Diahuebs atardi Minister Turismo, Salubridad Publico y Deporte Sr. Dangui Oduber tabata presente na e “ground breaking” historico di Secrets Baby Beach Resort na Baby Beach. E mandatario a duna un discurso cual na varios ocasion e mandatario a enfoca riba e hecho cu Gobierno ta sigui pusha pa por crea un desaroyo berdadero pa San Nicolas. Pa prome biaha San Nicolas ta bay haya un hotel.


Mas cu 40 aña a mira cu si no ta pa e refineria e ta dificil pa hiba y mantene un negoshi na San Nicolas y comerciantenan no ta inverti si no tin hende pa cumpra. Pa es motibo mester a bin cu un desaroyo nobo cu lo crea un bida atrobe na San Nicolas. Secrets Baby Beach Resort ta bay ta un hotel cu 600 camber “all inclusive” cu lo bay crea hopi trabou na San Nicolas. Minister Oduber a splica cu e desaroyo turistico hotelero aki lo tin “ripple effect” pa e area. Automaticamente ora cu tin hotel mester di car rentals, tour operators, watersports, souvenir shops, restaurants y mas! Mayoria di locual cu no tin actualemente.


“San Nicolas ta conociendo diferente desaroyo sea ta den parti infrastructural, turismo, salubridad y tambe den deporte. Actualmente e caya principal na San Nicolas ta hayando su renobacion pa haci e caya mas atractivo pa nos bishitantenan.  Otro siman lo tin e ground breaking di e proyecto di Baby Beach unda lo expande e beach, crea mas area di parkeo, traha facilidadnan deportivo y mucho mas. E pier na Rodgers Beach tambe lo bay wordo construi y e area aki tambe lo haya su embeyesemento. A activa e oficina pa turista na San Nicolas pa asina mustra e turistanan kiko tur San Nicolas tin pa ofrece. A bin cu Island Festival cu a bira un hit pa tanto e turistanan como nos localnan.

​ Den parti di salubridad ImSan ta hayando un expansion, un inversion di 60 miyon florin cu lo contribui na hisa e callidad di cuido. Ex Prinses Christina School na San Nicolas lo bira un facilidad multifunctional caminda muchanan por bay haci deporte, arte y mucho mas. Di e manera aki Gobierno ta duna San Nicolas e atencion cu e merece” asina Minister Dangui Oduber a duna di conoce.


Minister Dangui Oduber a gradici e grupo Martinon, AM Resorts, Three Rivers Real Estate pa e confiansa cu nan a pone den Aruba su economia y den San Nicolas. Tambe e mandatario a manda palabra di felisitacion pa colega Minister Otmar Oduber cu tabata e persona principal tras di e proyecto hotelero. Finalmente Minister Dangui Oduber a felicita henter e comunidad di San Nicolas y e pueblo di Aruba cu e logro historico aki.

​Organisado y participantenan Elite di e torneo internacional Aruba Karate Cup a haci un bishita na Premier Evelyn Wever-Croes pa personalmente entrega nos Prome Minister un invitacion special pa atende e torneo e fin di siman aki.
 
E torneo aki normalmente ta wordo organisa na otro pais, na unda Aruba ta wordo representa dignamente pa e grupo di participantenan aki. Ta varios aña caba cu e grupo di hoben aki cu nan entusiasmo, ta logra pone Aruba su nomber resalta internacionalmente ganando diferente medaya.  
 
Organizadonan di e torneo Karate Cup a scoge Aruba pa ta e pais anfitrion e aña aki. E competencia lo tuma luga na Renaissance Convention Center di 15-17 di november contando cu un total di mas o menos 300 participante di diferente pais consistiendo di atletanan, referee y atletanan Pan Americano.
 
Pa e torneo aki lo tin 7 diferente pais cu lo ta presente pa competi pa e titulo maximo. E paisnan cu lo participa te cu e momento aki ta Algeria, Nepal, Pakistan, Colombia, Venezuela, India y Spaña. Inscripcion pa cu e torneo internacional aki ta habri ainda pa e paisnan cu na ultimo momento lo kier participa.
 
Alabes, e representantenan di Aruba Karata Cup a tuma tempo pa discuti nan plannan cu Prome Minister teniendo cu e mehoracionnan pa e deporte na Aruba.
 
Premier Evelyn Wever-Croes ta sumamente agardeci pa cu e invitacion personal aki y ta desea e participantenan hopi exito e fin di siman aki. 

