Nos Isla semper tawatin varios nacionalidad ta biba den harmonia cu otro. Aruba ta un ehempel pa mundo. Varios pais tin asina hopi problema pa convivi cu otro y despues di varios guera ainda nos no a siña nos les. Den pleno siglo 21 nos Isla tin mas di 90 nacionaldiad ta biba den harmonia cu otro. Aruba su densidad di poblacion ta halto. E cantidad di persona pa km2 ta halto. E situacion aki ta trece basta problema cu ne. Pa menciona un par di problema: e fluho di awa, di beerputnan, ambiente no higienico, sonido (duro) rond di bo cas, e sushedad rond Aruba. Mester amplia e plantanan di purificacion. Actualmente Dienst Openbare Werken (DOW) tin 3 planta di purificacion cu ta RWZI Bubali, RWZI Parkietenbos y RWZI Zeewijk. Asina por menciona algun problema cu a bin ta presenta cu e crecemento di nos poblacion. E problemanan aki mester di bon planificacion y solucion pa nos comunidad en general, paz entre bisiñanan y pa nos yiunan calidad di bida keda halto cu no mester sinti stress, por drumi y lanta y biba trankil hunto cu nos medio ambiente y ta feliz na Aruba cu ta esencia di bida.

​Mirando e crecemento di nos poblacion nos mester fomenta integracion atrabes di nos instrumento mas valioso cu ta nos idioma Papiamento, brinda sosten na e imigrante pa asina logra un integracion mas rapido atrabes di cursonan (bijschooling) unda ta siña nos balornan, norma y y historia como pueblo. Pa e imigrante por sinti cu realmente e ta forma parti di nos comunidad. Implementacion di un maneho pa integracion di tur esnan cu a scoge pa bin biba na Aruba den fase acopla na cada prolongacion di permiso. Nos forza ta nos hendenan cu ta domina Hulandes, Ingles y Spaño hunto cu nos idioma nacional Papiamento. Pasonan mester ser tuma pa encamina e cambio di e test di idioma pa naturalisacion, mirando cu e idioma Hulandes ta dificil pa esnan cu ta papia Spaño y Ingles, alabes lo plantea den cuadro di Reino Hulandes bek na locual e tabata promer cu aña 2011, na unda un persona cu ta den proceso pa haya su naturalisacion por a scoge pa haci su examen na un di e lenguahenan oficial di Reino Hulandes, cualnan ta Fries, Hulandes, Ingles y Papiamento.

Nos departamentonan mester traha mas eficiente y mas transparente. Gabinete Wever Croes a encamina un roadmap pa trece E-government na Aruba unda cu mas di procesonan gubernamental lo ta digital asina minimalisando retraso y red tape. Meta ta pa den no mas di cuater siman e cliente por haya un contesta. Esaki lo trece cu tur hefe di departamento di Gobierno lo ta riba E-Government. Un proyecto piloto Conexion a cuminsa pa asina departamentonan wordo conecta riba e mesun interoperability framework bao encargo di Nos Minister President Sra. Wever Croes. Awor ta bay cuminsa cu e proyecto piloto entre Censo, Cuerpo Policial, Ministerio Publico, IASA y DIMAS. Asina Aruba ta un bez mas tumando pasonan di liderasgo politico den region y mundo. Mester stimula formacion personal como profesional y proyectonan multicultural den centronan di bario pa realisa un integracion exitoso. Movimiento Electoral di Pueblo (MEP), un organizacion polticio cu Ideologia Social Democrata funda desde 9 Februari 1971 e aña aki a cumpli 50 aña di existencia logrando cosnan grandi pa nos pueblo y pais. Movimiento Electoral di Pueblo (MEP) ta kere den un maneho migratorio miho controla y mas humano, dirigi riba integracion real. Integracion ta indispensabel y fundamental pa por tin un comunidad na unda ta reina igualdad y fraternidad. "Quien no conoce su historia esta condenado a repetirla."

