​E siman aki a tuma luga e di dos German Energy Conference na Aruba na unda cu varios inversionista international hopi interesa den Aruba a participa. Esaki ta nifica desaroyo y oportunidadnan grandi y nobo pa Aruba. Durante siman, Prome Minister Evelyn Wever-Croes a reuni cu varios inversionista cu a participa na e conferencia.
 
Gobierno di Aruba aña pasa a wordo acerca pa Camara di Comercio di Alemania cu e peticion pa organisa un mision comercial na Aruba riba e tereno di energia. Esaki ta e di dos aña consecutivo cu nan ta bin cu un grupo grandi di inversionista cu interes den Aruba na unda cu nan por a intercambia cu nos inversionistanan local. Mas di 100 persona a asisti na e conferencia aki cu ta brinda oportunidad nobo pa Aruba riba tereno di economia y di energia.
 
“Camara di Comercio di Alemania a keda hopi contento y agradecido cu e sosten di Gobierno di Aruba pa e Conferencia di Energia y nan bishita na Aruba. Mi a reuni cu varios inversionista y varios idea hopi interesante pa Aruba a wordo discuti. Inversionistanan ta hopi interesa den Aruba. Esaki sin duda ta brinda Aruba desaroyo y oportunidadnan nobo”, Prome Minister Evelyn Wever-Croes a duna di conoce. 

Gobierno ta trahando pa baha gasto di personal. Den cuadro di esaki, Fondo Monetario Internacional (IMF) ta asisti Aruba cu un investigacion di e gastonan relata na personal conoci como 'wage bill.'


Den e periodo di dos siman IMF lo reuni cu diferente departamento di Gobierno y tambe instancia den sector priva pa asina por haya un bista di e gastonan di e aparato publico. Lo investiga e grandura y e dinamica di esaki pa indentifica kico ta locual ta crece e gastonan, haya bista den e compensacion y tambe den e trabou. Lo compara e aparato publico na esun di otro paisnan y tambe cu sector priva. Lo brinda un bista riba e maneho di e gastonan y lo indica e evolucion di e gastonan aki pa e añanan cu ta bin.


Na final IMF lo brinda un conseho na Gobierno riba e reformanan cu por tuma lugar pa asina por baha e gastonan relata na personal di e aparato publico.

​Recientemente Minister di Cultura den nomber di Gobierno di Aruba a brinda un reconocemento na sr. Robby Schouten pa su bunita trayectoria brindando informacion y tarima virtual na nos Arubianonan rond di mundo.
 
Robby atraves di su conocido programa y tour Leu fo'i Cas tabata Aruba su social media promer cu esaki tabata existi mes. Leu fo'i Cas a brinda tarima na, entre otro, studiante y artista biba den exterior pa nan por keda den contacto virtual cu famia y amistadnan na Aruba y tur e otro islanan.
 
Ken ta Robby Schouten? Robby a cuminsa traha na un edad di 17 aña. Su prome trabou tabata ora cu ESSO-Club a scohe Robby pa presenta un programa pa Hubentud di Aruba pa un periodo di un aña na Radio Antiana. E programa tabata yama “Lago Go Go cu Robby”. Refineria Lago a traha un stage grandi den cura di Radio Antiana na San Nicolas, unda bandanan live y cantenan di Aruba y di Antia Hulandes tabata duna un presentacion tur diadomingo merdia. Despues di esaki, cu 18 aña, Robby a bira e presentado mas hoben cu su propio show na Telearuba cu el a yama “Show di Robby”. E tempo ey caba Robby tabata presenta artistanan di Aruba y di e otro islanan di Antia Hulandes y di henter Caribe. Dos aña depues el a cuminsa cu su propio “Show di Robby” na Telecuraçao tambe, hunto cu un Boneriano Andres Coffie (d.f.m). Hunto nan a inventa y inicia e “Song Festival di Antia”.
E trayectoria y CV di Robby Schouten en berdad ta hopi largo. Robby tabata manager pa varios agrupacion y artista. El a promove artistanan procedente for di tur e islanan di Antia Hulandes, tanto den Reino como den Caribe y otro paisnan riba nivel internacional. Robby a biaha rond mundo y el a crea masha hopi trabou pa su mes y pa su empleadonan,
 
