Durante conferencia di prensa di siman pasa, Parlamentario Sue-Ann Ras a elabora riba e intrankilidad y incertidumbre cu e docentenan, e muchanan y e mayornan ta pasando den dje pa loke ta trata SPO (Special Praktisch Onderwijs). Den e documento fundamental: Adviesnota Praktijk Onderwijs Op Aruba September 2017, ta poni cu tin dos SPO riba mesun linea, pero na dos diferente localidad. Tambe ta bon pa aclarea, cu e edificio nobo na Brasil ta traha pa un capacidad maximo di 145 alumno.


CURICULO NOBO
Enseñansa ta keda e fundeshi principal di un pais y p’esey mes mester trat’e cu tur seriedad, transparencia y responsabilidad, sin laga e stakeholders principal afor, esta e docentenan. E realidad tabata, cu SPO tabata draai cu un curiculo a base di loke e docentenan mes a crea, experiencia y analisa den transcurso di aña. Pa loke ta trata e ‘inhoudelijke vernieuwing’ lo tin su impacto riba ful e organisacion y e facilidadnan necesario. E necesidad pa amplia e cantidad di aña di estudio di 3 pa 4, sigur ta uno hopi crucial, specialmente si nos confronta e realidad cu ta trata di mucha di 15-16 aña. Tur aña ta traha bezetting y ta manda e contenido di curiculo pa Departamento di Enseñansa pa nan sa. “No por descarta niun momento, e experiencia y experticio di e docentenan envolvi, specialmente si ta presenta un curiculo, cu niun hende sa di unda el a bin, ken ta e actornan, con a yega na dje, etc. Esaki ta loke ta trece incertidumbre y speculacion innecesario. Paso mi mes a manda Minister Lampe pregunta relaciona cu esaki dia 5 di juni 2019 (mira adhunto) y te ainda mi no a haya contesta. Mas cu claro, anuncia cu tin un curiculo nobo y e docentenan en cuestion mes no sa nada, bo ta provoca un situacion desagradabel y kisas sin tin mester”, Ras a cuminsa na splica.


FUSERING SANTA CRUZ Y BRASIL
Nos ta yegando fin di aña escolar y mientras cu e edificio nobo na Brasil a keda cla y e muchanan di pariba a muda eynan, preocupacion ta keda riba mesa, si SPO Sta. Cruz tambe ta join. E edificio no ta traha pa acapara tanto alumno, ya cu SPO Savaneta tin 144 alumno y Sta Cruz tin 133 alumno. “Si cada scol tin un promedio di 30-40 alumno cu ta gradua y actualmente tin como 90 alumno nobo pa drenta SPO, mi no ta compronde con por sikiera pensa pa fuseer. Simpelmente nos ta creando un problema, unda no tin mester. Nos sa cu e alumnonan aki tin mas reto y no ta nada consehabel ni saludabel pa pone tanto alumno cu reto den otro y nos tin experiencia di pasado cu nos mester tene bon na cuenta, ora cu nos kier aplica e pensamento di hinca ‘scol chikito den scol grandi’, Ras a sigui bisa. Y ainda mester duna atencion urgente cu e edificio nobo aki, no tin ni gymzaal tampoco ‘green house’, unda cu e alumnonan mester ehecuta e practicanan fundamental.
Ras a indica tambe cu ta recientemente, dia 11 di juni 2019 el a haya contesta riba pregunta cu el a haci na Minister dia 1 di februari 2019 (mira adhunto) y esaki tambe di lamenta. Finalmente Ras a haci un apelacion atrobe na Minister Lampe, pa aclarea e dudanan aki, specialmente mirando cu nos ta yegando na fin di aña escolar y ta inaceptabel pa e alumnonan, e docentenan y e mayornan no tin claridad riba kico lo pasa pa e aña escolar nobo.

