​En conexion cu celebracion anual di Siman di Prevencion di Candela, diabierna atardi a tuma luga e “BRANDWEER ERE PARADE 2019”. E parada a pasa dilanti di Bestuurskantoor na unda cu Prome Minister Evelyn Wever-Croes y Minister Andin Bikker tawata para pafo ta warda e parada pasa. Un parada cortico pero hopi anima y bunita especialmente cu e participacion di nos muchanan. Despues di e parada, Prome Minister y Minister di Husticia a cana tras di e parada pa bay encontra cu e grupo di mucha cu tawata hopi contento pa presencia e parada y e autonan grandi di Brandweer.


Prome Minister Evelyn Wever-Croes: “Nos ta balora e trabou cu bomberonan ta eherce. No solamente den momentonan di calamidad y candela pero den cualkier otro situacion insigur, bomberonan ta esnan cu ta wordo yama prome. Nos ta aprecia e trabou cu nan ta haci pa nos. Un dia manera awe ta pa aumenta conscientisacion pa e comunidad yega mas cerca di nos cuerpo di bombero. Pabien cu e Siman di Prevencion di Candela. Sigui cu e bon trabou”.


Prome Minister a gradici Dienst Brandweer Aruba hunto cu Stichting Korps Brandweer Aruba pa e trabou cu nan ta eherciendo pa e siguridad di nos tur.

Nos pensionadonan ta central pa Gabinete Wever-Croes


Diaranson mainta, Prome Minister Evelyn Wever-Croes tawata tin e honor pa ricibi na Bestuurskantoor e grupo grandi di pensionado ‘Happy Hearts’ Santa Cruz. Den un encuentro hopi ameno cu e grupo aki, a intercambia di ideanan hunto cu Prome Minister. E grupo a trece nan preocupacionnan tambe dilanti.


Un preocupacion cu Happy Hearts a trece na atencion di Prome Minister ta e suma di pensioen di biehes cu ta hopi abou. Tambe e hecho si un ciudadano biba afo pa cierto cantidad di tempo, su pensioen ta wordo corta. Impuesto tambe ta un preocupacion grandi cerca nos pensionadonan.


Tambe e grupo ta preocupa si tin fondo den presupuesto pa e actividadnan di e Fundacion Movemento ta Bida. E Fundacion aki ta haciendo un trabou hopi grandi pa tene nos grandinan ocupa cu movecionnan pa salud entre otro pero principalmente pa tene curason di nos pensionadonan contento manera nan nomber mes ta bisa, Happy Hearts.


Prome Minister ta comparti e preocupacionnan di nos pensionadonan. Gobierno ta trahando riba e puntonan treci dilanti. Gobierno ta hopi preocupa cu e suma abou di pensioen y e deseo pa his’e tey. Sinembargo na e momento aki, e fondo di AOV, AWW no por carga un aumento grandi di e suma di pensioen. Por carge si Gobierno inyecta placa aden. Y esaki ta e meta di Gobierno di Aruba, pa trece suficiente fondo na mesa pa inyecta den e fondo di AOV, AWW di SvB pa por hisa e fondo di pensioen y nos pensionadonan por gosa di un miho pensioen.


“N’e momentonan aki, Gobierno di Aruba tin hopi reto financiero, hayando presion di Hulanda cu no ta permiti Gobierno haci e sorto di inversionnan aki. sinembargo, teniendo nos pensionadonan central, Gobierno ta buscando otro manera pa inyecta placa den e fondo pa hisa e pensioen di biehes. Pa ta realistico, mi no sa ki dia esaki lo wordo realisa”, Prome Minister Evelyn Wever-Croes a duna di conoce.


E retonan cu ainda Aruba ta enfrenta debi na e debe redobla di e gobierno anterior y e problemanan finaniero hopi serio, ta haci e situacion ainda hopi critico. Sinembargo, Gobierno ta trahando riba dje pa pronto por hisa e edad di pensioen di biehes. Mescos, Gobierno ta purbando pa baha e edad di pensioen cu tambe tin su retonan.


