Desesperacion pa poder no solamente ta haci hende loco sino ta pone hende perde tur berguensa y eventualmente e hende ta conberti su mes den un gañado compulsivo cu e fin pa logra su meta maligno. Mas aleu ainda, un gañado compulsivo ta biba lubida completamente su responsabilidad den su mes un hecho y maneho cu a causa desaster total, siendo cu niun dia el a wordo diagnostica cu e malesa di Alzheimer.


Esaki ta e discripcion exacto pa e ex prome minister di Aruba, Mike Eman. El a bira un gañado compulsivo. Mas ainda pasobra e tin e mentalidad cu nos pueblo no por ta di e inteligente ey y no por distingui entre e berdad y maldad. Mike Eman a biba lubida cu e tata di medidanan di nos pais ta e mes, y awo e kier papia cu Gobierno di Evelyn Wever-Croes a bin cu pakete di medidanan.


Si Mike Eman kier papia di pakete di medida, nos por recorde tur e medidanan cu el a impone riba nos pueblo pa asina cubri su fechorianan y gastamento di placa pa loco. Anto Mike Eman ni un dia a pensa si e pueblo por a carga su pakete di medida mucho menos Mike Eman a haya un tiki di duele cu e tawata horcando e pueblo cu tanto medida cu el a bin cu ne. Algun manera lardon di anochi el a saca nan.


ESAKINAN TA UN LISTA DI ALGUN MEDIDA DI E GOBIERNO DI MIKE EMAN:


1. A hisa prima di AZV for di 1 di januari 2011
2. A kita reduccion di prima di AOV pa parehanan casa (Awor tur dos ta paga!)
3. A hisa Roomtax di 6% pa 9% y tambe pa “all inclusive”
4. A hisa Timeshare tax
5. A introduci Vlieg tax di US$ 10
6. A corta den derecho di empleadonan publico (middelloonregeling y franchise)
7. A hisa accijns riba cerbes, whiskey y sigaria
8. A aumenta (ristriccion riba) derecho di importacion riba cerbes y biña
9. Ta cobra taxistanan na Aeropuerto
10. A hisa e suma pa pasa Staatsexamens
11. A hisa tarifa di inkomstenbelasting (eliminacion di inflatiecorrectie)
12. A hisa grondbelasting cu 15% riba e balor di propiedad
13. A introduci Car Rental Tax
14. A hisa prima di AOV entrante 1 di januari 2014
15. A hisa edad di pensioen te cu 65 aña
16. A hisa tarifa di bus (Arubus) cu 11%
17. A introduci Vastrecht di 10 florin riba recibo di coriente
18. Tin cu paga 159 florin pa bishita Eerste Hulp
19. A corta riba subsidio di SABA (nos grandinan) y SVGA (hendenan special),
20. Casa Cuna, FMAA (personan di adiccion, FDEC (arte y musica), etc.
21. A corta den tur departamento di gobierno 500 cobrado di Onderstand,
22. 300 contractant, dienstautonan, inversionnan, etc.


ESAKINAN TA ALGUN DI E MEDIDANAN CU AVP NO A LOGRA BIN CU NAN:
1. Tin cu paga contribucion propio di 3 florin pa cada receta na botica
2. Lo hisa BBO cu 1% extra pa paga AZV (Health Tax)
3. Lo introduci un Financial Transfer tax pa tur transaccion bancario4
4. Lo introduci un Koers Marge Tax5
5. Lo hisa prijs di coriente cu 19% entrante 1 di october 2014
6. Lo hisa Vastrecht riba recibo di coriente cu 29%


Pero e realidad ta keda cu ta AVP, y AVP so ta e partido cu no solamente a hinca Aruba den estado financiero critico, sino tambe AVP ta e unico partido cu a bin cu asina hopi medida riba lomba di pueblo pa asina tapa pa nan mal maneho y gasta placa na nan friends, family y tin biaha hasta nan lovers.

Ultimo dianan ta manera un ansha y desesperacion cada bes cu bo scucha y mira politiconan di AVP papia. Un ansha y desesperacion pasobra nan ta mira cu e tiki speransa di haya poder bek, ta bayendo perdi. Pasobra un pa un e Gobierno di Evelyn Wever Croes ta solucionando e problemanan.