Parlamentario Endy Croes ta bastante indigna cu e situacion di Lotto pa Deporte. Kico a tuma lugar exactamente? Despues di eleccion di september 2017 pa ta exacto un luna despues esta 17 di october 2017 Directiva di Lotto pa Deporte yena cu activistanan di AVP entre otro Silvio Janga, Eli Kock, Taxista Antonio Kamperveen, casa di ex Parlamentario Desiree Croes esta Benvinda Da Sousa, Flavio Faneyte un hefe na Elmar ta esnan cu a acudi na Notaris Yarzagaray y asina a cambia e contexto di Statuut di Lotto cual a wordo funda cu un bon intencion desde 1982. E burdugonan aki riba menciona a percura pa cambia historia di Lotto. Normalmente un miembro di Bestuur por bay maximo 2 periodo di 4 aña y despues no por ta eligibel mas. Wel tur e miembronan aki kendenan ta ambicioso na placa tin mas di 9 aña bayendo pa di 10 aña den bestuur. Algo increibel.


Veredicto den bodem procedure
Desde cu nan a haci e cambio y a bay un kortgeding contra Minister Dangui Oduber, na januari 2018 Hues den kortgeding a duna nan rason pa keda. No a huzganan riba corupcion y dealnan entre nan cu placa di Lotto pasobra esey lo bira un otro caso den futuro pero solamente a huzga e proceso cu no por a saca nan na e manera cu esaki a bay como cu Statuut a wordo cambia hustamente pa proteha nan y nan keda wheel and deal den Lotto. Diaranson awor sinembargo lo bay tin un veredicto den un bodem procedure unda Hues lo bay mira esaki mucho mas profundo. Parlamentario Endy Croes a splica cu e no ta mira cu e Directiva corupto actual tin pia pa para ariba. No obstante cu tin masha hopi manteca riba nan cabes cual lo bira un otro caso nan no por keda sinta.


Preguntanan sin haya contesta
Figurabo cu Parlamento di Aruba haciendo uzo di nan derecho den Staatsregeling y Reglement van Orde a manda mas di 30 pregunta pa Lotto. E preguntanan aki a sali oficialmente di Parlamento bay pa e Minister encarga kende na su turno ta manda nan pa Lotto pa asina e por haya contesta y Minister na su turno ta manda e contestanan bek pa Parlamento unda TUR Fraccion ta ricibi esakinan. Tur compania estatal di gobierno a contesta Parlamento decente riba tur pregunta cu a wordo haci. Pueblo, imagina bo cu Lotto a contesta Minister, pa Minister mes contesta Parlamento e preguntanan aki. Con un Minister por contesta si e no tin acceso? Tristo, pero esaki nos ta bibando den 2019.


Deporte ta sufriendo
Mientras tanto Deporte ta sangrando y no por cumpli cu un maneho coherente di gobierno pasobra contacto entre e coruptonan di Lotto y Minister ta 0. No tin comunicacion y ora Minister purba comunica nan ta bis’e cu bo no tin nada di bisa nos. Parlamentario Endy Croes ta sigui splica cu e ta kere den democracia y ta kere den nos sistema hudicial y ta spera cu e siman aki lo cay un veredicto na fabor di pueblo y asina por ehecuta un vision cu a bay campaña cu ne riba e tema deportivo. Parkenan deportivo ta sufriendo y e ayudo no ta yegando. Ta invita comunidad bay mira Joe Laveist Sportpark y Jaburibari. Un tristesa. Puntra deportistanan con nan ta sufri promer cu haya un cachi cachi. Mientras abogadonan y E&Y a strica 3 MIYON na investigacionnan innecesario. Ainda amigonan abogado ta stricando placa di Lotto mientras deportistanan ta para band’i caminda ta bende rifa.


Siman decisivo pa Lotto
Un grupo di activistanan di AVP di mentenan putri cu no ta sirbiendo ni Lotto tampoco deporte y nos atletanan cu net net nada. Parlamentario Endy Croes splicando nos a drenta e siman grandi unda finalmente lo pone un punto final na corupcion interno den Lotto door di un set di activistanan di AVP kendenan ainda ta den poder gelijm riba un stoel cu un cara di coco y sinberguensa. Nos lo bin fuerte e siman aki riba Lotto premirando cu esnan cu a secuestra Lotto nan dianan ta conta y prepara boso “chan” pa investigacion cual sigur mester bin Croes ta termina splicando.

