa San Nicolas ta birando realidad. San Nicolas pa San Nicolas! Proyectonan entre otro remodelacion di caya principal di San Nicolas, hotel San Nicolas, Fast Ferry, San Nicolas Ports Authority, proyecto Baby Beach, Tourism Oriented Police na San Nicolas, renobacion di Warda di Polis, Helipad pa helicopter baha na San Nicolas, y mas importante: mas atencion pa desaroyo di San Nicolas pa San Nicolas, ya dunando realse na nos vision y determinacion pa logra cosnan grandi P’riba di Brug.
 
Pa prome biaha desde 2008, Aruba lo tin surplus den su Presupuesto. Gabinete Wever-Croes a marca e prome Surplus den nos presupuesto despues di 12 aña. Presupuesto 2020 tin un surplus di 0.5%. Cu esaki, ta di 4 biaha cu nos presupuesto tin un surplus desde cu nos ta pais y esaki ta basa riba un strategia y maneho financiero structural. No tawata facil, pero danki na e vision, dedicacion y e compromiso di Gobierno di Aruba y e sacrificio di pueblo, awe nos por cuminsa paga nos debe bek y baha e debe mas ainda den 2020.
Pa aña 2021 nos ta cuminsa sinti mas alivio y mira e inversionnan cu pa hopi aña no a wordo haci den nos comunidad. Nos ta riba e bon caminda !
 
Esakinan ta den linea grandi, algun logronan di Gabinete Wever-Croes. Tawata 2 aña basa riba planificacionnan y ehecucionnan di un maneho sincero y responsabel di Gabinete Wever-Croes. Hunto nos a logra y ta logrando pa asina nos por laga un miho pais, un miho Aruba pa nos futuro generacionnan. Importante ta, cu nos ta paga e debe cu nos generacion a ocaciona y nos lo pasa un miho futuro na e generacionnan nos dilanti. Esaki, danki na un Gobierno responsabel y un pueblo cu ta comprende cu sacrificio ta y determinacion, ta pone nos bek riba e caminda positivo. Pabien Aruba y danki pa e sosten durante 2 aña. Hunto nos ta logra mas. 

​17 di november ta e di dos aña di e instalacion di e Gobierno di coalicion Gabinete Wever-Croes. E coalicion MEP POR RED a huramenta pa hiba nos pais den e rumbo di progreso y prosperidad. Mainta tempran dia 20 di November, yen di entusiasmo, Gabinete Wever-Croes a drenta Bestuurskantoor, y di biaha a constata cu e retonan pa salba nos pais lo ta grandi. A encontra e luga di gobernacion den un estado deplorabel, y a dura poco pa e gobierno nobo realisa cu nos pais tambe a wordo laga atras den un estado di crisis.
Cu e mesun determinacion pa restaura Bestuurskantoor y pone bek den su estado original, Coalicion MEP, POR y RED, for di prome dia, ta determina pa restaura Aruba y saca nos for di e caos financiero y nos ta logrando pa trece e cambionan cu Aruba merece.
 
Cu determinacion, fe, perseverancia, trabou di ekipo y dialogo, a lora manga y cuminsa traha, no a importa e desafionan, sea grandi of chikito, a atende cada un cu responsabilidad, pa asina cuminsa cambia e rumbo negativo cu nos pais tawata bayendo aden pa un rumbo positivo. Cu transparencia a informa e pueblo di cada reto y cada logro di Gabinete Wever-Croes. Aruba ta riba rumbo pa un era nobo, un era stabiel bou di un liderazgo firme y determina pa entrega e generacionnan nos dilanti un miho Aruba.
 
Gabinete Wever-Croes a hereda un crisis financiero enormemente grandi cu a haci e dos aña cu a pasa hopi dificil pero no imposibel. Y a demostra cu hunto, den tempo di crisis, por goberna un pais y sac’e for di e rumbo negativo cu nos pais tawata bayendo. Cu determinacion nos a traha cu e unico meta pa wak nos Aruba sano financieramente atrobe. Despues cu e cifranan real a bira conoci, y a resulta cu e deficitnan pa 2017 y 2018 tabata enormemente halto, gobierno mester a ahusta su prioridadnan. Mesora a bira obvio cu mester studia e situacion bon, y presenta e cifranan real na comunidad. E crisis aki a haya atencion constante desde e prome dia te cu awor ainda.
 