Pensionadonan di ‘Happy Hearts’ Santa Cruz a keda hopi contento cu nan bishita cerca Prome Minister y e recorido cu nan a haya den Bestuurskantoor. Na final, e grupo contento a entrega Prome Minister un regalo di aprecio. Prome Minister a keda sumamente contento cu e bishita di nos pensionadonan.

Diaranson mainta, Aruba a lanta cu e bon noticia cu e refineria lo bin bek den man di Aruba. Un noticia cu segun Prome Minister Evelyn Wever-Croes, no por a yega na un miho momento. Aruba na e momento aki ta bou di presion di Hulanda y CAFT cu ta keda insisti pa Gabinete Wever-Croes introduci mas medida riba nos pueblo. Apesar cu Hulanda ta admiti cu Gabinete Wever-Croes ta trahando bon, cu nos ta bayendo den bon direccion y ta cumpli cu norma financiero, Hulanda ta keda menasa cada biaha cu ‘aanwijzing’ pa motibo cu nan pensamento ta cu talves otro aña, Gobierno lo no por cumpli cu normanan.


Prome Minister den esaki a indica cu Gobierno di Aruba no ta di mesun opinion cu Hulanda. Gobierno di Aruba a scoge pa busca alternativanan pa cera e gap financiero enbes di solamente medidanan manera cu Hulanda kier pretende.


“Mi ta comprende si e presion di Hulanda y di CAFT riba nos. Nan ta referi na e preocupacion pa cu e debe di pais Aruba di casi 90 % di GDP. Esaki ta preocupacion di Gabinete Wever-Croes tambe. Pero no ta husto pa pone mas medida riba lomba di pueblo pa paga pa e debe cu e gobierno anterior a crea y a causa cu a hinca nos den e situacion financiero aki”, Prome Minister a enfatisa.


Prome Minister a expresa di ta lamenta si cu Hulanda y CAFT ta pone presion mientras cu den e 8 añanan di e gobierno anterior por a haci y deshaci, redobla debe y a tuma centenares di hende den e aparato gubernamental. Y esaki si a wordo permiti. A pesar cu awo si tin un Gobierno drechi y responsabel, cu ta tuma accion, algun no popular, ta haya e presion aki di Hulanda.


Preocupacionnan di Hulanda ta concentra riba dos area: (1) e Crisisplan Social y gasto di personal y (2) e plan di Reforma Fiscal.
Gobierno a scoge pa aloca Crisisplan social den fondo separa. E motibo di esaki ta pasobra Gabinete Wever-Croes ta pone e ser humano central. Na Aruba tin un explocion social pa falta di atencion bou e gobierno anterior. Pa atende cu e explocion social aki, Gobierno mester a pone fondonan un banda pa asina e Minister encarga por atende cu e problematica aki den tur trankilidad mientras demas Minister ta atende cu e problema financiero di nos pais. Lagando e Crisisplan social den Presupuesto, e placa lo no a yega pa atende cu e dolornan social den nos comunidad.


Pa loke ta trata gasto di personal, Prome Minister a indica cu Gobierno di Aruba ta comparti e preocupacion di Hulanda riba esaki. Sinembargo, Gobierno di Aruba ta haciendo lo maximo
pa cumpli cu norma di personal. CAFT ta indica tambe cu e aña aki ta mustra cu Gobierno lo logra esaki tambe.


Otro aspecto di preocupacion di Hulanda y CAFT, ta entradanan di Impuesto cu no ta cubri full e gap financiero. Sinembargo, no ta entradanan di Impuesto so lo cubri e gap financiero pa yega na un surplus. Impuesto a cubri e gap financiero pa yega na un ‘balanced budget’ mientras pa e surplus, mester tin alternativanan economico y no medidanan.


