Mi a haya mi mes ta scucha e locuranan di Mike Eman pasobra hopi hende a pidi mi pa scuch’e y pa trece mi pensamento riba esaki. Scucha Mike Eman ta mescos cu laba cabes di burico: bo ta perde awa, habon y mas importante tempo. Pero pa e biaha aki mi a dicidi di perde mi tempo pa scuch’e keriendo cu e lo trece speransa pa e pueblo pero e palabra cu e kier laga penetra den pueblo ta: “No ta normal”. Awel laga nos pone riba un lista kico no ta normal.


E lista di ‘No ta normal’
1. No ta normal pa endueda e pais aki sin misericordia y poniendo bao supervision financiero y hamas por a yega na un surplus, pero a redobla nos debe nacional te 4.2 biyon florin.
2. No ta normal pa crea debenan di 2 biyon na proyectonan PPP sin cu nunca bo a splica for di unda ta saca placa pa paga pa e proyectonan aki den e proximo 30 añanan.
3. No ta normal pa distribi mas di 900 miyon florin di placa di pueblo cu e gobierno di MEP a laga atras na 2009.
4. No ta normal pa masacra e aspecto social na Aruba.
5. No ta normal pa manda e pensioen te 65 aña.
6. No ta normal pa introduci e Middellooon regeling cu awe ora e pensionado baha cu pensioen e lo wak cuanto el a perde di su pensioen y ainda falta esnan cu falta hopi pa baha.
7. No ta normal pa kita e medida mas cruel di e AOV di pareha.
8. No ta normal pa laga Richard Arends masacra tur NV’s y tambe percura pa su mes un contracto lucrativo den RDA.
9. No ta normal pa laga haci negoshi formal cu tereno di pueblo haciendo amigonan miyonario y pueblo mas tristo pa paga e debe orguyosamente cu Mike Eman mes a crea.
10. No ta normal pa apoya tanto corupcion cu hasta un minister di Labor, Paul Croes a wordo condena y kende a sigui cobra su salario di ministro trankilmente den prison y esaki cu aprobacion di fraccion di AVP.
11. No ta normal cu a laga Aruba su nomber na berguensa den exterior den e caso di Citgo unda cu ta considera Aruba un paraiso di corupcion y unda cu Minister di Energia y Labor y consehero di AVP ta core den limosin y cera negoshi cu esnan cu awe ta cera pa corupcion.
12. No ta normal pa regala tereno di Aruba na e grupo di Citgo pa haci comercio aki na Aruba cu awe e grupo aki ta cera pa corupcion.
13. No ta normal cu un Promer Minister cu a gaña pueblo cu lo habri refineria y lo bin cu un pilar economico berde pa Aruba, a tuma un pueblo haci y kier papia di desaroyo economico cu kizas ta pa su persona y brothernan.
14. No ta normal cu un ex Promer Minister sin salario por biba den un Penthouse mientras pueblo cu hopi orguyo tin di paga e debe cu el a crea.


Nos por sigui yena e lista largo aki pero no tin lugar mas pa pone den corant. Pero un conclusion cu por saca ta cu Mike Eman no por ta normal di kere cu pueblo ta asina ingenuo di por ker’e, mientras cu tur desaster y sigur e debe monstruoso cu el a laga atras pa pueblo bay paga, esey pa mi no ta normal.

Siman cu a pasa maestronan a manifesta nan preocupacion na Promer Minister di Aruba Evelyn Wever-Croes y tambe na parlamento di Aruba. Mi por a scucha di e grupo di maestronan cu nan a bin pasobra nan ta preocupa pa cu enseñansa y kier mas claridad riba e maneho cu ta hibando y lo hiba den e temponan nos dilanti y alabes a manifesta varios otro asuntonan cu ta preocupa nan.


Atencion di Prome Minister
Mi ta contento con liher nos Promer Minister Evelyn Wever-Croes a atende cu representantenan di e grupo di maestronan. Sigur conociendo nos Promer Minister e lo haci su maximo esfuerso pa por move algun cos cu ta den su alcance, pero tur maestro mester ta consciente cu e minister di Enseñansa ta responsabel pa su cartera y tambe su maneho. Prome Minister hamas por para responsabel pa actonan di un otro minister.