​E siman aki Minister Ruiz-Maduro a reuni cu representantenan di Grupo Martinón cu ta bay realisa e proyecto di e hotel Secrets na San Nicolas.

​ Un bon reunion na unda cu e mandatario a haya un bista di e inversionannan cu e grupo tin na diferente Pais y specialmente e inversion cu nan ta bay haci na Aruba.

Hotel Secrets sigur lo trece un spin off positivo pa economia di San Nicolas creando cupo di trabou y tambe oportunidad comercial pa diferente otro compania local.

Minister Ruiz-Maduro ta gradici Grupo Martinón pa nan confiansa den Aruba y ta desea nan exito cu e inversion importante aki pa San Nicolas.

Diabetes ta wordo categoriza como un malesa no transmitibel . E malesanan aki tin e tendencia di un duracion largo y ta e resultado di un combinacion di factornan. Diabetes por ta genetico of por desaroya dor di un “unhealthy lifestyle”. Diabetes ta causa problemanan cardiovascular, ceguera, problema cu riñon y amputacion di pia. Den aña 2018 un total di 8642 persona a haya tratamento pa e malesa di diabetes.


Mandatario Dangui Oduber ta splica cu den cuadro di prevencion, su persona ta haya cu ta di sumo importancia pa conscientisa comunidad riba por ehempel e consumo di sucu y e efecto cu e tin riba salud. Sucu ta un producto cu hopi lihe ta contribui na sobre peso y tambe na malesanan cronico. Tin estudionan hopi extenso haci cu ta demostra con esaki por causa cancer y hopi otro malesa mas. “E problema mas grandi ta cu sucu ta practicamente den tur cos cu nos ta come y bebe. Ta yega momento pa nos para keto y realisa kico nos ta alimenta nos curpa cu ne”.


Ta urgi famianan pa buska informacion tocante diabetes pa siña trempan di e señalnan di alerta cu diabetes ta duna. Buska pa sa si abo of un familiar ta na risico di desaroya Diabetes.Minister Dangui Oduber a tuma nota di diferente instancianan, manera plataforma di salud, Fundacion Diabetes Aruba, Lions Club, Witgele kruis y algun mas y kier gradicinan pa e trabou cu nan ta haci pa yuda conscientisa comunidad.


Finalmente e minister a expresa cu lo sigui conhuntamente cu stakeholdernan den busca e miho maneranan pa prevencion ta parti di nos cultura, aportando asina na un Aruba mas saludabel.

Minister Ruiz-Maduro a haci entrega di certificado ‘From Zero to Hero’ na 7 entrepeneur. Departamento di Asuntonan Economico, Comercio y Industria (DEACI) y su unidad Exprodesk conhuntamente cu NEX Consulting a organisa varios tayer di ‘From Zero to Hero’.


E prome workshop a inicia na luna di juli e aña aki y tabata un ‘Webinar- the exporter mindset: how to profit from your talents’ y un grupo selecciona di 25 potencial exportado a participa di cual 15 entrepeneur a wordo scohi pa continua cu e di dos parti.
Na september a continua cu e segundo parti di ‘From Zero to Hero – steps to export and change your business and your life’. E 15 entrepeneurnan a sigui durante 8 siman, 7 diferente modulo y a siña entre otro con pa traha/modifica un ‘Business Model y Export Plan’ pa exporta producto y servicio. Cada modulo tabata consisti di ‘learning tools’ y ehercicionan practico. Di e 15 entrepeneurnan a keda finalmente 7 entrepeneur cu dia 11 di november a sigui cu e First Session Export Coaching, cu a pasa e trayectoria completo y a ricibi un certtificado.


Minister Ruiz-Maduro a felicita cada un di e entrepeneurnan cualnan ta: D.F. Gomes-Bolanos di Vadavas, Sharina Gumbs di Studio Gumbs, Vanessa Hollander di Pressplay VDH Caribbean VBA, Virginia Rasmijn-Dijkstra di Stage 2 Inspire, Dave Martinus di Action Coach Aruba, Osyth Henriquez di Aruba Ocean Villas y Suzy Maduro di Suzy Maduro Consultancy.


E mandatario ta contento cu e entrepeneurnan lo continua cu un siguiente parti cual lo ta ‘From Zero to Hero Mastermind-Empowered Women Exporters’ cu lo reuni un bes pa luna pa continua cu tayernan, intercambia di experiencia y network.


