Segun Caft tambe, nos ta riba e bon caminda pa loke ta gasto y entradanan pa Gobierno Prome Minister Evelyn Wever-Croes tambe a reacciona cu satisfaccion riba e ultimo rapport di CAFT.


“CAFT ta bisa cu nos entrada y gastonan ta den linea cu e presupuesto di 2019, y cu ta premira cu nos lo logra cumpli cu e presupuesto. CAFT a duna algun punto di atencion cu lo mester wordo atende den e tempo nos dilanti, y nos ta sigui den deliberacion cu Hulanda riba esaki. Entre nan ta e pensamento di CAFT cu e Sociaal Crisis Plan no por ta den un presupuesto separa, sinembarg nos Gobierno a yega na otro palabracionnan cu Hulanda, y esaki ta pa registra henter e plan separa di e presupuesto di Gobierno, pasobra ta trata di un crisis plan pa un periodo defini. P’esey e ta separa, pasobra e ta temporal.
Mi ta satisfecho cu e relato aki, y cu CAFT ta realisa cu tin trabounan grandi cu a wordo haci caba te cu awor. Ta trabounan hopi grandi di Gobierno, combina cu sacrificionan aun mas grandi di pueblo di Aruba. E relato aki ta confirma cu, apesar cu nos no a yega ainda, nos ta riba e bon caminda. Ya caba IMF y Standard & Poors a indica cu Aruba ta financieramente riba bon caminda, e relato di e prome 6 lunanan di aña 2019 cu a wordo presenta na Parlamento, tambe ta indica esey y awor CAFT ta confirma esey. motibo pa ta satisfecho. Cu determinacion nos ta sigui traha pa crea e bienestar y progreso pa tur ciudadano”, Prome Minister Evelyn Wever-Croes a expresa.

Parlamentario Endy Croes a sigui desaroyo internacional alrespecto turismo di cerca y por a tuma nota di un “shift” hopi preocupante na Republica Dominicana primordialmente na Punta Cana. Turismo a cay den comparacion cu arrivals di 402.709 na juli 2018 pa 311.038 na juli 2019, esta 91.671 menos segun un rapport di Banco Central di Republica Dominicana di 29 di augustus ultimo. E caida significante aki a conduci cu entre otro e resort Majestic Elegance Punta Cana a cera su portanan entrante 15 di augustus ultimo.


Motibo pa e caida den turismo
Mester remarca cu Cuba tambe a conoce un caida di 23.6% den turismo. Punta Cana ta conoci pa un destinacion turistico y tin un inventario di 40 mil camber di hotel y ta habriendo e aña aki un adicional 4000 camber. Den luna di juni turismo a cay cu 7% cual tabata indicacion hopi preocupante pero esaki a cay cu 22.8% den luna di juli cual a bira alarmante. Segun fuente di informacion e rason primordial cu a causa esaki ta noticianan negativo den media specialmente media Norte Americano kendenan desde luna di mei tabata impulsa cu no ta “safe” pa keda den hotel na Republica Dominicana refiriendo na un lista di turistanan cu a fayece recientemente den hotelnan na Punta Cana na un manera misterioso. Booking di USA pa Republica Dominicana a cay cu 74% cual ta e gran causa di e resultado aki den su totalidad.


Turismo ta nos unico pilar economico
Parlamentario Endy Croes ta haci un yamada na henter nos comunidad. Turismo actualmente ta nos unico pilar y ta e galiña cu tin e webo di “oro” pa cu economia di Aruba. Parlamentario Croes ta splica cu el a relata e storia aki pa conscientisa tur pero tur hende cu ta biba aki pa realisa con vulnerabel un noticia negativo por refleha den un tempo record y cuanto daño e por ocasiona. Aruba ta ricibi mas di 70% di su turismo for di USA. Parlamentario Croes ta suplica tur sector cu ta atende cu turista desde hotel, taxi, restaurant, bus, tour operators y tur otro cu ta brinda servicio, empleadonan cu ta traha directamente cu turista y henter comunidad di Aruba pa aprecia locual cu nos tin y ban haci e compromiso mas profundo ainda pa brinda e hospitalidad den totalidad pa aporta pa nos turismo por sigui crece. No solamente nos mester keda percura pa turismo sigui crece pero siña di lesnan menos bon di nos competencia pa inculca den henter nos pueblo pa aprecia y cuida locual nos tin.