“Basa riba e puntonan aki, Hulanda y CAFT ta sigui pone presion riba Gobierno di Aruba y hasta ta menasa cu aanwijzing. Gobierno no ta di acuerdo cu esaki y mi ta sigura tur ciudadano di nos pais cu Gobierno lo bringa esaki si yega asina leu. Pa Gobierno di Aruba ta importante pa mustra cu nos ta y lo sigui cumpli cu nos normanan, pero nos ta pone e ser humano central, teniendo cuenta cu dolornan den nos comunidad. E bon noticia cu Aruba ta bay haya e yabi bek di e refineria, especialmente di e terminal, ta yena nos cu speransa y siguransa cu nos lo logra tambe yena e gap financiero cu desaroyo economino y no solamente cu impuesto. E noticia aki no por a yega na un miho momento”, Prome Minister Evelyn Wever-Croes a duna di conoce.

Dialuna, Prome Minister Evelyn Wever-Croes a haci un bishita di aprecio na Bureau Interne Diensten “BID”. E meta di Premier su bishita ta pa felicita nan pa nan 66 aña di servicio. BID ta un Departamento importante pa Gobierno. Prome Minister a felicita e trahadonan y a gradici cada un di nan pa e esfuerso, dedicacion y bon trabou cu nan a haci durante e añanan aki.


Alaves Prome Minister ta pidi nan pa no cay den e mentiranan cu e oponentenan ta trece padilanti pa causa angustia y confusion ya cu na ningun momento a papia di kita niun hende di trabou. No tin ningun ley cu ta existi cu por kita ambtenaarnan di trabou ora di introduci digitalisacion. Meta di Gabinete Wever-Croes ta pa percura pa trabounan den Gobierno por wordo haci mas eficiente y brinda pais Aruba cu servicionan di calidad.


Prome Minister a indica cu tur cambio cu ta wordo haci den Departamentonan di Giobierno, semper ta bay den consulta cu e Departamento concerni na unda nan por trece nan puntonan dilanti y di cual Gobierno lo tene cuenta cu n’e. E beneficionan di E-government ta sumamente grandi no solamente pa cu e facilidad di e proceduranan pero tambe pa ofrece diferente empleado e oportunidad pa por crece den un otro ramo di trabou.


Pabien BID cu boso celebracion di 66 aña y danki pa sirbi pueblo cu gran dedicacion durante tur e añanan aki.

E-Government pa digitalisa procesonan den Gobierno ta un meta cu semper Gabinete Wever-Croes a pone su dilanti pa wordo realisa e periodo di gobernacion aki. e-Government tin hopi beneficio tanto pa Gobierno como pa publico. e-Government lo facilita e proceduranan y trece mas transparencia pa asina evita procesonan inadecua den departamentonan. Specialmente, e-Government lo ta mas husto pa tur hende, segun Prome Minister Evelyn Wever-Croes. Den un sitema digitalisa, no por paga un trahado publico bou man pa e saca papel di cliente y trata esaki prome cu otronan cu ta wardando.


Aclariando mal informacion den cierto medionan di comunicacion cu a cuminsa cu un campaña di rumor y trece preocupacionnan den nos pueblo, Prome Minister a duna di conoce cu e-Government niun momento lo ocaciona cu trahadonan ta perde trabou. Den e caso specifico aki, ta trata di e Departamento di Gobierno, Bureau Interne Dienst, BID.


BID ta un departamento hopi crucial pa Gobierno di Aruba ya cu tur registracion di documento ta bay via nan. Na e momento cu un ciudadano kier entrega un carta di obhecion of un peticion, ta via BID nan mester bay caminda nan lo ricibi un stempel y number pa sigura cu e ciudadano por ta trankil cu e carta a ser entrega y lo cuminsa cana e proceso.