​Nos pais ta pasando den retonan mas dificil cu tempo refineria LAGO a cera su portanan na 1985 y caminda e tempo ey nos tawatin alrededor di 34% di desempleo. Mester a tuma decisionnan contra boluntad di nos partido Movimiento Electoral di Pueblo (MEP) cu tin e Ideologia Social Democrata. Manera stop di presupuesta placa pa busnan publico, casnan publico, construccion di scolnan publico den tur bario y hasta cuido medico pa menciona algun cos cu International Monetary Fund (IMF) a obliga nos Libertador Betico Croes e.f.m atrabes di gobierno di Hulanda. No tawata facil pa nos organisacion politico y asina mes Movimiento Electoral di Pueblo (MEP) cu tawata den gobierno caba - faltando dos aña ainda - Betico Croes a bay un eleccion nobo pasobra nos tawata bay drenta un periodo transitorio y Aruba lo bira un pais Autonomo den Reino Hulandes. Despues cu Movimiento Electoral di Pueblo (MEP) desde eleccion di 1973 a gana 7 eleccion consecutivo den forma absoluto, den e eleccion di 22 di November 1985 nos organisacion politico pa prome biaha a bay atras den voto y asiento, pero a keda toch e partido mas grandi di Aruba cu 8 asiento. E motibo principal di e caida aki tabata cu e refineria LAGO a cera na Maart 1985 y cu Gobierno Insular mester a tuma medidanan pa salba e situacion financiero y p'asina Aruba por drenta Status Aparte den forma responsabel. Despues cu e resultado di eleccion a bira conoci, Betico Croes a expresa e siguiente frase historico: 'Materialismo a vence Idealismo'.
 
Awe conciudadanonan nos a habri un aña 2021 cu mas di 40% desempleo y si no tawata pa ayudo financiero di gobierno di Hulanda nos desempleo lo ta hopi mas halto y concecuentemente nos economia lo a crash. Ta danki na e trabao di Gabinete Wever Croes cu aprobacion di Parlamento di Aruba nos ta wantando cabes riba awa. Nos ta agradecido pa e ayudo di Hulanda pero esaki tambe ta bin cu responsabilidad di nos parti como pueblo y nos gobernantenan. Aruba, un pais cu a wordo forma atrabes di varios decada pa migrantenan cu a bin for di tur skina di mundo y hunto cu nos Arubianonan a construi nos pais. Integracion ta keda e yabi pa crea un comunidad harmonioso y respetuoso. Movimiento Electoral di Pueblo (MEP) ta kere den un maneho migratorio mas controlabel y mas humano, den cual tin un distincion den tratamento di e prome permiso y e permisonan subsecuente. Desde Status Aparte nos a habri nos fronteranan pa trahado di exterior bin duna nos un man pa desaroya nos economia. Debi sinembargo, na e cifra halto di desempleo actual, e maneho pa ortorgamento di prome permiso te cu e di cinco lo ta mas estricto, pa proteha e mercado laboral pa esnan cu ya ta biba na Aruba.
 
Awo e pandemia di coronavirus a bin cu cambio di maneho di admision relaciona cu efectonan di crisis di Covid19. Esaki a trece hopi reto pa nos pais Aruba. Entre otro un crisis social economico y alabes di salubridad. Nos mester proteha nos mercado laboral local prome cu nos por brinda ayudo pa otro. Ken ta e personanan cu ta bay tin preferencia den mercado laboral pa loke ta trata e cuponan di trabao disponibel? Esakinan lo ta tur persona cu por ser considera como Arubiano, tur cu ta considera como Arubiano nobo, pues personanan cu a naturalisa y ricibi nacionalidad Hulandes, personanan cu tin admision segun ley; por ehempel door di e tipo di trabao cu ta eherce, e nacionalidad cu nan tin, of nan estado civil. Personanan cu tin un firma liber tambe, tur Hulandes den general y Arubiano cu kier regresa Aruba bek pa contribui na economia di e Isla. Ban sigui e protocol di nos departamento di Salud Publico (DVG) y ban proteha nos mes mas tanto posibel pa nos por draai nos economia y alabes mantene nos mes cu un bon salud.