Ban sigui cuida nos turismo
Laga nos siña di locual por ehempel ta pasando na Republica Dominicana y Cuba cu ta nos competencianan hopi cerca. Ban conserva cu tur nos forsa cual ta nos turismo y cu nos curason na e lugar corecto percura pa brinda e mihor hospitalidad posibel na nos turistanan y bishitantenan. Croes ta termina bisando como politico hopi biaha kisas nos ta bringa nos opositornan riba diferente tereno pero den causanan grandi pa bienestar general di bo pais mester tin espacio pa nos tur mira hunto den e mesun direccion pa e causa colectivo di bo pais. Mi plegaria na henter pueblo di Aruba ban hunto ban cuida nos pilar esta nos turismo. Aruba dushi tera!

Prome Minister di Aruba a habri su conferencia di prensa dialuna mainta felicitando tur miembro di prensa riba Dia Internacional di Prensa.


“E tarea di un periodista pa tene comunidad informa tur momento no ta uno facil. Aruba ta un isla democratico na unda cu libertad di expresion ta un derecho fundamental di cada persona cu mester wordo trata cu hopi cautela. E poder di e derecho aki ta den man di cada un persona y mas nos cuid’e y proteh’e, mas tempo nos por haci uzo di dj’e.


Ta conoci cu cierto paisnan cu a abusa y maluza nan derecho di expresion a perde y esaki definitivamente ta algo cu pais Aruba lo kier evita. Ta hopi importante pa proteha e derecho aki y mi ta pidi encarecidamente pa cuid’e, protheh’e, defend’e y trat’e cu cautela p’asina por sigui informa comunidad miho cu ta posibel pasobra un comunidad bon informa ta un comunidad cu por tuma miho decisionnan.


Trabou di prensa no ta uno facil mirando cu nos ta un isla chikito y no ta tur ora ta di acuerdo cu noticianan cu ta wordo publica den prensa pero importante ta cu e noticia ta ser duna cu respet y transparencia pa e pueblo por wordo beneficia”, ta e mensahe di Prome Minister en conexion cu Dia Internacional di Prensa.

Na Centro di Bario Brazil a tuma luga e di 4 Bariofest. Bariofest ta un proyecto di Special Projects bou guia di señora Susanne Van Nes Sinjago y ta resorta directamente bou di Ministerio di Asuntonan Social. Cada biaha e ta crece mas. Pa nos pueblo, Cultura ta esencial y ta wordo sosteni semper. Special Projects ta duna oportunidad na pueblo pa nomina baluartenan, personanan cu a resalta den comunidad. Y durante Bariofest, e personanan aki ta wordo reconoci. Den nomber di Minister Glenbert F. Croes, Prome Minister a entrega certificadonan di reconocemento na 5 baluarte di Brazil: Angelo Richardson, Giandrick van den Berg, Luis Inario Maduro, Heintje Ras y Vicente Ras. Cada nominado a resalta den diferente area. Prome Minister, tur dia den e siman aki lo elabora riba un nomidadonan cuminsando awe cu Angelo Richardson.


Angelo Richardson a ricibi un homenahe pa su trabou incansable pa yuda esnan den necesidad. El a ser nomina como un persona cu ta haci hopi pa comunidad. Pa mas di 10 aña E ta percura pa comunidad. El a haci impacto den henter San Nicolas y Brazil.


Su proyectonan y logronan mas conoci ta e proyecto di tas di scol gratis; yuda muchanan special participa na Carnaval; bijles gratis pa muchanan den necesidad; organisa les di Karate gratis; organisa y brinda ayudo na adictonan ambulante door di ofrece nan cuminda; baño y corte di cabey; organisa workshop pa traha flie y competencia despues; ofrece su mes pa toca na grupo special como musicante; ofrece paña na esnan den necesidad; tur dialuna ta publica un corant pa districto di San Nicolaas cu tur sorto di informacion; y sin laga afo logra yega su propio fundacion (https://www.unityinthecommunityfoundation.com/).


Den nomber di Gobierno di Aruba y Minister Glenbert Croes, Prome Minister a felicita y gradici Angelo pa su curason grandi pa sirbi pueblo di Aruba.

Di 4 Bariofest rond Aruba y cada biaha ta crece mas


Diadomingo prome di September, Prome Minister a representa Minister Glenbert Croes na e Bariofest na Centro di Bario Brazil. Bariofest ta un proyecto di Special Projects bou guia di señora Susanne Van Nes Sinjago y ta resorta directamente bou di Ministerio di Asuntonan Social. Esaki ta e di 4 Bariofest cu a tuma luga rond di Aruba y cada biaha e ta crece mas. Pa nos pueblo, Cultura ta esencial y ta wordo sosteni semper.