BID a cumpli 66 aña brindando nan servicio na comunidad di Aruba y lo keda un departamenrto crucial pa Gobierno hasta despues di e introducion di E-government. BID no solamente ta traha cu papel pero tambe cu registro y den cualkier sistema digitalisa mester tin un base central di registracion. E base di registracion aki ta loke a yuda Gabinete Wever-Croes na momento cu a drenta Gobierno, haña documentonan importante pa por a funciona debidamente ya cu na momento cu Gobierno a sinta, no a hanya niun traspaso di informacion ni documentonan cu e gobierno anterior tawata traha riba dje. Ta danki na BID a logra retracta e documentonan necesario pa por cuminsa cu e trabou pa goberna.


“Mi ta sigura comunidad di Aruba cu digitalisacion y e-Government ta hopi importante pa mehora e sistema pero esaki no ta nifica cu hende lo perde nan trabou. Pasobra apesar cu e gastonan di personal ta halto y e cantidad di empleado di Gobierno ta halto, na e momentonan aki tin un scarcedad di empleado publico den mayoria departamento y nan ta pidi Gobierno pa mas trahado pa atende cu e trabounan mas eficiente. Asina mes mirando e problema aki, Gobierno actual no ta tumando ningun ambtenaar mas den servicio. Al contrario, Gobierno mester baha e cantidad di ambtenaar pa aisna tin un miho control riba finansas publico. E sistema di digitalisacion lo yuda den yena diferente posicionnan cu aworaki no ta ser atendi pa motibo di scarcedad di empleado publico.

Durante un conferencia di prensa extra ordinario, Premier Evelyn Wever-Croes hunto cu coleganan minister, a informa prensa y comunidad di e bon noticia cu a logra yega na un acuerdo cu e refineria pa Aruba por haya e yabi di e refineria y e terminal for di Citgo. Esaki ta pa permiti Gobierno di Aruba busca otronan cu ta interesa den opera e terminal y e waf, y e refineria tambe. Mes momento ta garantisa derecho di trahadonan di e compania. Apesar cu no ta empleadonan di Gobierno, Gobierno di Aruba a insisti pa e derechonan di e trahadonan wordo salvaguardia tur momento.


REFINERIA
Cu e firmamento di e MoU, Gobierno di Aruba por cuminsa negocia cu otro partidonan interesa. Ya caba tin un lista di mas di 25 compania cu a expresa nan interes den ultimo tempo, sinembargo Gobierno no por a negocia cu nan, pa haya sa si nan ta partnernan serio. Awor si esaki ta posibel. Gobierno lo no limita su mes na e lista di compania aki so. Gobierno lo bay busca activamente na mas inversionista, entre otro door di tene un road show na Houston, caminda tin inversionistanan serio, pa lanta nan interes pa inverti na Aruba. E comision encarga cu negosacion lo wordo formalisa dentro di poco. Riba peticion di sindicato, empleadonan tambe lo wordo envolvi den e proceso aki. Gobierno ta buscando un partner serio, cu tin e fondo pa inverti mesora den e refineria, pa hasi’e un refineria ‘state of the art’, cu ta cumpli cu standardnan medioambiental, cu ta paga su fair share na caha di Gobierno, y cu ta trata su empleadonan bon.


TERMINAL Y WAF
Cu e firmamento di e MoU, Gobierno ta haya control di e waf y di e tankinan. Tur hende ta corda e bon temponan di Wickland Oil, cu a opera e tankinan cu hopi ganashi. Citgo ultimo tempo a neglisha e tankinan. Y apesar cu nan falta hopi mantencion, nan tin un balor hopi halto. Gobierno di Aruba ta bay percura pa e negoshi aki bira uno hopi exitoso cu ta genera hopi entrada pa Gobierno, y cu lo crea hopi cupo di trabou.


EMPLEADONAN
E punto di salida di Gobierno ta cu tur empleado mester keda cu nan trabou, en todo caso mas tanto empleado posibel, bou di e operador nobo. Citgo a indica anteriormente cu tanten cu no ta sigur si empleadonan lo wordo tuma over pa e operador nobo, y Citgo mester paga nan cu tur nan aña di servicio, cu Citgo no tin placa pa esey. Sinembargo aki e forsa di negosacion di Gobierno a hunga un rol grandi, y a pone como condicion mas importante pa Citgo cu nan mester paga tur loke nan debe na trahadonan, contratistanan y otronan cu nan debe. Premier Evelyn Wever-Croes a indica cu e empleadonan ta importante pa Gobierno y nan interesnan mester bin na prome luga.