Transparencia den maneho
Un punto cu a sobresali di e manifiesto ta e falta di transparencia y comunicacion. Nos tur sa cu nos no por sinta den stoel di un Minister cu na final pueblo lo tin di bira e huez na momento di eleccion of kizas ora cu parlamento den nomber di pueblo bisa ta basta. Nos tur sa cu mester bin cambio pero den mi pensamento e cambionan aki lo bay mas facil si traha hunto y si tur maestro por tin e oportunidad di prepara nan mes pa e cambio. Cambionan dianan prome cu scol cera, ora ora scol a cuminsa ta crea panico pasobra bo no ta prepara pa esakinan. Si tur cos cana planifica y cu tur hende ta na altura y tin suficiente tempo pa prepara, mi tin sigur cu cos lo cana diferente. Y alabes mi ta kere cu uso di experencia pa por mehora e cambionan cu e minister kier trece, lo haci e transicionnan mas facil y mas transparente.


Reunion di comision
Diaranson 18 di september Presidente di comision fiho di enseñansa a yama un reunion di comision di enseñansa unda a yama Minister Lampe pa e bin duna splicacion di su maneho. Mi ta kere kizas por a yama e reunion aki na momento cu mayoria miembro di e comision di enseñansa por tabata presente pasobra mayoria tabata den exterior incluyendo mi persona atendiendo un congreso di educacion di Parlatino. Y manera mi ta keda bisa cu e tipo di reunionnan aki di comision unda cu no tin entidadnan priva mester por ta publico, manera ta e caso na Hulanda, p’asina e maestronan cu ta esnan cu tin di traha cu e maneho di e minister por ta na altura y esaki lo garantisa transparencia. Na momento cu mi yega bek lo mi bay cerca coleganan cu a atende e reunion aki y nan por bisa mi kico ta e minister su maneho. Y di mi parti mi ta lamenta cu a yama e reunion aki y haciendo esaki e no ta trece trankilidad ni ta pone e docentenan na altura di e maneho cu e Minister lo hiba e proximo periodo nos dilanti.


Contesta di Presidente di Parlamento
Mi ta spera cu pronto e grupo aki lo por haya un contesta tambe di presidente di parlamento Juan (Ady) Thijsen riba e peticion di e grupo di maestronan. Nos di parlamento no por sinta den stoel di un minister, pero si nos por exigie pa por duna un maneho concreto y tambe den nos control cu no solamente ta financiero pero tambe percura pa tur minister cumpli y keda den e maneho duna na pueblo di cada ministerio. Y sigur un gobierno cu a firma un acuerdo
di gobernacion yama ‘Hunto pa Aruba’, nos di pueblo ta spera nan cumpli cu e parti hopi importante cu ta transparencia.

ARUBA TA HAYA TEMPO Y ESPACIO PA ATENDE CU TUR RETO


Conseho di Minister di Reino diabierna mainta a trata e tema di supervision financiero di Aruba. Prome cu e reunion Gobierno di Aruba a pidi tanto Parlamento di Aruba como Conseho di Minister di Reino tempo y espacio. Tempo y espacio pa cumpli cu e protocol cu menos presion, pa traha riba finansas publico duradero y pa traha riba un organo di supervision independiente. Mientras tanto lo sigui traha cu CAFT y e ley di LAFT, mientras ta prepara e organo di supervision independiente.


Gobierno a traves di Minister Plenipotenciario Guillfred Besaril a informa Conseho di Minister di Reino di e plannan y e leynan riba cual ta wordo traha awor pa logra esaki. Den su carta, Gobierno di Aruba a indica cu Gobierno tin e compromiso di saca Aruba for di e situacion financiero dificil y cu lo atene na e protocol. Ademas, Gobierno di Aruba a splica kico tur ta haciendo pa atende cu e tema financiero. Y e pasonan ta dunando resultado, pasobra IMF y Standard & Poors a duna Aruba un bon evaluacion, y ultimo Caft tambe a duna un bon evaluacion di e entrada y gastonan di Gobierno pa prome mita di 2019.