Tawata un dia bou di un solo fuerte pero cu un ambiente alegre na unda cu Special Project y Comision Centro di Bario Brazil a uni pa haci e fiesta cultural na Brazil mas grandi. Reinanan cultural di Centro di Bario Brazil tawata presente canando rond pa atende e publico. Tawata presente tambe representantenan di Boneiro y Corsou. Nos muchanan e dia aki a gosa pa e tanto actividadnan cu tawata plania pa nan entre otro, contamento di storia di sr. Richard Dabian kende a sa di pone bida den su storianan di antaño. Tawata tin diferente weganan entre otro di IBISA cu ‘Bubble Soccer’. Tambe, e muchanan a gosa di mira e ekiponan di Polis, Brandweer y Kustwacht.


Entretenimiento tawata impresionante cu musica y baile tipico. Srta. Clarette Quandus a declama un bunita poesia. Tawata tin varios tentnan di cuminda criyoyo y artesania.


Prome Minister, compaña pa Miss Aruba 2019, Danna Garcia a haci un recorido y a bishita e tentnan y a saluda publico presente. Den nomber di Minister Glenbert F Croes, Prome Minister a entrega certificadonan di reconocemento na 5 baluarte di Brazil. Angelo Richardson, Giandrick van den Berg, Luis Inario Maduro, Heintje Ras y Vicente Ras. Den nomber di Aruba Prome Minister a gradici nan pa tur loke nan a haci y ta haciendo pa e Bario di Brazil como pa henter e comunidad Arubiano.
​
Na final, Aruba por a gosa di un bunita parada cultural colorido y yen di ambiente den barrio di Brazil.

Parlamentario Endy Croes ta splica cu e ta satisfecho con e reunion publico a desaroya su mes diabierna ultimo. Un reunion unda a trata geloofsbrieven y a debati alrespecto e engaño cu Richard Arends a comete basa riba un contracto miyonario di 2.6 Miyon florin cu RDA como Financieel Directeur cual e tabata tin bon scondi. Parlamentario Endy Croes ta lamenta cu pa di tres reunion publico consecutivo AVP no ta presenta den sala di Parlamento pa eherce nan trabou y Richard Arends a scoge pa keda sin presenta unda hustamente e tabata tin oportunidad pa splica Parlamento y aclaria cualkier inkietud.


Prome Minister bon documenta
E reunion tabata uno di un nivel hopi halto y sin insulta ningun hende a debati riba e problematica di Richard Arends, Mike de Meza, Mike Eman y RDA. Tanto den prome tanda pero tambe den segundo tanda Promer Minister Evelyn Wever Croes tabata amplio den su contestanan na Parlamento, bon documenta cu cifra y contractonan lucrativo cu Mike de Meza a reparti. Por a tuma nota tambe cu entre otro e contracto di casa di Donny Rasmijn esta Candy y un amante di Mike de Meza a haya den RDA. Nos lo bin bek un otro dia mas amplio riba esakinan.


Investigacionnan forensico
Ta bon pa remarca riba e pregunta di Parlamento na Promer Minister si tin investigacion ta tumando lugar y ki tempo esaki lo keda cla como cu pueblo eyfo hustamente a vota pa e cambio pero alabes pa e sinberguensanan manera Benny Sevinger y Mike de Meza entre otro wordo investiga. Promer Minister tabata fuerte y convincente den su contesta na Parlamento. A informa Parlamento cu tin “investigacionnan forensico andando y a base di esaki sigur tin mas hende ta bay, keremi. Mi no ta den libertad pa papia tur cos ainda pero sigur despues lo tin investigacion penal tambe”. Spera cu Ministerio Publico por actua rapido den e casonan fraudulento aki unda miyones di placa di pueblo di RDA a somenta den fiestanan y contractonan pa amigonan y amantenan.


Un clan di mafiosonan
Parlamentario Endy Croes a continua comparando AVP sinonimo na crimen organisa. Momento bo compara con mafiosonan ta deal y ta organisa bo ta conclui cu AVP ta un partido di un clan di mafiosonan cu bon estudio unda na un manera structura a horta un pueblo na un manera kisas limpi den nan pensamento. Danki na e cambio e cosnan aki a mira luz di dia. Danki na e cambio investigacionnan ta andando. Danki na e pueblo balente cu a scoge pa e cambio y Sinmiedo pa para e conducta di Crimen Organisa di e partido berde esta AVP.