Gobierno di Aruba ta hopi contento cu e bon noticia aki, cu a yega net na un bon momento. Pasobra mientras cu CAFT ta insisti cu Gobierno mester tuma medida, Gobierno di Aruba ta scoge pa busca alternativanan economico, pa cera e gap financiero, y e hecho cu ta haya e yabi di e terminal y e refineria, ta un di e alternativanan ey. Den nomber di Gobierno, Premier Evelyn Wever-Croes a gradici e comision cu a negocia fuertemente cu Citgo, y a logra e logro importante aki. Tambe Prome Minister a gradici colega Ministernan y pueblo di Aruba pa e confiansa y sosten.


Gobierno di Aruba ta felicita pueblo di Aruba pa e bon noticia aki, cu ta mustra cu si bo tin determinacion, y bo ta kere den un causa, bo por realis’e.

Tur persona cu pasa den e area di ex Bushiri Hotel por mira cu trabounan ta avansando y bayendo full speed pa loke ta trata e creacion di un beach nobo cu lo sirbi di atraccion tanto pa turista como local. Minister Dangui Oduber, mandatario encarga cu turismo ta contento y satisfecho con e desaroyo ta canando, tumando na cuenta cu ya Fase 1 a termina.


“Na e momento aki nos por mira cu e prome fase ya a keda realisa. E prome fase tabata encera ponemento di santo blanco. Esaki ta haci cu e beach aki lo sirbi dibiaha manera localidad pa e evento magno di Aruba Beach Tennis”, Minister Dangui Oduber a expresa na cuminsamento. E mandatario a continua ta splica cu e desaroyo aki ta uno esencial, ya cu e ta un stap pa concretisa locual ta bay bira e Aruba Port City.


Segun Minister Dangui Oduber a duna di conoce, e inversion pa realisa e proyecto aki ta bin for di A.T.A. conhuntamente cu DOW. Riba nivel gubernamental, Minister Dangui Oduber ta bisa cu esaki ta bayendo den bon cooperacion cu colega Otmar Oduber. E mandatario a duna di conoce cu e di dos fase, cual lo inicia pa aña 2020, ta uno mas prometedor, ya cu e lo duna forma na e proyecto.

​
Minister Dangui Oduber: “Fase 2 ta e fase cu lo duna un bida na e area. Esaki ta encera cu lo crea e facilidadnan, lo haci e landscaping, pone areanan di parkeo, pone cafes y hopi mas. E resultado final bira uno di kita sombre manera ta ser bisa den Papiamento crioyo.”
Finalmente e mandatario ta duna danki na tur persona envolvi den e proyecto aki y cu ta trahando di forma incansabel pa haci esaki realidad. “Un biaha mas ta ser demostra cu un vision coherente y un maneho serio cu Aruba na pecho, ta e formula pa resultadonan positivo pa nos pais”, Minister Dangui Oduber a bisa na final.

Riba e situacion di Venezuela, Prome Minister Evelyn Wever-Croes a indica den conferencia di prensa di Gobierno di Aruba dialuna mainta, cu no tin mucho cambio riba esaki pero e ta sigui ta un situacion hopi delicado. Comienso di siman a habri cu un reunion entre Prome Minister y e Crisis Team apunta pa Gobierno di Aruba pa conseha Prome Minister riba e tema aki pa discuti si tin desaroyonan nobo riba e situacion di Venezuela. Prome Minister a informa cu frontera ta keda cera te cu December segun e fecha stipula na comienso di luna pasa mientras cu Gobierno ta evalua e pasonan cu lo mester wordo tuma.