Aruba no a yega ainda caminda e mester ta, pero nos ta riba e bon rumbo.
E peticion aki di Gobierno di Aruba ta pa trece trankilidad pa Gobierno por atende cu e retonan financiero cu ta hopi grandi. E magnitud di e problemanan financiero causa pa e gobierno anterior, combina cu e impacto di e crisis di Venezuela, ta pone un presion enorme riba Gobierno di Aruba. No tin tempo awor pa discusionnan cu Parlamento of Conseho di Minister di Reino.


Conseho di Minister di Reino a bay di acuerdo cu e peticion di Gobierno di Aruba. Nan ta reconoce cu Aruba ta tumando pasonan grandi den e bon direccion. Nos no ta ainda caminda cu nos mester ta, pero nos ta riba e bon caminda. Por lo demas, riba nivel di Departamentonan di Gobierno, lo delibera riba e detayenan di e organo nobo di supervision.


Un KB, manera opositornan a bin ta anuncia ya pa lunanan, cu esaki a wordo evita. “Nos a purba tene cuenta cu e deseo di Parlamento pa regla e supervision financiero di acuerdo cu nos Constitucion, y cu preocupacion di Conseho di Minister di Reino, pero nos mester di mas tempo y espacio. Mi ta extende un invitacion na oponentenan pa bin para na banda di bienestar di nos pueblo, y no desea malo pa Aruba. Tampoco tin un crisis constitucional manera cu nan a insinua, nos ta haciendo locual constitucionalmente ta posibel y locual ta responsabel y bon pa Aruba. Gobierno di Aruba ta tratando di tene cuenta cu e
preocupacionnan di tanto Parlamento di Aruba, como di Conseho di Minister di Reino, y trece trankilidad bek”, Prome Minister Evelyn Wever-Croes a duna di conoce.

Diaranson mainta, 18 di februari, e proyecto ‘Good to Great’ pa hobennan di scolnan secundario a bay di bishita na Hilton Hotel. E Proyecto ‘Good to Great’ ta dirigi pa hobennan haya sa kico ta rekeri pa ta un profesional y asina na un edad jong enfoca riba cua carera nan kier scoge pa nan futuro. E biaha aki a toca turno un biaha mas na e studiantenan di Abraham de Veer School.
​

E Proyecto ‘Good to Great’ ta hopi bon hinca den otro y sigur ta yuda amplia e conocemento di nos studiantenan encuanto e posibel profesionnan cu nan por bay studia pe y ki ta e posibilidad pa trabou cu tin aki na Aruba. E proyecto ta financia pa Gabinete Wever-Croes y ta keda ditigi pa Señor Jalken Antonia y señora Terry Gumbs.


E proyecto a cuminsa aña pasa y e biaha aki e studiantenan di Abraham de Veer School a haya splicacion amplio di kico tur ta e trabounan cu ta tuma lugar na Hilton Hotel. Profesionalnan di diferente Departamento di Hilton Hotel a sinta cu e studiantenan pa dunanan splicacion over di nan trabou diario den Hilton Hotel, kico ta nan vision, mision y balornan. Alabes nan a enfoca riba nan carera profesional y a contesta tur pregunta cu e studiantenan tabatin.


Parlamentario Tromp-Lee durante e mainta aki a hiba un discurso cortico na e studiantenan caminda entre otro el a enfatisa cu den bida tur cos ta posibel, cu nan mester durf pa soña, pero na mes momento nan mester realisa cu nada ta bin cay for di cielo y cu nan mester traha duro pa haci tur nan soñonan bira realidad.


Alabes a haci uso di e oportunidad pa felicita e coordinadornan di proyecto y a gradici Abraham de Veer School y Hilton Hotel y su trahadornan pa a acepta pa participa na e proyecto aki. Sigur un proyecto cu ta dirigí na bienestar y progreso di cada studiante y cu a largo plazo lo beneficia Aruba tambe.


Na final di e programa, loke mas a resalta ta cu e studiantenan a expresa cu nan a siña for di e mainta na Hilton Hotel cu nan mester traha duro pa por progresa y a siña cu den un hotel tin diferente tipo di trabou cu por keda eherce. Mayoría di studiante a indica cu nan a siña cu tanten bo ta dispuesto pa duna mas di bo mes bo por yega hopi leu den e hotel. Sigur nan a cera conoci cu personanan cu por bira un role model pa nan y un fuente di inspiracion.