Apesar cu dos aña no ta suficiente pa logra e metanan cu a compromete den e programa di Gobernacion, y apesar cu dos aña a wordo mas categorisa pa atende un crisis tras di otro, Gobierno di Aruba ta orguyoso di e hopi logronan di cada Minister. Nos a crea un fundeshi pa un gobernacion estable, na unda cu realmente nos ta pone e ser humano central.
 
Hunto nos a logra y ta logrando pa asina nos por reconstrui un miho pais, un miho Aruba pa nos futuro generacionnan. Cu Presupuesto 2020, un presupuesto sin deficit ta un prueba mas cu den tempo dificil, si bo tin vision, determinacion, sacrificio, y compromiso, bo ta logra cosnan grandi. Gabinete Wever-Croes ta determina pa saca Aruba for di e problema financiero y conhuntamente nos a logra presenta un presupuesto balansa. Esaki solamente por a wordo logra door di dedicacion y un maneho structural di un Gobierno serio y responsabel. Nos ta paga e debe cu nos generacion a ocaciona y nos lo pasa un miho futuro na e generacionnan nos dilanti.
 
Pabien Aruba. Gabinete Wever-Croes ta traha pa bo. Abo ta e motibo pa cua nos a acepta pa goberna den un crisis financierno asina grandi cu otro gobierno a ocaciona nos pueblo luchado. Abo ta e motibo cu ta duna nos e forsa pa uni y sigui traha pa e bienestar y progreso di nos pais. Nos ta convenci, cu bo sosten, nos ta sigui logra cosnan grandi pa nos Aruba dushi tera. 

Diabierna atardi Minister di Salubridad Publico Sr. Dangui Oduber a acudi na Banco Social di Aseguradonan (SVB) San Nicolas pa e lansamento di e webportal MiSVB2.0. E mandatario a duna un discurso caminda e la enfoca riba e vision pa brinda un servicio moderno na e aseguradonan por medio di tecnologia. “Mi a nota cu SVB ta un organisacion hopi dinamico cu ta purba continuamente di trece solucion y cambionan den cada departamento. Mi ta orguyoso di con e vision di 2020 pa SVB ta bayendo y cu tur cos ta canando segun plan” tabata palabranan di e mandatario.

​
Tecnologia rond mundo ta avansa hopi lihe y pesey mes SVB mester keda proactivo pa asina uza cambionan na benificio di SVB. Cu e cambionan aki SVB lo funciona na un manera mas eficiente y cu transparencia pa e sociedad. SVB tin e deber pa administra e fondonan adecuadamente y cu confiabilidad, pa mantene e fondonan financieramente sostenibel.


E webportal, MiSVB 2.0, ta e prome paso solido pa SVB den e proceso di digitalisacion di nan servicionan. Mediante e plataforma digital aki, SVB ta comunica mas rapido y ta brinda su clientenan acceso na tur informacion cu SVB ta maneha den cuadro di e relacion SVB-cliente. Den SVB su vision 2020, SVB a propone su mes pa transforma di un organisacion tradicional, burocratico y cera pa uno moderno, accesibel y transparente. E medio pa logra e transformacion aki ta digitalisacion asina e mandatario a duna di conoce.


Innovacion por medio di digitalisacion ta forma parti importante di maneho di minister Dangui Oduber. E ta un forma pa traha mas eficiente y elimina burocracia y mehora servicio.


Minister Dangui Oduber a expresa cu su persona ta contento di mira con e director Sr. Edwin Jacobs hunto cu su staf y personal ta treciendo hopi cambio cu ta transformando SVB den un organisacion innovativo pa asina por brinda e miho servicio na nos comunidad Arubano. Finalmente Minister Dangui Oduber a felicita tur e trahadornan mustrando asina e aprecio cu e tin pa e bon trabou cu nan ta eherce.