​Cada aña nos ta celebra e legado di Tata di Aruba Sr. Gilberto Francois "Betico" Croes. Cu mi a postula mi mes den filanan di Movimiento Electoral di Pueblo (MEP) na 2013 sigur ta parcialmente door di Betico, e partido politico cu el a funda na 1971 y cu e aña aki ta cumpli 50 aña di existencia. Como hoben mi a cuminsa studia varios lider mundial y cu tempo a cuminsa haya interes pa politica di mi mesun Isla. Logico ta cu varios politico a destaca na Aruba den siglo 20 pero mester duna Ceasar locual ta di Ceasar. Niun politico a laga un herencia nacional manera Betico Croes. Riba tur tereno Betico a sa di laga su marca tanto material como inmaterial. Tin biaha mi ta haya reclamo pakico mi ta admira Betico Croes asina hopi. Mi contesta semper: "Pasobra el a logra cosnan grandi pa nos pais y esey nos tur tin cu aprecia y admira como Arubiano". Discriminacion ta un problema mental hasta por bisa institucional y esun racial ta un di nan mas peligroso y anti-humano. Betico tawata drenta cas di hende tur parti di Aruba. Na San Nicolas e pueblo tabata loco cu Betico. Tin expresionnan manera: "You're my man". Nan tabata stima Betico masha hopi. Ora cu Betico bishita Village na San Nicolas, nan tabata braz'e y e tabata braza nan. Por bisa cu tur parti na Aruba Betico tabata bon mira y hopi stima. Betico tabata trata tur hende mescos.
 
Mescos mi persona ta admira Betico Croes, Malcom X, John F. Kennedy, Martin Luther King Jr., Simon Bolivar y Marcus Garvey. Betico tawata un gran amante di literatura y musica. Su interes pa literatura a bay principalmente pa bida di politiconan mundialmente reconoci. Historia politico di cualkier pais, specialmente di Hulanda, Antiyas Hulandes y di Aruba tabata capta su atencion.  Simon Bolivar tawata un ehempel. Semper el a gusta usa su dichonan. E tabata tin un gran admiracion tambe pa un politico Arubano Juancho Irausquin. Tur esaki a yuda Betico prepara su mes politicamente pa asina e por a carga un responsabilidad asina grandi. Na 1967 Betico a sinti e necesidad di bay den politica ya cu asina e por yuda su pueblo. For di aña 1967 te cu aña 1970 Betico tabata Diputado di Enseñanza, Asuntonan General y Personal, Registro Civil y Biblioteca Nacional. Pueblo tabata admira su curashi y su forma di ser. Betico como politico semper tabata pensa hopi riba e hubentud. E tabata pensa riba posibilidad pa mas deporte, tumando na consideracion cu deporte ta traha patria. Deporte ta kita hoben di mal vicio. Banda di deporte, Betico tabata stimula tur hoben cu lectura ta importante pa un desaroyo mentalmente sano pa cada ciudadano. Pa e motibo aki el a introduci e bibliobus pa bay di scol pa scol pa asina hubentud por haya e oportunidad pa desaroya su mes lesando.
 