Otro aña por cuminsa cu 'aangifte' electronico
Pa hopi aña tin un proceso di digitalisacion tumando lugar na Servicio di Impuesto DIMP. Den Presupuesto di Pais Aruba pa 2018 a aloca un suma extra pa asina DIMP por agilisa e proceso di digitalisacion. Varios cambio a wordo introduci y ta premira cu otro aña ta asina leu cu Pueblo lo por haci su 'aangifte' via electronico.


Durante e reunion e Directora hunto cu mas ehecutivo di DIMP y representante di e compania Gravity cu ta asesora e departamento gubernamental di DIMP, a brinda un splicacion di e trabounan cu ya a keda cla y cual trabounan ainda ta pendiente. Hunto cu e proceso di digitalisacion ta trahando pa por caba cu e retraso cu tin. Asina ta procesa den 2019, e informacion fiscal di aña 2015 y 2016, y den 2020 lo procesa 2017 y 2018. Esaki ta importante pasobra asina Pueblo no mester bay warda largo mas pa haya restitucion.


Na e momento aki DIMP ta den e proceso di transicion pa pasa di e sistema bieu pa esun nobo cu tambe ta den funcion caba. Na september awo e transicion lo keda finalisa y di e manera aki ta bay alivia e situacion na unda cu foutnan den cobransa por pasa pa olvido. Cu e cambio aki tambe na november proximo ta bira posibel pa haci entrega electronico di e cobransanan di impuesto cu ta ser cobra pa luna y finalmente na mitar di aña 2020 ta premira cu por bay over na haci 'aangifte' di tur otro impuesto via electronico.

Minister Ruiz-Maduro ta informa:
Gobierno a bay over na usa un otro metodo pa calcula prijs di benta di gasoline na Aruba
Conforme acuerdo cu RDA prijs di gasoline pa luna di juni no ta subi

Ta usa otro metodo pa calcula prijs
Gobierno a bay over na usa un otro metodo pa calcula e prijs di benta di gasoline na Aruba saliendo for di e prijs riba factura cu RDA a paga pa e compra di gasoline teniendo na cuenta tambe reserva cu tin di e producto den tanki. Pa largo tempo Gobierno a haci uso di e plataforma Platts pa calcula e prijs di producto petrolero basa riba un promedio di cual tabata e benta di e productonan aki riba e mercado internacional teniendo na cuenta un luna di retraso den dicho informacion. Como cu RDA ta un compania di Gobierno di Aruba, a presenta e posibilidad pa yega na e factura di locual realmente ta wordo paga pa compra di gasoline y a base di esaki stipula e prijs di benta di gasoline pa publico. Antes ora cu e compra y abastecimento di producto petrolero tabata den man di multinacionals na Aruba, e informacion aki no tabata disponibel pa Departamento Economico na unda ta haci e calculo di prijs. Pesey pa largo tempo a recuri na e informacion cu Platts ta ofrece pa por a stipula e prijs di benta di producto petrolero na publico.


Ta absorba subida di periodo di transicion
Pa e periodo di transicion Gobierno a yega na un acuerdo cu RDA cu lo absorba gran parti di e subida grandi cu tabata tumando lugar na e momento ey y esaki a traduci su mes den un subida di 11,8 cent den luna di mei 2019 cu mester conta como un subida total pa e lunanan di april, mei y juni pa cual RDA a cumpra y tin reserva di gasoline. Si no a haci e cambio di metodo y e areglo transitorio aki, Pueblo lo mester a conoce subida di prijs di gasoline den luna di april di 16 cent, subida di 13,9 cent den mei y un subida di 7,6 cent den juni. Cu e cambio aki Gobierno a percura pa trece tiki alivio den cartera di Pueblo.


Beneficio di e metodo nobo ta menos fluctuacion den prijs
Cu e manera di calcula prijs via e factura cu ta mustra kico realmente RDA a paga pa compra di gasoline riba mercado y teniendo na cuenta e prijs cu a ser paga pa e gasoline cu tin den reserva den tanki, ta spera di por yega na un prijs cu ta fluctua menos cu e prijs cu ta wordo stipula a base di e anotacion di Platts manera cu pa largo tempo a wordo haci pa Departamento Economico di Aruba.