semper cu e meta di promove y yuda hende. Banda di su programanan na radio y television, Robby a cuminsa tambe cu su biahe y tournan den Europa, unda atrobe e ta duna oportunidad na nos hendenan di Caribe Hulandes pa bishita varios pais den Europa. Y via su programa di television e biahenan aki ta bira ‘E bentana pa nos por mira otro parti di mundo’.
Ta kende no conoce Robby su programa “Leu fo’i cas” for di 35 aña pasa te cu awor. Nos studiantenan cu tabata bay afo antes, ta via “Leu fo’i cas” nan ta laga nan famia mira con nan a yega Hulanda y manda saludo pa nan famia na Antia Hulandes e tempo ey. Robby ta e prome persona cu a duna nos hendenan e oportunidad di comunica cu otro virtualmente. En realidad Robby a cuminsa cu ‘social media’ prome cu ‘social media’ mes a cuminsa.
“Leu fo’i cas” tabata y te ainda ta nos ‘social media’. Via “Leu fo’i cas” nos por mira video di nos famianan ta keiro na Europa. Y te ainda nos famia- y studiantenan na Hulanda ta usa “Leu fo’i cas” pa manda saludo pa nan famianan na Aruba.
 
Banda di tur e cosnan cu Robby ‘a y ta’ haci, e ta conta nos cu Robby ta papia frances y aleman tambe, en total 6 idioma. Ademas Robby tabatin un temporada cu el hinka masha hopi tempo pa e siña papia e idioma Ruso. Robby tabata motor tambe tras di hopi talento di Aruba y Corsow y sigur a sa di brinda apoyo y guia na un gran artista sr. Tony Sherman cu e ta considera como un yiu. Pa e motibo aki tambe como sorpresa, Tony Sherman tabata invita pa forma parti di e reconocemento na Robby cantando e canticanan cu Robby mes a yuda compone.
 
Pronto e acto di reconocemento lo wordo transmiti via TeleAruba. Masha pabien Robby y danki pa tur e trabou bunita di mas di 50 aña.

​For di na momento cu Minister Ruiz-Maduro a asumi e tarea di Minister di Cultura un di su metanan tabata pa habri Museo Arkeologico Nacional di Aruba (MANA) bek ya cu e ta nos herencia cultural arkeologico.
 
Durante di ceremonia den un ambiente indígena a haci e reapertura MANA. E atardi a inicia cu Director ad interim sr. Pancho Geerman cu a hiba palabra. Despues a continua cu Teatro Experimental Contemporaneo Aruba di Departamento Di Cultura Aruba cu a presenta e ‘Perfomance’ Teatral titula: ‘Re- Descubri… Un Re-encuentro cu nos mes y cu nos naturalesa’ bou di direccion di Fatme Rigaud y Jhon Freddy T. Montoya. Nan a wordo acompaña cu: Musica:  Jair Britten. E actornan tabata Alex Berkley, Amanda Britten, Cayan Faraup y alumnonan di Maria College Mavo.
 
Minister di Cultura Sra. Xiomara Ruiz-Maduro den un discurso a relata e historia di desaroyo arkeologico na Aruba. Tambe a anuncia cu ta trahando riba un fundacion autonomo pa MANA. Alabes e mandatario a informa cu pronto Aruba tin un Maneho di Museo.
 
E acto di reapertura a ser efectua pa Gobernador di Aruba, Sr. Alfonso Boekhoudt hunto cu Minister di Cultura, Xiomara Ruiz-Maduro y asisti pa Director ad interim di MANA, Sr Pancho Geerman. Specialmente pa e reapertura di e exposicion permanente aki a traha un bebida alcoholico traha di dader ‘Daçato’ inspira pa nos antepasado indigena. E nomber Daçato’ ta un combinacion di e palabranan Caiquetio ‘Dato’ pa e dader y ‘Maçato’ pa un bebida alcoholico.
Na Aruba tin hopi tradicion y un di nan ta pa ‘basha betro pa e spirito’. Durante e acto di reapertura a honra e spirito di nos antepasadonan na momento cu nos Gobernador Sr. Alfonso Boekhoudt hunto cu Minister di Cultura Sra. Xiomara Ruiz-Maduro a basha e ‘‘Daçato’ cu tabata den un calbas pa e spiritonan di noa antepasadonan y asina simbolicamente haci e reapertura di e exposicion permanente di Museo Arkeologico Nacional di Aruba.
 
Despues arkeologo sr. Raymundo Dijkhoff a duna un guia den e sala di exposicion permanente na Gobernador di Aruba Sr. Alfonso Boekhoudt, Minister Presidente di Aruba Sra Evelina Wever-Croes, Minister di Cultura Sra Xiomara Ruiz-Maduro hunto cu otro Ministernan y miembronan di  Parlamento di Aruba cu tabata presente.
 
Invitadonan tambe por a haña un guia door di MANA, mientrastanto por a disfruta di un bunita cancion di e hobencita Amanda Perla. Despues a sigui un rato ameno cu musica harpa di Sr. Kelkboom, guitarista Ryan Maduro y musica indigena di Jair Britten.
 