E mandatario a gradici e expertonan di Exprodesk y NEX Consulting cu a organisa e tayernan di ‘From Zero to Hero’ y tambe a felicita tur participante entrepreneur cu a termina e tayernan di ‘From Zero to Hero’ cu exito y a ricibi nan certificado. Minister Ruiz-Maduro a desea e entrepeurnan hopi exito cu e siguiente parti di ‘From Zero to Hero’.

Diabierna ultimo Guardian Group Fatum a organisa pa di tres biaha e Guardian Group Fatum Best in Business Award y Best Business Concept Award 2019.


Minister di Economia tabata e orador invita y a dirigi palabra na e nominadonan y invitadonan presente.


E mandatario ta aplaudi e iniciativa di Guardian Group Fatum pa reconoce companianan na Aruba pa nan liderazgo, strategia di negoshi, nan profesionalismo y resultadonan. Tabata tin 5 nominado pa e Best in Business Award, cualnan ta: SlipNot Solutions di sra. Sharona Lee-Schoop, Muscles and Lungs Crossfitness Aruba di Javier Erasmus y William Erasmus, Lindy Lifestyle Boutique di Alexlindy Croes, GRP Architects & Construction di Gershon Pocorni y Leila Pocorni, y Cornerstone Economics di Lay Hing de Kort-Yee y Rendell de Kort. E 3 nominado pa e Best in Business Concept Award tabata: Seamless Rain Cutters di Rodney Bareño,
Eco living Aruba di Daniel Barros, y OFLOW di Erwin Junior Ras.


E ganador di Best in Business Award 2019 a resulta GRP Architects & Construction. Y e ganador di Best Business Concept Award 2019 a bay pa Eco Living.


Minister Xiomara Maduro ta felicita e nominadonan y tambe e dos ganadornan y ta desea nan hopi exito pa nan negoshi por sigui florece y asina aporta na economia di Pais Aruba.

Siman pasa a tuma luga e 2nd German-Caribbean Energy Conference, como Minister di Economia Sra. Xiomara Maduro a hiba un discurso caminda na prome luga a gradici Ministerio Federal di Asunto Economico y Energia y e Camara di Comercio Aleman-Hulandes pa trece un grupo di entrepreneur y experto hunto na Aruba cu e meta pa por crea oportunidad pa negoshi cu nos entrepreneurs local y den region.


Den su discurso Minister Xiomara Maduro a enfoca riba locual Aruba por ofrece na inversionista y tambe a splica riba e sectornan prometedor den cual solucionnan pa energia renobabel y eficiente por hunga un rol importante. Ademas a splica riba e facultad di SISSTEM cu recientemente a keda estableci na Aruba pa asina por prove habilidad y conocemento atraves di centro di investigacion y laboratorio cu focus riba energia, technologia y enginieria sostenibel.
E mandatario ta gradici tur esnan presente na e conferencia pa nan interes genuino pa haci negoshi cu Aruba.

-- Despues di su logro un biaha mas como Campeon Mundial di Windsurfing y un biaha mas pone nomber di Aruba briya pa tur hende sa di unda e ta bin, Prome Minister Evelyn Wever-Croes, den nomber di Gobierno di Aruba, a presenta e Reconocimento di Excelencia na Sarah-Quita Offringa.


Sarah-Quita a bira pa di 17 biaha Campeon Mundial di Windsurfing. Un hoben cu ta un ehempel pa sigui pa cada mucha y hoben na Aruba. Un hoben cu a demostra cu ta cu empeño den bo meta, bo ta logra cosnan grandi.


Ta hopi importanta, Prome Minister a expresa, pa nos para keto na cualkier logro y sigur na e logro grandi recien di Sarah-Quita Offringa. Hopi sacrificio di Sarah-Quita y di su famia a bay na e logro aki. Cu e sacrificionan di e atleta hoben, e ta inspira nos muchanan y nos hobennan pa pone meta nan dilanti, kere den loke nan ta haci y traha duro y cu sosten di nan famia, nan ta logra sigur.


Mundialmente, Sarah-Quita ta den un ‘spotlight’. Ta algo hopi bunita pa wak e forma cu Sarah-Quita ta ricibi su premionan cu hopi humildad dunando di conoce cu ta di Aruba e ta. Y como gradicimento, Gobierno di Aruba a presenta e Reconocimento di Excelencia na Sarah-Quita Offringa gradiciendo e di curason pa laga Aruba briya hunto cu ne den su exito mundial.

​
Danki e Sarah-Quita y pabien cu bo titulo di Campeon Mundial di Windsurfing pa di 17 biaha.