Diaranson, Prome Minister Evelyn Wever-Croes a reuni cu doñonan di fruteria cu ta preocupa cu ciere di frontera cu Venezuela. Manera conoci, dia 9 di september, Gobierno di Aruba a tuma e decision pa mantene frontera cu Venezuela cera y prolonga e ciere te cu dia 10 di december proximo.


Prome Minister Evelyn Wever-Croes a indica cu e motibo di e decision aki di Gobierno di Aruba ta pasobra e situacion di Venezuela ta sigui hopi serio y tambe Aruba ainda ta den e proceso pa trece e pasonan cu ta necesario pa nos por tin un miho control riba e fluho di persona.


E situacion na Venezuela, Prome Minister a indica, ta trece hopi preocupacion pa Gobierno. Gobierno ta sigui e desaroyonan y ta convivi cu e situacion dificil cu Venzuela ta enfrentando. Tambe Gobierno ta hopi preocupa pa e efecto cu esaki tin riba nos pais, cu sigur ta hopi grandi. Prome Minister a duna di conoce cu tambe tin e preocupacion di e costo enorme cu e stituacion ta trece cu n’e, debi specialmente cu Aruba no por importa fruta y berdura for di Venezuela cu e consecuencia cu e prijs pa fruta y berdura ta bira mas caro.


E peticion cu e doñonan di fruteria a trece cerca Prome Minister ta pa permiti importacion di fruta y berdura so un biaha pa siman for di Venezuela y bou condicionnan hopi estricto. E doñonan di fruteria ta garantisa cu prijs di fruta y berdura lo baha considerablemente si trece e productonan aki for di Venezuela.


“Nos lo evalua e peticion aki y lo tene na cuenta tur e beneficionan pero tambe e riesgonan cu esaki por trece cu ne. Pa mi y pa henter Gabinete Wever-Croes, e interes di comunidad ta na prome luga. Henter e tema di Venezuela ta un dilema constante na unda cu mester busca un balanse den kico ta e interes di pueblo y kico ta e riesgonan pa nos comunidad”, Prome Minister a duna di conoce.

Parlamentario Endy Croes a habri afor contra Parlamentarionan di AVP tanto Mervin Wyatt Ras, Marlon Sneek como Arthur Dowers kendenan despues di nan conferencia di prensa diamars ultimo na cas di partido AVP a sali pa aeropuerto, subi avion y a biaha pa Cuba. Segun Parlamentario Endy Croes net Mervin Wyatt Ras, kende durante dicho conferencia di prensa ey tabata acusa Gobierno di ta biaha demasiado y ta splica cu mester corta gasto den biahamento, su persona ta caba di splica prensa esey y ni 15 minuut despues e ta sinta den VIP room na airport cu su coleganan Dowers y Marlon Sneek pa subi avion y laga cay pa Cuba manera Serafina den jet. Parlamentario Endy Croes a sigui busca mas informacion y a resulta cu ta Parlatino nan a bay den Comision di Enseñanza cu lo bay trata e topico aki na Cuba.


Traha no, Biaha si
Parlamentario Endy Croes ta splica cu ningun di e 3 parlamentarionan aki nunca ta acudi na reunionnan di comision fiho di enseñanza na Aruba. Den 2 aña por a constata cu Dowers no a presenta ni na 1 solo den reunion di comision fiho y ta cobra tur fin di luna mescos cu esnan cu si ta traha duro tur ora. Den augustus tabata tin 3 reunion publico unda ningun parlamentario di AVP a presenta. Pues AVP tin un sindroma completamente robes y pues nan no ta gusta traha. Ta con Mervin Wyatt Ras, Dowers y Marlon Sneek por critica biahamento den conferencia di prensa pidiendo gobierno pa corta gasto den biahamento anto nan mes ta sali bay Cuba mesun dia riba custia di e pueblo aki? Si bo ta activo ainda cumpliendo cu pueblo y cumpliendo cu bo trabou na cas nos lo por compronde pero no un set di bagamundo di AVP cu a destrui e pais aki kendenan ainda ta keda probecha di nos sistema.