Prijs di gasolin den juni ta mas abou cu e rebaho segun Platts
Riba e plataforma di Platts nos por mira cu prijs di gasoline a baha den luna di juni, pero asina mes cu den juni no a conoce rebaho di prijs, e calculo nobo a ofrece un prijs hopi mas abou y Pueblo a ricibi un alivio hopi mas grandi cu si mester a usa e prijs rebaha di Platts.

Diabierna ultimo Minister Ruiz-Maduro a entrega certificado na 34 participante di e tayer di “Silver Entrepeurship ” organisa pa IDEA cu ta un seccion di Departamento di Asuntonan Economico. E idea pa organisa e tayer “Silver Entrepeneurship Workshop” a bin di Minister Ruiz-Maduro cu a pidi IDEA pa traha riba un tayer special pa e personanan cu ta yegando e edad di pensioen of tin e edad di pensioen caba y cu kier cuminsa cu nan mesun negoshi. IDEA a hinca e tayer aki den otro y e siman tras di lomba a concretisa e idea aki den un tayer hopi informativo y na un forma gratuito na un grupo grandi di pensionado cu a mustra interes pa cuminsa cu nan mesun negoshi.


Estudionan ta indica cu dor di e avance den mundo di medicina, awendia un persona tin un averahe di 20 aña mas di bida desde e edad di pensioen. Ta un trend mundial cu e grupo di hendenan aki a base di nan conocemento, experienca y network ta cuminsa cu un negoshi na momento cu nan bay cu pensioen. Aruba ta conta cu hopi profesional cu ta bay cu pensioen y ta importante pa comunidad por sigi conta cu nan experticio y experiencia di un manera of otro segun e vitalidad di cada persona.


E tayer a trata diferente tema necesario pa por haya un bon conocimento empresarial manera: e mindset cu mester tin pa habri un negoshi, proceduranan pa habri e tipo di negoshi cu bo ta desea y proceduranan pa si ta bay tuma empleado den servicio. Tambe a trata topiconan di impuesto, mercadeo, aspectonan bancario y inovacion.


E mandatario ta remarca cu generalmente e grupo aki tin mas conocemento, experiencia y ‘netwerk’ pa por ta exitoso. Pa e motibo ey e tayer aki ta net e ‘push’ pa nan start nan mesun negoshi.
Minister Ruiz-Maduro a enfatisa cu Gobierno ta stimula negoshinan chiquito y mediano, cu ta wes’i lomba di nos economia, pa asina contribui na un desaroyo fuerte y solido na economia di nos Pais Aruba, y den esaki e presencia di negoshinan maneha pa personanan cu mas edad, experiencia di bida, experticio di trabou y netwerk amplio tin tur ingrediente pa ta exitoso.


Na final e mandatario a gradici tur ehecutivo di IDEA, Departamento di Asuntonan Economico, e facilitadornan y e participantenan pa a haci e tayer aki un exito. Un palabra di gratitud ta bay tambe na e partnernan Action Coach, SDG, Trampolin pa Trabou, Johnson Notary Services, Benny Richardson, Best Buy Realty Aruba, SVB, Ginger Aruba Rosken, RBC, Futura, Merril Robles, Santa Rosa, Accura Tax Consultancy, Invest Secure y Setar cu a haci e tayer aki uno exitoso.


Minister Ruiz-Maduro ta desea tur participante di e tayer “Silver Entrepeneurship” hopi exito cu nan futuro negoshi y ta pidi pa keda pendiente pa e proximo tayer yena cu informacion balioso.

E siman aki sra. Sharine Geerman den presencia di su famia y colega hefe di departamento a recorda su 30 aña di servicio den Gobierno di Aruba. Durante un rato ameno na bureau di Minister di Finansa, Asuntonan Economico y Cultura, sra. Sharine Geerman a ricibi su decreto gubernamental corespondiente y un regalo chikito pa conmemora e fecha special aki for di Minister sra. Xiomara Ruiz-Maduro.