Mi tin cu bisa cu despues di 35 aña di Status Aparte nos tin cu trece mas union entre nos como Arubiano. Tur hende sea nan a nace na Aruba of no cu ta legalmente aki y ta stima e teritorio aki ta Arubiano. Nos mester enfoca mas riba nation building manera Betico a boga pe.  Betico tawata un hoben politico cu a bin cu cambionan politico. El a percura pa un union berdadero di e pueblo aki. Segun Betico ta tur nacion a forma e Isla aki y siguientemente e pais Aruba. Betico a yega di expresa su mes di siguiente forma na varios ocasion den publico: "Sea bo ta catolico, protestant of di otro religion, sea bo ta blanco, preto, geel, sea bo ta pober of rico, sea bo ta di Playa, Sta. Cruz, Noord of San Nicolas, bo ta Arubiano, bo ta pertenece na e pida baranca aki." E ponencia aki a haci cu Betico su popularidad a sigui crece y a haya mas base pa el a sigui lucha pa realiza e causa di Aruba. Door di e sistema di integracion, Betico a bira e lider mas stima di tur tempo. Mi persona a wordo eligi pa Secretario di Inclusion y Integracion den Directiva di MEP di 2019-2021. Den e puesto aki mi a purba trece mas union entre diferente colonia grandi na nos Isla manera esun di Colombia, Republica di Haiti, Venezuela, Republica Dominicana y tambe e colonia Hulandes. Asina mi ta mustra mi compromiso na idealnan di nos libertador Betico Croes. Despues di 35 aña como pais Autonomo den Reino Hulandes nos ta festeha su dia Nacional, Dia di Betico, dia 25 di Januari. Awe nos ta contento cu nos ta goza di logronan di Betico y nos Status Aparte. Aruba ta un pida diamante pa cada un di su ciudadanonan. Awor cu nos tin nos himno, nos bandera, nos Status Aparte, cual ta significa: nos libertad nos no mester laga tur esaki bay perdi. Estadista mas grandi y mas stima di Aruba. Feliz Dia di Betico.

​Gabinete Wever Croes a cuminsa cu un upgrade di Instituto Medico San Nicolas Dr. Rudi Engelbrecht y haci'e un hospital riba termino largo y cu mester ta nos focus e proximo periodo di gobernacion. Esaki lo crea mas opcion pa nos comunidad di Aruba pa nan cuido medico y ta crea competencia sano cu ta incrementa calidad den salud publico. Nos tur sa cu ultimo añanan nos pueblo no ta satisfecho cu varios area di nos cuido. Den pandemia (minimo tres aña) mester a corta ainda mas den e fondo di Algemene Ziektefonds Verzekering (AZV). Instituto Medico San Nicolas (IMSAN) tin un rol specifico.  Awo tin 12 camber cu 22 cama cu lo wordo usa pa patientnan “overnight” na IMSAN, unda mester evita pa manda pacient pa exterior. IMSAN a trata caba mas di 100 patient pa radio terapia. A inverti mas di 60 miyon florin den e proyecto di expansion y renobacion di IMSAN. Fortalece cuido medico na cas cu inversion na Aruba di ekipo y trece mediconan capacita (specialisa) pa logra haci mas procedemento, cirugianan medico riba nos Isla. Entrante April 2021 ora e proyecto di cambernan wordo finaliza y entrega IMSAN por haci operacionnan y patientnan por keda eynan mes. Esaki lo brinda nos pais mas camber y mas capacidad di cuido cu ta hopi necesario y importante. Mester re-evalua e sistema di tratamento medico den exterior mas pronto posibel, eherciendo mas control y inspeccion den area di facturacion di clinicanan den exterior cu na mes momento ta baha e gastonan di cuido medico. Dentro di poco IMSAN lo haya su JCI accreditation cu lo significa cu nos lo cuminsa cu turismo medico. Actualmente Algemene Ziektefonds Verzekering (AZV) no ta sostenibel pa un pueblo di apenas 120.000 habitante y cu un presupuesto di 400 miyon pa aña.
 
Minister Danqui Oduber a cumpli cu e exigencianan di e Framework Convention on Tobacco Control di Organisacion Mundial di Salud (WHO) y cu nos Plan Nacional di Accion riba Prevencion di Non-Communicable Diseases (NCDs). Asina Ministerio di Salud ta sigui traha pa salvaguardia e salud di nos hendenan. Nos tin varios malesa cronico cu mester atencion nacional manera Sobre Peso, Obesidad, Hipertension, Diabetes, Nutricion y Cancer. Door di stop di huma, bo ta reduciendo e riesgo pa un evento vascular cu 70%. Aña pasa a opera mas di 2000 pacient cu intervencion di cardiologia na hospital Dr. Horacio Oduber. Aruba a firma un acuerdo cu CARPHA pa set up un registro di cancer na Aruba. Pa promer biaha den historia Aruba lo tin un registro di cancer cu lo bay yuda den e prevencion di esaki. Mehorando cuido cu focus riba prevencion cu lo duna su fruto disminuiendo e tendencia di e gastonan medico a largo plaso. E implementacion di medicina preventivo ta bay drenta manera un rescate pa e cuido medico actual cu ta basicamente curativo. 
 