Parlamentario Endy Croes ta haci un yamada na pueblo di Aruba cu ta pasando den momentonan dificil. Bou Liderazgo di Evelyn Wever Croes nos lo logra sali. Ban carga e pasenshi y perseverancia pero alabes haci e compromiso cu nunca pero nunca mas AVP mag di bolbe pa Aruba wordo salba pa nos futuro generacionnan.

Parlamentario Endy Croes a revela algun expresion cu Minister Presidente Evelyn Wever Croes a usa durante cu e tabata duna contesta na preguntanan cu Parlamento a haci diabierna ultimo durante e reunion unda a trata geloofsbrieven alrespecto Richard Arends. Richard Arends a wordo gara ta gaña y a sconde informacion di un contracto miyonario cu Richard Arends hunto cu Mike de Meza a firma acomodando Richard Arends cu un contracto como CFO esta Financiele Directeur di RDA na balor di 2.6 Miyon florin cu un salario di Afl. 22.375,- pa luna. Momento cu Richard Arends a wordo gescreen pa bira Minister 30 di november 2016 nunca el a bisa cu e tabata dispone di un contracto miyonario cu RDA y aki a gaña y sconde informacion.


Abusonan den RDA
Durante henter dia diabierna ultimo mayoria di e parlamentarionan di Coalicion a hiba nan disertacion den e reunion aki y a probecha pa haci masha hopi pregunta alrespecto e caso di Richard Arends y alabes a haci e pregunta cardinal kico lo haci pa algo asina nunca pero nunca mas ripiti. Durante e debate publico masha hopi abuso cu a tuma lugar den RDA a bin dilanti. Pues no ta solamente e abuso di e contracto miyonario di 2.6 miyon di Richard Arends pero tambe a pone masha hopi documento di RDA “ter inzage” riba peticion di Parlamento pa asina Parlamentarionan por ricibi nan contesta cu prueba esta cu feiten. Banda di Richard Arends, Parlamento a tuma nota di masha hopi abuso cu a tuma lugar den RDA. Contractonan na cantidad pa amigonan di Mike de Meza a bin riba mesa y mira luz di dia.


Mike de Meza por tin consenshi?
Un contracto cu a yama atencion por ehempel ta di un amigo di cas y right hand di Mike de Meza esta Arnold Le Grand. E cabayero aki a strica primeramente cientos di miles for di Lotto pa Deporte como miembro di bestuur y despues Mike de Meza a dun’e un contracto como IT na RDA unda el a cobra via un compania Afl.392.000,- florin plus Arnold Le Grand himself “op naam” tabata riba payroll cobrando Afl.20.000,- pa luna pa maneha 20 computer. Parlamento a compronde cu na maart e aña aki a logra retir’e for di RDA. Abusonan asina ta duna hende “berebere” di Mike de Meza y AVP. Mike de Meza por tin consenshi? Dieptriest! Mike de Meza y AVP ta ladronnan cu Diploma! P’esey Aruba ta awe unda nos ta.


Hopi puyito a sali for di macuto
Mesun Mike de Meza aki tabata Minister di Finansas 2009-2014. Asina por a tuma nota di un otro contracto di Patrick Paskel y Theragroup kendenan tambe a cobra Afl.450.000,- na promocion. Ki promocion RDA tabata tin mester den un corto tempo asina? Por a mira otro Afl.500.000,- cu Utilities a schiet voor RDA in oprichting anto e plaka aki entre otro Mike de Meza, Mike Eman, Richard Arends y Paul Croes a usa e fondonan aki pa biaha den avionnan priva pa cada rato bay negosha contracto di CITGO. Abuso di marca mayor. Asina Parlamentario Endy Croes a sigui splica cu ta hopi puyito a sali for di e macuto diabierna ultimo. Minister Presidente durante cu e tabata dunando contesta na Parlamento a expresa “Si Bo kier un gobierno corupto anto bo ta haya AVP bek pero si bo kier un gobierno drechi anto nunca mas AVP”. Parlamentario Endy Croes ta di mesun opinion. Pueblo mester por sa e berdad di e grado di sinberguenseria cu Mike Eman, Mike de Meza y AVP a comete cu
fondonan di e pueblo di RDA. P’esey enberdad pueblo nunca pero nunca mas mester cay den gara di AVP, Croes ta termina splicando.