-Problema financiero ta wordo atendi y awor Aruba tin surplus y e baha e debe di 90% pa 75%.
-Problema cu Hulanda a pasa pa pasado, awor Hulanda ta elogia Gobierno di Evelyn Wever Croes.
-Problema social nunca antes a haya tanto atencion cu crisisplan social cu tin actualmente 31 proyecto den ehecucion.
-Problema economico ta mustra di tambe ta bay pasa pa pasado awo cu e refineria y e terminal a wordo traspasa pa pueblo di Aruba bek.


Un pa un gobierno di Evelyn Wever Croes a demostra cu e ta pone Aruba prome.
Cu tabata facil? Sigur cu no! Pero nos no por lubida e desastre cu Gobierno aki a hereda. Pero Gobierno di Evelyn Wever Croes a demostra cu si por y sin miedo. Nan no a bay den welga di hamber y yora! Nan a lora manga y mustra vision y determinacion. Y pa esaki Aruba ta agradecido y orguyoso!


P’esey ta comprendible cu oposicion ta haci tur lo posible pa bruha tera. Awor nan ta keha di papa
pero no ta Dowers himself a paga su propio casa mey miyon florin pa traha como abogado?
​No ta Richard Arends su papa mes a gana miyones den gobierno di AVP?
No ta Mike Eman mes a paga su ruman miyones pa sponsor un auto di careda?
No ta Candelaria a gosa di miles y miles di florin di placa di pueblo sin mester a traha?
No ta Paul Croes y Benny Sevinger ta sospechoso y condena pa corupcion?
Anto esaki ta sin papia di tur e miyones cu nan a paga na Speed y Paskel pa gaña y alaba nan tempo nan ta den gobierno!
AVP a abusa, AVP a masacra. Politiconan di AVP ta e ultimonan cu por habri nan boca!


E diferencia crucial entre MEP y AVP ta cu politoconan di AVP ta sushi y sin respet. Un ehempel recien: esposa di Mike Eman ta luchando cu cancer, MEP ta mande deseo di forsa y pronto recuperacion. Ex politico di MEP Rudy Croes ta luchando cu cancer, AVP ta gaña cu Rudy ta riba payrol di gobierno y ta gana 12 mil florin siendo cu nan sa cu no ta berdad. Ningun momento so Rudy ta riba payrol di gobierno actual y no ta gana e placa ey.


Politico di AVP ta hendenan sushi y sin respet y Pueblo di Aruba a cansa caba di esaki! Aruba tin un gobierno drechi awor cu ta consisti di hende profesional, decente y hende drechi. Duna nan espacio pa ruim op e desastre cu boso a laga atras!

Ultimo temponan nos ta mira oposicion ta rebaha nan mes mas y mas den un politica di riol.
Nan ta demostra claramente di a perde tur control y a cuminsa reacciona manera cu ta un beerput a rementa! Politica di riol ta wordo gespat na radio tur dia, te cansa hende di tanto negativismo. Poco ta esnan cu ainda ta scucha nan y mucho menos hende ta kere e disparatenan. Ora bo scucha e tono di odio so caba bo sa cu ta gaña nan ta gaña.


Pero momento cu nan cuminsa lastra casa y yiunan den nan politica di beerput, e ora si ta di berdad mes cabes a flip! Den politica madura no tin espacio pa lastra casa ni yiunan sigur no yiunan menor di edad.


Prome nan a cuminsa lastra yiu di Rocco Tjon sin importa e bienestar di e mucha. Un mucha menor di edad cu no por ni defende su mes.
Despues a cuminsa cu casa di Prome Minister Evelyn Wever-Croes, siendo cu e no ta traha den gobierno desde mas di 20 aña pasa. Y manera cu no ta suficiente ta lastra yiunan di Prome Minister cu tampoco ta traha den gobierno. Dos di nan ta studiante y sin fiansa di estudio di Aruba. E otro ta traha den sector priva.


P’esey e pregunta ta: ki dia AVP ta stop di lastra hende cu no tin nada di haber cu politica? Ki dia nan ta siña respeta cu tin limite den politica di riol? Ki dia nan ta siña cu yiunan ta bendicion di Dios cu no ta pa ningun hende lastra? Talves dia cu mishi cu un di nan yiunan?


Aruba a Manda un señal bon cla di ta cansa di tanto abuso di AVP. Ta momento pa AVP bay bek den su seno y re evalua cu kico nan ta bezig pasobra loke nan ta haciendo no ta den bienestar di Aruba.