Minister di Cultura ta yama un danki special na Tourism Product Enhancement Fund (TPEF) pa nan contribucion pa por a haci MANA operacional atrobe y ta invita pueblo henter y turistanan pa haci MANA un bishita.

Duna servicio di calidad ta e motivacion pa su dedicacion cu amor y pasenshi na su pais

Diaranson atardi, Prome Minister Evelyn Wever-Croes tawata tin e honor di a ricibi den sala di Conseho di Minister Director Suplemente di e Departamento BUVO, señora Leticia Evertsz. Prome Minister a invita señora Evertsz primeramente pa gradici’e pa su 30 aña den servicio di Gobierno y sirbiendo e comunidad di Aruba.
 
Señora Evertsz a drenta servicio di Gobierno prome di november 1989 na Luchthavens Dienst cu awo ta Aruba Airport Authorithy. Na aña 2007, señora Leticia a drenta den e Departamento di Informacion di Gobierno, BUVO. Y desde 2014, señora Leticia ta e Director Suplemente di BUVO.
 
Prome Minister a gradici señora Leticia Evertsz pa su dedicacion pa sirbi na Luchthavens Dienst, BUVO y pueblo en general cu sigur ta inspira su coleganan, famia y conocinan pa tin e mesun amor y pasenshi cu señora Leticia tawata tin durante 30 aña pa sirbi pueblo cu un curason habri pa duna informacion y yudansa. Prome Minister a felicita señora Leticia cu e siguransa cu ainda señora Leticia tin hopi mas tempo pa brinda e servicio na nos ciudadanonan cu e mesun amor y dedicacion.
 
Prome Minister a entrega e Landsbesluit na señora Leticia hunto cu algun detaye pa asina señora Leticia keda cu un bunita recuerdo di parti di Gobierno di Aruba di e fecha hopi importante aki.
 
Señora Leticia riba e pregunta kico a motiv’e keda asina tanto aña den servicio di Gobierno, a bisa cu como empleado publico, bo kier duna servicio na publico, pero un servicio di calidad pa asina contribui na e miho manera na e pais teniendo semper den curason cu e pueblo ta primordial. Y esaki a trece satisfaccion pa señora Leticia sigui brinda mas y miho servicio cada dia cu a pasa durante 30 aña y tur e añanan cu lo sigui.
 
Pabien señora Leticia!​

​Diabierna siman pasa, Vice President di Raad van State sr. Tom de Graaf tabata na Aruba. Señor de Graaf a tuma e oportunidad pa pasa saluda Ministernan di Gabinete Wever-Croes. Raad van State ta e instancia cu mester atende disputanan na nivel di Reino. 
 
Prome Minister Evelyn Wever-Croes a reuni cu señor de Graaf y a trata temanan importante cu ta regarda Reino y Aruba. Prome Minister a enfatisa na señor de Graaf riba e situacion financiero cu Gobierno di Aruba a hereda di un Gobierno anterior y e maneho di Gabinete Wever-Croes pa trece solucion pa pone nos pais bek riba e caminda di un finansa publico saludabel. 
 
Señor Tom de Graaf a keda hopi impresiona di e logronan grandi di Aruba y con poco poco pero sigur Gobierno di Aruba ta poniendo ordo den e problemanan financiero grandi di nos pais. Esaki ta debi tambe na e sacrificio di cada ciudadano di nos pais. Hunto nos ta logra engrandece nos pais bek y pone e ser humano central pa e progreso y prosperidad cu Aruba merece. 

​Diamars mainta Prome Minister Evelyn Wever-Croes tawata tin e honor di habri e di dos German Energy Conference cu un discurso enfatisando loke Gobierno di Aruba ta haciendo riba e tereno di energia.
 
Gobierno di Aruba aña pasa a wordo acerca pa Camara di Comercio di Alemania cu e peticion pa organisa un mision comercial na Aruba riba e tereno di energia. Esaki ta e di dos aña consecutivo cu nan ta bin cu un grupo grandi di inversionista cu interes den Aruba na unda cu nan por a intercambia cu nos inversionistanan local. Mas di 100 persona a asisti na e conferencia aki cu ta brinda oportunidad nobo pa Aruba riba tereno di economia y di energia.
 
Gobierno di Aruba ta trahando estrechamente cu stakeholders di sector publico pa defini metanan nobo di energia. Recientemente, tawata tin un Cumbre di Energia.
Meta principal di e cumbre aki tabata pa discuti e metanan nobo di energia pa Aruba. Gobierno di Aruba, desde cu el a sinta, a cuminsa recalibra su vision di energia. Hopi lihe a resulta cu e vision pa Aruba bira 100% independiente di fossil fuels no tabata wordo carga pa tur stakeholders, y tampoco tabata realistico na e momento.
 