Biahamento cu casa
Anto colmo de los colmos tanto Marlon Sneek y Arhtur Dowers a biaha cu nan casa. Parlamentario Endy Croes no ta kere cu Marlon Sneek y Arthur Dowers por a logra manipula Parlamento su sistema pa asina Parlamento paga ticket pa nan casa pero en todo caso conociendo e historia di AVP pa cu corupcion den tereno, historia di nan colega Paul Croes, practicanan di Mike de Meza y Richard Arends y manipulacionnan di Mike Eman, Parlamentario Croes pa tur seguridad lo manda un email pa administratie y departamento financiero di Parlamento pa double check y confirma cu esaki no lo ta e caso. Como Parlamentario lamentablemente bo trabou normal ta controla gobierno pero desde cu historianan di sinberguensa di partido AVP a mira luz di dia awor Coalision mester controla oposicion (AVP) tambe como parti di nan trabou rutinario. Preveni ta mihor cu lamenta.

Minister Ruiz-Maduro ta refuta e noticia falso cu e Gobierno actual a hisa e debe di Pais Aruba di 4.1 biyon florin pa 4.9 biyon florin. E informacion aki no ta cuadra cu realidad e mandatario a enfatisa. Ningun gobierno por presta 800 miyon florin den dos aña di tempo. Si nos bay bek den historia Gabinete Oduber a presta 700 miyon florin den 8 aña. E debe di Aruba a ser redobla den 8 aña bou di e Gobernacion anterior. Durante aña 2009 pa aña 2017 e debe a subi cu 2 mil miyon. E debe actual ta 4.386 miyon florin y na ningun momento a yega 4.9 biyon florin .


Gabinete Wever-Croes ta haciendo esfuersonan grandi pa contene e debe pa asina por goberna nos Pais, e dignatario a subraya. Tur informacion relevante ta wordo publica debidamente asina recientemente Gobierno a publica e Uitvoeringsrapportage (URK) di e di dos kwartaal di 2019 den cual tin tur informacion financiero di e realisacion di Presupuesto di 2019 Pais Aruba. E mandatario a presenta esaki tambe den Parlamento.


​ Den e rapport aki tin tur informacion tocante di e debe y kico Gobierno ta haciendo pa stabilisa esaki. Por haya mas informacion tocante e URK via https://www.overheid.aw/actueel/rapporten-en-documenten_46868/rubriek/financieel-toezicht-supervision-financiero-financial-supervision_1708.html


Nos comunidad mester ta bon informa pa asina no bay tras di ‘fake news’. E Gobierno aki ta trahando serio y duro pa mehora e situacion financiero y economico di e Pais aki, e mandatario a termina bisando.

Ayera Conseho di Minister a haya un presentacion di Departamento di Estadistica CBS riba Censo 2020. Di 3 pa 13 di oktober CBS lo haci un prueba den cual lo aserca algun hogar pa asina haci un Censo piloto pa sigura cu tur cos ta funciona debidamente y Censo 2020 por ta exitoso. E meta di e censo ta pa nos por haya informacion di cuanto nos ta, ken nos ta y con nos ta biba na Aruba.


Full digital y lo midi sostenibilidad:
Pa promer biaha e Censo lo wordo haci completamente digital danki na Setar NV cu a yuda cu e tablets necesario pa haci e encuesta. Tur informacion lo wordo monitoria y procesa den tempo real. Censo 2020 lo tene cuenta tambe cu tur e metanan di sostenibilidad di Nacionnan Uni cu relata na e persona y su hogar. Ta trata aki di metanan nr 1 te cu 11, menos nr 2. Di e manera aki nos por haya un bista tambe con duradero Aruba ta desaroyando su mes.