Na luna di april aña pasa, den e veredicto den caso di retiro di director Franklyn Hoevertsz, hues a dicta cu no ta Franklin Hoevertsz ta culpabel di e mal maneho hiba den Utilities durante 8 aña. Pero ta e gobierno di Mike Eman ta culpabel hunto cu e hunta di comisario di AVP.


Hues a punta dede pisa riba gobierno anterior cu a autorisa Franklin Hoevertsz pa gasta 46 mil dollar pa pone e potret di Mike Eman den e revista Newsweek. Gobierno di Mike Eman a autorisa Franklin Hoevertsz pa gasta 680 mil florin na gasto di biahe, rond mundo. Un gasto ridiculamente halto! Ta gobierno di AVP y Mike Eman a autorisa pa Franklin Hoeverts gasta miyones di florin na Terra Group y Speed Andrade pa mercadeo, sin claridad kico exactamente nan a mercadea pasobra Utilities contrario na Elmar y WEB no tin nada pa mercadea.


AVP a duna Franklyn Hoeverts un salario di 22 mil florin pa luna mas varios beneficio cu ta acumula na casi 40 mil florin pa luna. Tambe nan a dun’e un ‘opzegtermijn’ di 1 aña siendo cu e regla den gobierno pa compania estatal ta bisa cu por haya te un maximo di 3 luna pa haci esaki.


Den e caso di december 2019, e veredicto di Huez e siman aki ta dicta cu Utilities mester paga Hoeverts casi 250 mil florin cu hunto cu e suma cu ya Hoevertsz a ricibi, ta acumula na e suma total di 416.350 mil florin cu Hoevertsz lo mester ricibi for di Utilities. Esaki ta e consecuencianan ora un partido ta traha contractnan asina corupto cu nan amigonan di partido.


Partido MEP den tur caso ta di opinion cu tawata miho pa Utilities y Aruba en General cu sr. Hoevertsz a bay. Sino e lo a keda cobra un cantidad di placa mas. E otro parti positivo di e retiro di sr. Hoeverts ta cu desde cu el a bay ta hopi cos bon ta pasando entre otro; prijs di coriente a baha; tin inversionnan cuantioso den WEB; Gobierno ta haya hopi mas dividend; ta trahando riba baha prijs di awa;
tin hopi mas transparencia; y ta trahando riba ley pa no paga salario absurdo mas pa directornan di companianan estatal.


Un biaha mas, cu e caso di Hoeverts ta mustra e abuso di Mike Eman y Mike de Meza. Tawata tin hopi iregularidadnan cu a pasa den Utilities bou instruccion di Mike Eman.


Esaki ta e momento cu mester investiga Mike Eman y henter AVP y e hunta di comisario anterior di e compania. Pasobra pueblo a papia cla y ta harta di e abusonan aki y hunto como un comunidad nos tin cu bisa AVP y e bagamunderianan aki nunca mas.

E Partido prestigioso Movimiento Electoral di Pueblo, MEP, diadomingo awo, 9 di februari ta cumpli 49 aña trahando na bienestar y progreso di nos pueblo. Desde su fundacion, MEP a conoce solamente tres lider. 1971 pa 1986: lider y fundador di Partido, G.F. Betico Croes (dfm). 1986 pa 2011: Nelson O. Oduber. Desde 2011, Evelyn Wever-Croes, nos actual Prome Minister.


Despues di e fayecimento di e gran lider y fundador di Partido Betico Croes, hopi a kere y vocifera cu MEP lo caba tambe. Sinembargo durante e añanan cu a sigui MEP a crece den un forma grandioso bou di liderazgo di señor Nelson Oduber y señora Evelyn Wever-Croes kendenan a sigui cu e mesun pasion di Betico Croes pa uni nos pueblo den temponan bon y den temponan dificil, liderando cu honestidad y integridad pa semper pone cada ciudadano di nos pais central.


Den transcurso di añanan Partido MEP a contribui grandemente na e desaroyo politico, estatal, economico y social di nos pais. MEP como un partido social democrata a ser funda door di un movimiento popular a base di principionan democratico y cu un sentimento social pa bienestar di tur ciudadano den e pais aki. Esaki ta e trayectoria cu Partido MEP a sigui bou cada liderazgo y awe ta cumpli 49 aña mas firme y decidido pa traha pa nos dushi pueblo.