Siman pasa diabierna, Aruba y tur otro país den Reino a anuncia e introduccion di un visa como rekisito pa esnan di nacionalidad Venezolano cu kier biaha pa paisnan di Reino. Despues di varios luna di consulta intensivo entre e Minister di Relacionnan Exterior di Reino y e Minister-Presidentnan di Aruba y Corsou, a yega na e decision cu lo introduci un visa temporal pa tur bishitante portador di un paspoort Venezolano. E medida aki ta uno cu ta competencia di e Ministro di Relacionnan Exterior di Reino, ya cu maneho di visa ta un asunto cu ta regarda Reino Hulandes.


A yega na e decision aki despues di a constata cu e situacion na Venezuela a empeora, ademas cu e incidencia di migracion iregular for di e pais aki den direccion di paisnan bisiña a conoce un aumento alarmante. Tur esaki a conduci cu ya caba varios pais, e.o. Peru, Panama, Ecuador, Guyana, Trinidad & Tobago y Chile a dicidi di introduci un visa pa tur portador di un paspoort Venezolano.


Introduccion di e visa aki ta forma parti integral di un serie di medidanan cu ta wordo tuma pa controla e fluho migratorio regular di Venezuela den direccion di nos islanan. E tempo cu e medida aki lo keda na vigor ta depende di e desaroyonan na Venezuela. Na momento cu e condicionnan aki mustra cambionan faborabel, e medida lo por wordo elimina. Introduccion di e visa lo tuma 6 luna. E proceso di su introduccion ta exihi tempo, pa motibo cu lo mester aloca e medio y personal adicional necesario na e Embahada di Reino na Caracas pa por procesa e peticionnan pa visa.


Otro medidanan complementario pa contra-aresta e fluho migratorio ta consisti di e.o. un ESTA-A, pa autorisacion di e viahe, e Advanced Passenger Information system pa controla e
informacion adelanta di tur biahero y e introduccion di Pre-boarding checks, cual ta un procedura pa controla tur biahero previo na borda e avion.


Ta importante menciona cu e medida di visa lo conoce algun excepcion. Pasaheronan cu ta den posesion di un visa valido of un permiso di estadia pa e paisnan Merca, Canada, Inglatera (Reino Uni) y Irlandia, no tin mester di un visa pa biaha pa Aruba, Corsou of Boneiro.


E situacion di Sint Maarten ta un poco diferente, debi na e particularidad cu e isla ta uno dividi den un parti Frances y e otro Hulandes. Pa e introduccion di e visa ta efectivo, lo negocia cu e autoridadnan Frances pa por efectua e control necesario di e medida di visa. Na final Sint Maarten tambe lo forma parti di e programa di visa.


“E peticion pa e visa en cuestion mester wordo haci na Embahada di Reino na Venezuela. Aruba mes no tin ningun papel pa hunga den esaki pa motibo cu e maneho di visa ta un asunto cu ta regarda Reino Hulandes y ta cay bou di Ministro di Relacionnan Exterior di Reino. Esakinan ta pasonan cu nos ta tuma pa si acaso nos yega na na apertura di frontera, nos tin un miho control di bishitantenan. Gobierno ta keda monitoria e situación aki tur dia”, Prome Minister Evelyn Wever-Croes a enfatisa.

Cu hopi asombro mi por a tuma nota di Mike Eman, den conferencia di prensa di AVP di 8 oktober 2019 caminda e ta instiga contra e investigacion penal di Ministerio Publico den e caso ‘Avestruz’ contra entre otro ex-minister di Infrastructura, AVP-ista sr. Oslin ‘Benny’ Sevinger y doño di Canal 90.


E caso yama ‘Avestruz’ ta “tuma lugar den cuadro di un investigacion penal di Landsrecherche na posibel delitonan di corupcion y otro hechonan castigabel posiblemente cometi relaciona cu otorgamento di terenonan di gobierno” (fuente: relato di prensa di Openbare Ministerie Aruba di 27 di september 2019). Aparentemente tin cinco acusacion den e caso ‘Avestruz’ cu ta (1) falsificacion, (2) estafa, (3) labamento di placa, (4) mal uzo di poder den funcion y (5) soborno.