​Diahuebs atardi a tuma luga na Baby Beach Aruba na San Nicolas e “groundbreaking” di e hotel 5 strea Secrets Baby Beach Resorts. Pa Premier Wever-Croes tawata un inmenso placer di por a atende e evento aki cu ta uno hopi importante pa e desaroyo di Aruba pero en especial di San Nicolas.
 
E proyecto aki no tawata uno facil pa realisa pero cu hopi esfuerso y pasenshi Conseho di Minister a logra move bareranan pa por a logra haci e soño aki un realidad. E comunidad di San Nicolas semper a expresa nan deseo di wak un hotel den e area di San Nicolas y finalmente ta wak awe con e Gobierno di Cabinete Wever-Croes ta haciendo nan deseo un realidad. A tuma hopi aña di planificacion y promocion pa confirma si e area di Baby Beach ta uno potencial pa inicia un proyecto di hotel y na final e Gobierno aki a logra.
 
E proyecto lo ta uno hopi positivo pa Aruba ya cu e lo genera mas posibilidad di trabou pa nos hendenan. E lo trece cu n’e tambe e oportunidad pa San Nicolas tin mas restaurant, tiendanan, transporte publico y tur actividad relaciona cu Aruba su industria turistico.
 
Sin duda e hotel aki lo ta un comienso nobo pa e area di San Nicolas cu alfin ta bay forma parti di nos pilar di economia cu ta turismo. Prome Minister ta manda un danki special na tur su coleganan cu a logra haci e soño aki un realidad. Tambe den nomber di henter e comunidad di Aruba ta gradici Martinon Group and AM resorts y henter San Nicolas y vencidario pa kere y sostene e proyecto aki.
 
Pabien San Nicolas cu e gran logro aki. 

​Cabinete Wever-Croes a institui e Sociaal Crisis Plan (SCP) pa atende cu e crisis social na Aruba. Den cuadro cu e plan aki e comite encarga conhuntamente cu Minister di Asuntonan Social Mr. Glenbert Croes a bin cu un proyecto asina yama “jongerenloket” pa yuda mamanan hoben y soltera pa por para riba nan pia y bay dilanti. E proyecto aki a resulta di ta uno exitoso na unda cu un total di 19 mama hoben soltera a logra haña nan certificado.
 
Pa motibo fuera di su alcanse Minister di Asuntonan Social no por tawata presente pa entrega e certificadonan y a worde representa pa Prome Minister Evelyn Wever-Croes durante e ceremonia importante aki. Pa Premier Wever-Croes esaki tawata un honor y ta sumamente orguyoso di cada mamanan hoben soltera cu a logra obtene e certificado aki exitosamente.
 
“E storianan di cada mama tawata un inspiracion pa mi. Mi a wak e determinacion den cada un di nan cu den nan momentonan mas dificil a lucha pa logra obtene e certificado aki. Nan a expresa cu nan yiunan ta duna nan e forsa pa sigui bay dilanti”, Prome Minister a bisa.  
 
Prome Minister a gradici e team completo di SCP y especialmente Minister di Asuntonan Social Glenbert Croes pa su vision y liderazgo pa cu e proyecto aki haciendo asina un diferencia den bida di nos hobennan. Un pabien tambe na tur e mamanan hoben cu a tuma e oportunidad pa bin atende e curso aki y cu a logra pase exitosamente. 

Diahuebs atardi Minister Turismo, Salubridad Publico y Deporte Sr. Dangui Oduber tabata presente na e “ground breaking” historico di Secrets Baby Beach Resort na Baby Beach. E mandatario a duna un discurso cual na varios ocasion e mandatario a enfoca riba e hecho cu Gobierno ta sigui pusha pa por crea un desaroyo berdadero pa San Nicolas. Pa prome biaha San Nicolas ta bay haya un hotel.