E ta tuma un movimiento pa uni un Pais na bienestar di su Pueblo. Ta tuma lidernan manera nos lidernan di Movimiento Electoral di Pueblo pa logra e union aki y e bienestar comun di cada ciudadano. Movimiento Electoral di Pueblo MEP ta gradici nos lidernan di Partido, señor Betico Croes (dfm), señor Nel Oduber y señora Evelyn Wever-Croes pa percura pa e union den e fila di MEP y pa sigura e Pueblo di Aruba su libertad. Pabien!

Diadomingo 9 di februari partido MEP ta cumpli 49 aña y sin duda mester keda recorda pueblo tur loke e partido aki a haci, tanto prome cu entrada di Status Aparte dia 1 di januari 1986 como despues di esaki.
E proyectonan cu a wordo ehecuta door di e gobiernonan di MEP durante e ultimo 49 añanan ta innumerabel. Locual a resalta ta cu tur e proyectonan aki a contribui grandemente na e calidad di bida cu nos tin actualmente. Antes promer cu Status Aparte e desaroyo economico tabata hopi limita ya cu nos isla no tabatin e instrumentonan economico den man pa desaroya nos economia manera nos ta desea. Ta danki na e logro di Status Aparte na 1986 cu MEP a realisa, Aruba a haya e instrumentonan economico pa por logra desaroya e pais aki.


Proyectonan visibel pa un y tur
Algun di e proyectonan grandi cu a wordo realisa door di MEP durante e ultimo 49 añanan ta entre otro: Waf di container, Plan Sasaki pa desaroya henter e area turistico, edificionan di Domeinbeheer, Aduana, Ontvanger, SVB, Biblioteca Nacional, PAAZ, MTS, MAO, FCCA, oficinanan auxiliar di gobierno, kazerne Brandweer, Artesania, Santa Rosa, ampliacion di Zona Franca, pista di aterisahe di Aeropuerto, renobacion y construccion di stadionnan deportivo, construccion di casnan di pueblo rond Aruba, renobacion di Village y Esso Heights, construccion di centronan di bario, Idefre, Instituto di Cultura, Lotto pa Deporte, planta di purificacion di awa, wardanan di polis y Centro di Husticia, Hotelvakschool Bushiri, Sporthal, Centro Medico San Nicolas (IMSAN), construccion di careteranan, construccion y renobacion di scolnan rond Aruba, Arubahuis, oficinanan di turismo den exterior, Centrale di Setar, teleshopnan den tur districto, Parke di Mulina na Vader Piet, edificionan di Belasting, DOW/DIP, ATA, casnan di anciano, SVB na San Nicolas, APFA, Terminal di Bus, Helicopter, Radarnan, luznan di caya rond Aruba, etc etc. Tambe gobierno di MEP a institui companianan estatal manera Arubus N.V., APA N.V., WEB N.V., Elmar N.V., Setar N.V.


Otro logronan historico
Un otro logro importante durante 49 aña tabata e reapertura di e refineria Coastal na 1991. Tambe e firmamento di un acuerdo cu ‘SACE’, unda pais Aruba a haya un reduccion di e debe di garantianan cu 100 miyon dollar. E acuerdo cu Hulanda unda Aruba a haya 250 miyon florin di e placa di Plant N.V. tabata un otro logro historico. cual ta demostra cu MEP semper a goberna cu curashi y determinacion. Mas di e logronan grandi ta cu bao di e gobierno actual di MEP a logra reduci un deficit astronomico di 444 miyon florin na 2014 te na un deficit di solamente 4 miyon florin na 2019 y yegando te hasta na un surplus di 25 miyon na 2020. Algo cu solamente por sosode bao di gobernacion di MEP.


Awe MEP kier a gradici tur esnan cu a funda e partido y cu a yega di forma parti di e lista aki, en especial na nos lider inmortal Betico Croes y nos lider honorario Nelson Oduber pa nan curashi y dedicacion. Alabes un felicitacion na tur e candidatonan, directivanan di e urnanan electoral, Forza Femenina Grace, e hala hubenil HOT, militantenan y tur e votadornan pa cu e 49 aña di existencia di nos partido y na vispera di e celebracion di oro otro aña 2021. Biba MEP!

​Diadomingo 9 di februari 2020, MEP ta celebra su 49 aña di existencia. 49 aña di lucha y sacrificio, 49 aña na defensa di e pueblo Arubano, pero tambe 49 aña di logronan historico pa pais Aruba.