Den historia di Pais Aruba ta partido AVP tabatin dos lider, esta Henny Eman y Tico Croes, cu a wordo investiga penalmente despues di un gobernacion y tin dos ex-minister, esta Tico Croes (ex-minister di Finanzas) y Paul Croes (ex-minister di Labor) cu tin un condena penal.
Mester ta hopi cla cu e ex-minister Paul Croes (caso ‘Ibis’) cu tin un condena penal di cinco aña a wordo investiga y sentencia bao di gobernacion di Mike Eman como Prome Minister e tempo ey. Awor tin un otro investigacion penal (caso ‘Avestruz’) cu a cuminsa bao gobernacion di Mike Eman como Prome Minister.


E fenomeno aki, di investiga un minister den funcion bao di un gabinete Eman no ta nada nobo. Den e prome gobierno di Pais Aruba (1986-1988), ex-Prome Minister Henny Eman a laga investiga penalmente su Minister di Economia.


Awo Mike Eman kier caba cu integridad y imparcialidad di Ministerio Publico pasobra atrobe bao di su gobernacion corupcion a tuma lugar.


Tin dos posibel teoria: (1) Mike tabata na altura masha bon di e corupcion cu a tuma lugar den su gabinete y a permiti esaki y/of (2) Mike tambe ta parti di e corupcion cu a tuma lugar den su gabinete y ta laga otro integrante carga e culpabilidad.


Ta obvio cu e unico intencion di Mike Eman ta pa atacha imparcialidad di Ministerio Publico y para e investigacion contra entre otro ex-minister di su gabinete y doño di Canal 90 den caso ‘Avestruz’.

Parlamentario Endy Croes ta splica cu personalmente el a topa cara cara cu Robert Candelaria riba e dia cu Ministerio Publico a haci inval den cas di Benny Sevinger como e sospechoso mayor den e caso Avestruz. Tabata diaranson 2 di october den oranan di mainta tempran cu noticianan a cuminsa core cu Ministerio Publico hunto cu diferente otro departamento manera KPA, RST, Landsrecherche pa nombra algun a drenta entre otro cas di Benny Sevinger, Parlamentario di AVP/ex minister di Infrastructura.


E mesun mainta aki Parlamento tabata den preparacion pa trata e Ley di Serlimar y por corda desde marduga tin trucknan di sushi a staciona otro banda dilanti Parlamento. E mainta aki promer cu 8am diferente Parlamentario tabata na trabao preparando pa e reunion cu lo mester cuminsa 9am mientras noticianan tabata plamando rond Aruba di e invalnan den diferente cas.


Parlamentario Endy Croes ta sigui splica cu dado momento banda di 8.30 am el a sali for di e porta patras pa bay den su auto pa coy un documento cu a keda atras y regresando bek pa prepara pa e reunion cu lo cuminsa 9am a topa cara cara cu Robert Candelaria kende cu su tas a bandona edificio di parlamento na careda pa asina bay duna Benny y AVP conseho alrespecto e inval cu a caba di tuma lugar. Reunion di Parlamento a habri cu un sala yen yen di publico den ausencia di Robert Candelaria, Benny Sevinger y Arthur Dowers. Pues Candelaria a scoge pa usa su experticio pa conseha un otro corupto mas di AVP esta Benny Sevinger lagando e reunion di ley di Serlimar un banda.


Mas den oranan di merdia Candelaria a regresa Parlamento. Hopi tristo pa nota un oficial manera Candelaria cu mester por sa mucho mas mihor a scoge e banda di corupcion y fraude enbes di scoge pa lo corecto. Pueblo lo sa di castiga AVP na un manera nunca bisto den proximo eleccion. Nunca pero nunca mas AVP!