Mas cu 40 aña a mira cu si no ta pa e refineria e ta dificil pa hiba y mantene un negoshi na San Nicolas y comerciantenan no ta inverti si no tin hende pa cumpra. Pa es motibo mester a bin cu un desaroyo nobo cu lo crea un bida atrobe na San Nicolas. Secrets Baby Beach Resort ta bay ta un hotel cu 600 camber “all inclusive” cu lo bay crea hopi trabou na San Nicolas. Minister Oduber a splica cu e desaroyo turistico hotelero aki lo tin “ripple effect” pa e area. Automaticamente ora cu tin hotel mester di car rentals, tour operators, watersports, souvenir shops, restaurants y mas! Mayoria di locual cu no tin actualemente.


“San Nicolas ta conociendo diferente desaroyo sea ta den parti infrastructural, turismo, salubridad y tambe den deporte. Actualmente e caya principal na San Nicolas ta hayando su renobacion pa haci e caya mas atractivo pa nos bishitantenan.  Otro siman lo tin e ground breaking di e proyecto di Baby Beach unda lo expande e beach, crea mas area di parkeo, traha facilidadnan deportivo y mucho mas. E pier na Rodgers Beach tambe lo bay wordo construi y e area aki tambe lo haya su embeyesemento. A activa e oficina pa turista na San Nicolas pa asina mustra e turistanan kiko tur San Nicolas tin pa ofrece. A bin cu Island Festival cu a bira un hit pa tanto e turistanan como nos localnan.

​ Den parti di salubridad ImSan ta hayando un expansion, un inversion di 60 miyon florin cu lo contribui na hisa e callidad di cuido. Ex Prinses Christina School na San Nicolas lo bira un facilidad multifunctional caminda muchanan por bay haci deporte, arte y mucho mas. Di e manera aki Gobierno ta duna San Nicolas e atencion cu e merece” asina Minister Dangui Oduber a duna di conoce.


Minister Dangui Oduber a gradici e grupo Martinon, AM Resorts, Three Rivers Real Estate pa e confiansa cu nan a pone den Aruba su economia y den San Nicolas. Tambe e mandatario a manda palabra di felisitacion pa colega Minister Otmar Oduber cu tabata e persona principal tras di e proyecto hotelero. Finalmente Minister Dangui Oduber a felicita henter e comunidad di San Nicolas y e pueblo di Aruba cu e logro historico aki.

​Organisado y participantenan Elite di e torneo internacional Aruba Karate Cup a haci un bishita na Premier Evelyn Wever-Croes pa personalmente entrega nos Prome Minister un invitacion special pa atende e torneo e fin di siman aki.
 
E torneo aki normalmente ta wordo organisa na otro pais, na unda Aruba ta wordo representa dignamente pa e grupo di participantenan aki. Ta varios aña caba cu e grupo di hoben aki cu nan entusiasmo, ta logra pone Aruba su nomber resalta internacionalmente ganando diferente medaya.  
 
Organizadonan di e torneo Karate Cup a scoge Aruba pa ta e pais anfitrion e aña aki. E competencia lo tuma luga na Renaissance Convention Center di 15-17 di november contando cu un total di mas o menos 300 participante di diferente pais consistiendo di atletanan, referee y atletanan Pan Americano.
 
Pa e torneo aki lo tin 7 diferente pais cu lo ta presente pa competi pa e titulo maximo. E paisnan cu lo participa te cu e momento aki ta Algeria, Nepal, Pakistan, Colombia, Venezuela, India y Spaña. Inscripcion pa cu e torneo internacional aki ta habri ainda pa e paisnan cu na ultimo momento lo kier participa.
 
Alabes, e representantenan di Aruba Karata Cup a tuma tempo pa discuti nan plannan cu Prome Minister teniendo cu e mehoracionnan pa e deporte na Aruba.
 
Premier Evelyn Wever-Croes ta sumamente agardeci pa cu e invitacion personal aki y ta desea e participantenan hopi exito e fin di siman aki.