E mandatario a gradici Sra. Sharine pa e lealtad demostra na e servicio publico di nos Pais y a gradici Sharine pa su esfuerso y trabou di tur dia na Departamento di Impuesto. 'Masha pabien sra. Sharine Geerman y nos ta spera di por conta cu hopi aña mas di bo trabou dedica,' tabata palabra di gratitud expresa pa Minister Ruiz-Maduro.

Parlamentario Endy Croes desde algun tempo a bini ta papia riba Ley di AZV y ta amplia cu den 2019 cosnan grandi mester bay pasa. Un di nan ta trece cambionan den Ley di AZV pa por garantisa su existencia. Actualmente ta ahusta Ley di BAZV pa trece mas fondo pa AZV y baha e Landsbijdrage di gobierno pero si no tin un control di e gastonan esaki ta mescos cu ta carga awa hiba lama. Ta un secreto publico cu gastonan di AZV ta casi inpagabel.


Sostenibilidad di AZV
Parlamentarionan di Fraccion di MEP a haci un bishita na AZV y a reuni cu Directie y a trece nan puntonan di preocupacion dilanti. Mesun momento AZV a splica di a contracta un compania Hulandes pa haci un ‘indept forecast study’ pa asina por haci ahustenan necesario pa garantisa e sostenibilidad di AZV. Parlamentario Endy Croes ta di opinion, en espera di e rapport aki cual lo wordo entrega na augustus proximo, Parlamento lo sigui cu preparacionnan di cambionan necesario. Un ehempel ta un rentenier, esta un hende cu bin cumpra un cas na Aruba di cierto balor por aplica mesora pa un verblijfsvergunning y lo haya derecho riba AZV manera e inscribi na CENSO. Un empleado cu bin di exterior manera e inscribi na CENSO ta haya derecho riba AZV. Otro paisnan no tin esaki y Aruba por bisa ta unico cu un modelo asina. Ora un yiu di nos bay studia mes na Merca of Europa nos mester cumpra un seguro ekivalente na exigencia di Ley di e Pais pa nan por wordo acepta na school y ora bo bay biba den exterior ta mescos.


Crecemento den gastonan di cuido
Pues ta pensando seriamente pa cambia e Ley di tal manera cu un empleado mester cumpra su seguro medico kisas pa su promer 5 permisonan. Den e cuadro aki lo busca un balance comparando modelonan di otro paisnan y haci un ahuste y cambio den Ley beneficioso pa garantisa sostenibilidad di AZV. AZV a paga na aña 2010 un suma di 330 MIYON florin na cuido y Gobierno a aporta cu 130 MIYON di Landsbijdrage. Despues a introduci BAZV pa baha e Landsbijdrage. Na aña 2017 no obstante cu a introduci BAZV no a percura pa haci ahustenan necesario pa controla crecemento den gastonan di cuido. Asina mester bisa cu den cuido esaki a surpasa 400 miyon den 2017 cu ta un aumento di mas di 80 miyon den comparacion cu 2010. Pues si extrapola e gastonan aki y “para wak” sin haci nada esaki lo por surpasa 500 MIYON pa 2025. Ken lo mester paga pe?


Mester yega na un modelo sostenibel
Hisa e BAZV atrobe sigur no ta e solucion. AZV por ehempel ta paga rond 190 MIYON pa aña na servicionan na Hospital “Opname en Verpleging”, cuido den exterior entre 55-60 miyon pa aña, Geneesmiddelen 55 miyon, Huisartsen 24 miyon, specialista 18 miyon, laboratorio 27 miyon, Imsan 27 miyon, Dentista 10 miyon, Fysiotherapie 5.5 miyon pa nombra algun di e gastonan di mas grandi di AZV den zorg. Ta bon pa compara gastonan medico cu otro modelonan den region y yega na un modelo sostenibel sin mester mishi cu e calidad di e cuido. Pronto lo habri decisionnan cu Ministernan envolvi y demas partnernan pa por tin un consensus riba cambionan den Ley pa por garantisa existencia di AZV, Parlamentario Endy Croes ta termina bisando.