Tabata riba un diamars 9 di februari 1971 cu nos lider inmortal Betico Croes a funda e prestigioso partido Movimiento Electoral di Pueblo (MEP). Desde principio caba partido MEP a pone su dilanti e ideologia social-democrata, nos structura estatal y union di henter e pueblo Arubano, sin distincion di rasa, color, religion, status social etc.


E prome directiva di MEP
E decisionnan tuma riba dia 9 di februari 1971 a ser ratifica durante e promer Congreso di MEP cu a tuma lugar dia 14 di februari 1971 den teatro Rialto na Playa. Durante e congreso aki, dirigentenan di e partido UNA (Union Nacional Arubano) tambe tabata presente y nan a dicidi di uni nan mes na e partido recien funda MEP.


E promer directiva di MEP tabata consisti di lider y presidente Betico Croes y e miembronan Efraim de Kort, Daniel Leo, Jossy Croes, Sixto Feliciano, Watty Vos y Cezare Terzano.
E personanan presente di parti di UNA tabata Frans Figaroa, Dodo Figaroa, Poy Werleman y Tommy Leest.


MEP ta wordo considera como un partido prestigioso. Un partido cu desde su fundacion a keda un partido grandi y esaki durante 49 aña largo, ya cu MEP despues di su promer salida cu 7 asiento nunca den e eleccionnan siguiente a yega di baha bao di 7 asiento. Den henter Reino Hulandes no tin un partido politico cu un trayectorio asina impresionante!


Tres lider grandi
MEP ta un partido cu desde su fundacion te cu awor apenas a conoce tres lider, esta Betico Croes (dfm), Nelson Oduber y nos actual lider Evelyn Wever-Croes. MEP ta un partido di cual despues di morto di Betico Croes a wordo bisa “Betico dood, MEP dood”. Sinembargo durante e añanan cu a sigui MEP a crece den un forma grandioso, estableciendo recordnan impresionante durante e eleccionnan na 2001 y 2005. Pa yega na un trayectorio impresionante asina ta evidente cu e partido mester a haci hopi cos bon pa e comunidad aki.


Un lucha tenaz
Riba e tereno estatal nos partido tabatin problemanan serio cu e sistema politico di e structura di Antias Hulandes ya cu Aruba tabata den minoria compara cu e isla mas grandi, esta Corsou. Despues di su promer salida exitoso na 1971 Betico Croes, otro miembronan di partido y e militancia a pasa den temponan masha duro mes na unda nan mester a hiba un lucha tenaz contra esnan cu semper a pone trampanan den caminda pa nos no logra nos libertad, esta nos Status Aparte. Danki na su carisma, perseverancia y determinacion combina cu e respaldo incondicional di su pueblo, Betico Croes y MEP a logra pone e politiconan Antiano y Hulandes y hasta su opositornan local respeta deseo di pueblo. Hecho ta cu ta MEP
ta e partido cu a percura pa nos Himno y Bandera, nos propio Gobierno, Parlamento, Gobernador, Banco Central, propio moneda, ortografia etc.


Logro di Status Aparte na 1986
Fuera di e Referendum na maart 1977, e accionnan di augustus 1977 tabata determinante den e lucha pa Status Aparte y ta danki na e accionnan aki Aruba a wordo scucha door di Hulanda. Finalmente e deseo di Aruba a wordo cumpli durante e Conferencia di Mesa Rondo na maart 1983 na unda nos derecho di autodeterminacion a ser reconoci y aproba pa nos sali for di Antias dia 1 di januari 1986 y cu nos lo bira independiente dia 1 di januari 1996 den un Man Comunidad cu Hulanda. E fecha di Independencia a wordo impone riba Aruba pa por a sali for di Antias. E tempo ey Betico Croes a bisa bon cla cu MEP lo acepta por lo pronto e condicion aki, pero cu nos lo bolbe.
Y ta cu honor dia 13 di juli 1990 ex-Minister President Nelson Oduber a percura pa scrap e fecha di Independencia 1996 for di den Statuut, pero manteniendo e derecho pa bira independiente dia cu e pueblo aki den un referendum dicidi esaki den su mayoria cu aprobacion di 2/3 parti di Parlamento, cual ta un garantia solido y responsabel.


Den un siguiente articulo partido MEP lo elabora riba algun di e gran cantidad di logronan cu MEP a ehecuta durante su 49 añanan di existencia.