Gobierno a haci un peticion na tur stakeholders pa alinea nan vision cu metanan cla, cu ta cumpli mas tanto posibel cu palabracionnan internacional, pero cu ta principalmente realistico y pagable pa e companianan, pa Gobierno y pa pueblo di Aruba.
 
Cu esaki tambe Aruba lo ta den mesun liña cu e Metanan (Mundial) pa Desaroyo Sostenibel, e asina yama “Sustainable Development Goals (SDG’s)” di Nacionnan Uni. Mas ainda, na e recien Assamblea General di Nacionnan Uni e topico di Cambio di Clima tabata na e top di e agenda. Un cantidad di pais a comete nan mes pa yuda combati cambio di clima door di reduci nan emisionnan. Aruba tambe tin intencion di bay comete su mes na metanan realistico.
 
Sector di energia ta importante, no solamente pa motibo di sostenibilidad, pero pasobra e ta afecta henter nos pais. Entre otro sector di energia ta impacta habilidad di nos hendenan pa por paga necesidadnan basico manera awa y coriente. Sector di energia ta afecta nos economia den su totalidad – e tin un impacto macro economico; riba inflacion, balansa di pago y reserva di devisas. Y sector di energia ta afecta nos medio ambiente y e tin impacto riba cambio di clima. Tur esaki lo tuma den consideracion pa desaroya e vision y maneho nobo di energia.
 
“Hunto cu stakeholders, Gobierno ta trahando pa desaroya e plannan nobo cu e obhetivo pa publica e vision y metanan di Gobierno na final di e aña aki y presenta e vision nobo di energia na Parlamento y na comunidad. Nos maneho di energia ta experimentado un reforma fundamental y nos sistema di energia lo ta mara na innovacion. Nos ta comprometi pa haci nos parti, awor comunidad internacional mester haci su parti”, Prome Minister Evelyn Wever-Croes a duna di conoce. 

​Diamars siman pasa, Prome Minister Evelyn Wever-Croes hunto cu Parlamentarionan Setty Christiaans-Yarzagaray y Shailiny Tromp-Lee, a presencia momento special na unda cu colega Amy Richards a defende su tesis pa obtene su Bachelor of Arts in Organization, Governance and Management, OGM na Universidad di Aruba.
 
Amy Richards ta un hende muhe conoci pa su determinacion pa bay dilanti tanto den su estudio como den tur loke e ta haci. Y awe, Amy ta recoge frutanan di su determinacion pa studia y a logra e bunita punto di un 9 pa su presentacion pa asina gradua despues di 4 aña studiando na Universidad di Aruba.
 
Prome Minister ta felicita Amy pa e logro aki y ta dese’e exito den e siguiente etapa di su bida. Pabien Amy. 

Diadomingo anochi Minister di Cultura tabata presente na Kas Ariba cu tabata un placer y honor pa brinda un reconocemento na sr. Gabriel 'Ale' Werleman pa su bunita esfuerso di 65 aña deleitando cu su musica di Caha di Orgel 'El Negrito Maldito.'. Ademas e mandatario tabata tin e honor pa para madrina di e bautismo di e cd di musica di Cah'i Orgel 'El Negrito Maldito' di Ale Werleman tabata un anochi hopi ameno y bunita caminda esnan presente por a disfruta di presentacion di varios Caha di Orgel, Grupo di Baile, Reinanan Cultural, declamacion di Poesia. Minister Xiomara Ruiz-maduro ta desea Ale hopi pabien y cu nos bon Dios por brinda Ale hopi salud pa keda conserva nos cultura.
​

​Siman pasa na Biblioteca Nacional Aruba, Fundacion Bon Nochi Drumi Dushi a presenta e buki “Superheroe di Storia”. Superheroe di Storia ta un buki skirbi pa 10 mucha di edadnan entre 5 pa 7 aña. Prome Minister Evelyn Wever-Croes a keda masha impresiona cu e talento cu nos muchanan tin y realisa nan soño den un bunita obra. Prome Minister a ricibi un copia di e buki for di e Super escritornan y a pidi nan pa firma esaki pa asina e por keda cu un bunita recuerdo di nan.

 
Prome Minister ta gradici Fundacion Bon Nochi Drumi Dushi pa e bunita proyecto di yuda nos muchanan lesa miho y encurasha nan pa ta escritornan di nan mesun pensamento. Alabes, Prome Minister ta encurasha tur mayor pa stimula nan yiunan for di un edad tempran caba di nan bida pa lesa buki.
​
 
“Lesamento ta habri un mundo grandi pa nan, y por ta un fuente di inspiracion y aventura pa nan. No tin regalo mas bunita cu esey, Prome Minister Evelyn Wever-Croes a expresa.