Ban coopera pa un Censo 2020 exitoso:
Pa Censo 2020 por ta exitoso e participacion di Pueblo ta importante. Pesey e apelacion ta pa nos tur por coopera na momento cu nos wordo aserca pa encuestadornan y brinda nan e informacion necesario. E encuesta ta tuma mei ora y lo wordo haci pa encuestadornan debidamente prepara pa e trabou. E cooperacion di nos tur ta importante, pasobra Aruba ta conta riba bo

“Apesar di situacion financiero, Gobierno ta tuma pasonan serio pa haci inversionnan den enseñansa”


Den sala di Conseho di Minister, diamars merdia Prome Minister Evelyn Wever-Croes a reuni cu un delagacion di maestro pa delibera riba diferente punto di preocupacion di enseñansa cu ta biba cerca e maestronan. Na e reunion tawata presente tambe Simar y Seppa.


Manera ya conoci, diabierna atardi, Prome Minister a ricibi e manifesto di un grupo di maestro cu a presenta na Bestuurskantoor na unda cu nan a trece padilanti e preocupacionnan di e maestronan cu algun desaroyo di enseñansa y a haci e peticion pa no corta den enseñansa.
Prome Minister a splica e situacion financiero cu Gabinete Wever-Croes y Aruba a hereda cu a pone cu mester a tuma pasonan serio pa drecha e situacion pa despues haci e inversionnan necesario den enseñansa. E mandatario principal di nos pais a expresa e deseo cu ta biba den Gobierno di a haya e pais den miho circumstancianan. Sinembargo esaki no ta e realidad. E realidad ta cu Aruba a wordo laga atras den circumsatancianan penoso financieramente cu ta stroba cualkier Gobierno inverti den enseñansa manera mester ta.


Premier Wever-Croes a indica cu e realidad financiero di nos pais ta serio y cu mester tene cuenta cu n’e. Esaki, segun Prome Minister no tin un “easy way out” di e herencia financiero di gobierno anterior. Sinembargo, e bon noticia ta cu tin un “way out” si y Gobierno ta trahando riba esaki. Pa saca Aruba di e problemanan financiero y duna enseñansa e inversion cu e merece. Apesar di e situacion financiero, Aruba ta invirtiendo 5.7% di nos GDP na enseñansa. 17% di presupuesto di pais Aruba ta bay na enseñansa.


“E tabata un bon reunion, den ambiente di respet y al caso. Maestronan a trece padilanti e diferente puntonan di preocupacion. Nos a palabra cu lo mi atende e diferente puntonan cu coleganan Minister y bolbe bek na nan. Mi a ripiti mi respet y aprecio pa maestronan cu ta yuda nos den educacion di nos yiunan y asina forma nos futuro generacion. Nos meta ta pa unabes nos sali di e crisis financiero, inverti mas den enseñansa, den e maestronan y den innovacion den enseñansa”, Prome Minister Evelyn Wever-Croes a duna di conoce.

Un finansa publico saludabel ta e gasolin den e motor di nos economia. Esey ta e motibo di e enfoke principal di Gobierno pa yega na finansa publico duradero pa nos isla. E normanan den e ley di 2015 pa e supervision financiero no ta vigente mas. P’esey a traha e Memorando Financiero Economico 2018-2021, pa stipula e caminda pa yega na un maneho di finansa publico saludabel
Gobernador a bisa cu e Memorando aki tabata base pa un protocol nobo cu a negocia cu Hulanda na november 2018 caminda a stípula normanan pa e añanan 2019-2021 cu un surplus riba presupuesto di un mita porciento na 2020 y un porciento na 2021. Hunto cu Conseho di Minister di Reino ta buscando e alternativa con pa ancra esakinan den ley manera palabra.


Un di e instrumento cu Gobierno tin na su disposicion pa mehora e finansa publico, ta un reforma fiscal. Lo percura pa crea incentivonan tanto pa comercio local como internacional. Y pa cuminsa mester simplifica e sistema pa haci’e transparente, accesibel y mas husto.


Tambe Gobernador a subraya cu Fondo Monetario Internacional y agencianan di rating a haci un evaluacion e aña aki y a confirma e bon direccion di maneho nobo. E conclusionnan tabata “generalmente positivo”, debi na e implementacion progresivo di e reforma fiscal y e pasonan tuma pa stabilisa e trayecto di e debe nacional. Na mes momento, nan ta pidi atencion si tambe pa cierto aspectonan di finansa publico, pa motibo cu nos no ta ainda unda nos mester ta.