Parlamentario Endy Croes a reacciona riba Mike de Meza riba algun declaracion cu el a haci alrespecto nos Promer Minister. Manera Parlamentario Endy Croes a splica desde inicio manera el a drenta Parlamento cu e lo no laga nada pero nada for di sla pasa y lo contraaresta tur tipo di manipulacion primordialmente di politiconan di AVP kendenan a desgracia e pais aki social y financieramente creando un Mega Debe. Mike de Meza ta un ehempel bibo di un “choller” politico. E no ta yega trabao nunca cu excepcion ora tin un reunion publico “hay veces” pero si ta cobra un salario “volle pond” di pueblo di Aruba. Pues e no tin cuero di cara y berguensa a caba pero ta sigui abusa y ohala nos por logra cambia e ley aki pa ‘no work no pay’ pa Parlamentarionan abusador manera Mike de Meza y otronan di AVP.


Mike de Meza kier ple sabi awor
Recientemente Mike de Meza a cuestiona Minister President sra. Evelyn Wever Croes riba un declaracion cu a wordo duna den exterior alrespecto cu Aruba lo ta cay poco pafor di e hurricane belt. Mike de Meza awor kier bira meneer di school di aardrijkskunde? Mike de Meza a bin cu ful un splicacion cu Aruba ta cay parti zuid di e hurricane belt y kier cuestiona Minister President riba esaki kende a expresa poco pafor di hurricane belt. Esaki ta masha importante pa Mike de Meza kende no a logra net net nada pa pais Aruba den 8 aña, a mas cu redobla e debe y ta autor principal cu awe nos mester paga por ehempel 232 miyon florin na interes. Mike de Meza nunca tabata na altura cu Aruba tin un punto hopi positivo den wowo di inversionistanan como cu efectonan di un hurricane ta masha poco na Aruba? Cu Papa Dios sigui spaar nos. Ta di gran balor pa Mike de Meza cu mester bisa cu Aruba ta cay poco pazuid di hurricane belt y no por bisa cu Aruba ta cay poco pafor di hurricane belt? Nos tur a lesa y sa cu riba website ta para cu dentro di 25 aña un tormenta tropical por pasa dentro di 75 miya nautico y cada 46 aña un horcan por pasa dentro di 75 miya nautico. Tur hende por subi y mira esey toch? Kico ta e importancia cu Mike kier ple sabi awor? Tristo cu Aruba tabata tin abo Mike como vice promer minister.


Wak den bo cura prome
No ta pornada hues a confirma den un sentencia cu por sigui califica bo persona como “Lolo di Awa” esta un waterlulletje cu ta djis un pisca kisas e pisca si ta sabi. Bo ta corda con dilanti Hues bo a admiti cu bo a faya y a engaña Parlamento entre entrada y assets di Lotto? Bo ta corda cu bo a wordo huzga y sentencia pa esey? Awe abo kier bin lees de les voor con nos Promer Minister mester splica algo cientifico? Bo no ta compronde strategia tampoco Mike? Bo no sa cu den dicho conferencia tin tambe varios Fortune 500 companies cu por significa cosnan grandi pa Aruba? Pues bo reaccion yamando nos Promer Minister pa “bobo” alrespecto si Aruba ta cay poco pafor of pazuid di hurricane belt ta completamente for di contexto. Lo no ta mihor bo splica pueblo con bo a masacra pueblo cu bo decision di hedging cu a costa e pueblo aki mas di 300 miyon ? No ta mihor bo aclaria e desaster cu bo a causa manehando finansas publico? No ta mihor bo duna cuenta y splicacion dicon bo presupuestonan como minister di finansas na aña 2011 tabata tin un deficit di 325 MIYON, 2012 un deficit di 443 MIYON, na 2013 un deficit di 333 MIYON, na 2014 un deficit di 406
MIYON florin cual a conduci na e KB? Pues net abo kier bin cuestiona Promer Minister di Aruba? Wak den bo cura promer cu bo expresa cualkier bobedad.


Parlamentario Endy Croes ta termina bisando hendenan manera Mike de Meza mester retira for di politica y nunca pero nunca mas bin bek pa motibo di e dañonan grandi cu nan a ocasiona na nos pais.