Minister Dangui Oduber su maneho di salud publico ta dirigi riba prevencion. Esaki ta e unico forma cu por garantiza cu e fondo di AZV ta keda uno duradero y sostenibel. Hopi di nos no ta consciente cu Aruba ta un di e poco paisnan den henter mundo cu tin un aseguro medico general cu ta brinda cobertura pa den un pakete asina amplio.

E fondo di AZV ta continuamente bao presion, gastona ta keda subi, Aruba ta den vegrijzing y nos communidad no ta esun di mas saludabel.

Na e momentonan aki mas cu 70% di nos poblacion ta sobre peso di cual 36% di e 70% aki ta obeso. E cifranan aki ta alarmante y esaki ta conduci na varios consequencia pa nos salud manera malesanan cronico. Consequencianan cu esaki ta trece cune pa e fondo di AZV ta hopi. Actualmente 8 di cada 100 adulto nan Aruba ta diabetico. Door di e cosnumo halto di sucu cu tin na Aruba hopi persona ta cuminsa sufri di e malesa cronico diabetes y ta bira diabetico. Patientnan cu ta diabetico ta responsabel pa 19% di e gastonan total di AZV.

Nos comunidad mester bira hopi mas consciente di nan lifestyle, nan manera di biba, nan manera di come y nan manera di haci ehercicio.

Ta pesey gobierno y minister Dangui Oduber a pone den nan maneho prevencion den salud. Esaki ta e focus principal di e maneho di salud. Minister Dangui Oduber kier stimula participacion activo di nos comunidad den deporte y ta pesey ta invertiendo den areanan pa haci ehercicio. Por medio di fondonan di TPEF 2018 y 2019 a inverti den un bunita Proyecto na Malmok, esta e boardwalk. Actualmente e boardwalk Fase 1 ta den pleno construccion y e aña aki lo sigui cu fase 2. Meta di esaki ta pa comunidad tin un otro area pa haci ehercicio na un manera safe sin tin mester di preocupa cu nan por wordo alcansa pa auto den e area aki.

Tambe kier crea mas espacio na veldnan pa asina por cana y core. Un persona mester haci ehercicio tur dia por lo menos 30 minuut tur dia. Rond mundo dokternan ta bisa cu e miho remedi pa tur malesa ta haci ehercicio, ehercicio ta medicina.

Ta mi deber como minister encarga cu salud pa na un manera hopi agresivo informa y conscientiza comunidad pa pone atencion nan nan salud. Un comunidad saludabel ta contribui na un miho Aruba den tur sentido di palabra.
​
Minister Dangui Oduber a percura hunto cu tur stakeholder pa traha un Plana Nacional di Prevencion cu lo wordo implementa den aña 2020. Banda di esaki diferente fundacionnan lo yuda gobierno pa logra e meta tambe.

Durante e debatenan den Parlamento siman pasa Prome Minister a informa Parlamento cu for di informacionnan ricibi di e Director di Compania Arubiano di Petroleo CAP, di e proefboring Bon-Bini cu a tuma luga na juni aña pasa 2018, no a haya nada.


Na october 2018, despues di e resulatado negativo aki, Total a retira for di e consorsio cu Repsol y Repsol a keda pa 100% como e unico cu ta carga tur e riesgonan. Repsol a base di esaki a haci un peticion na Prome Minister pa duna nan un extension di 6 luna pa evalua tur resultado y gobierno a duna e extension di e fase aki te december 2019.


E ultimo perforacion a termina na juni 2019. Durante e periodo di extension nos dilanti Repsol lo sigui studia e resultadonan geologico y tecnico di e proefboring pa evalua e potencial petrolero di e area offshore na e parti Noord di Aruba. E resultado final di esaki, Prome Minister a indica cu e lo ricibi na december 2019 y lo por informa Parlamento cu mas detaye di e resultadonan obteni.


Repsol mientras tanto a sigui acerca otro companianan pa purba re-emplaza e rol di Total. Sin un of mas partner nobo, Repsol su so no por asumi e riesgo economico di otro proefboring. Te na e momentonan aki, Repsol no a logra haya un partner nobo.


Dia prome di october proximo, na Houston lo tin un asina yama Joint Review Committee meeting entre CAP y Repsol na unda lo haya mas informacion y decision tocante e siguiente pasonan cu lo mester wordo tuma.