IMSAN lo ta cla pa April awor pa duna radioterapia na 125 pacient cu cancer y tin 24 persona cu ta haya radiotherapie. Hasta electroshock therapie ta haci na IMSAN. Awo falta pa inverti den un Petscan (Position Emision Tomography). Djis imagina si no a inverti den IMSAN tur e divisas aki ta sali di nos economia pa otro paisnan. Tambe a haya e prome pacient caba di Saba y mi lo kier wak esaki expande den full Caribe (greater Caribbean) cu ta bin San Nicolas pa tratamento asina creando un micro economia di sector medico pariba di brug di Aruba. Acerca a haci caba mas di 100 operacion di retina. Acerca IMSAN ta dunando servicio di Dialisis na 57 pacient pa no menciona 50 pacient cu ta den pre-Dialisis cu mester bin acerca. Sigur mester felicita Director di IMSAN Dr. Joel Rajnherc y su team completo pa e tremendo servicio medico cu ta wordo duna. Tin mester di varios profesional na IMSAN: Verpleegkundige, Apotheker y Optometrist. Nos mester specialista pa traha na IMSAN, pesey nos hubentud tin un oportunidad unico awo pa haya trabaonan profesional mas cerca di cas si nan sigui estudionan avansa. Mi lo sigui tur desaroyo di Instituto Medico di San Nicolas e siguiente añanan nos dilanti. "Respeta derecho di otro, esey ta garantisa bo paz." Betico Croes.

​Mi ta compronde cu como candidato politico pueblo tin su derecho di cuestiona maneho di gobierno. Desde cu nos di Movimiento Electoral di Pueblo tawata den oposicion 2009-2017 mi persona a bin ta traha pa e progreso di e districto di San Nicolas y Aruba en general. 
Tur dia na radio nos por tende un conciudadano cu den pasado a postula su mes riba un lista politico y a saca dos voto ta cuestiona mi persona tur santo dia. Mi ta kere ta bon pa splica e cabayero aki cu e gobierno actual a hereda un situacion critico tanto den finansas publico como den varios departamento di gobierno unda cu tur tawata den rood desde cu Movimiento Electoral di Pueblo a forma gobierno na 2017. Bao Minister Glenbert Croes mi a bin ta traha como consehero general na oficina di gobierno Edison Briesen y ta varios proyecto a wordo coordina via e oficina aki cu varios Minister, ministerionan y departamentonan. 
 
Algun logro desde 2017:

• Programa di Inovacion pa mucha na Colegio San Nicolas.
• Atencion pa bida Academico percurando cu tin tur nivel di enseñansa den e districto.
• Atencion pa SABA San Nicolas.
• Atencion pa bida Economico atraves di iniciativa AREA y tambe cu sector priva.
• Atencion pa Deporte, despues na IBISA San Nicolas di school pa frena desaroyo negativo social.
• Atencion pa bida Social, Cultura y Arte unda cu tawata por na Scol di Arte San Nicolas.
• Renobacion di Tourism Visitor Information Center unda a buta San Nicolas den e producto nacional Aruba.
• Renobacion Setar Teleshop San Nicolas y Renobacion Arubus Mall San Nicolas.
• Island Festival despues cu San Nicolas a keda neglisha pa varios aña pa por atrae turista den e area.
• Cooperacion estrecho cu Stakeholders manera SNBA pa coordina proyectonan economico.
• Proyecto Fast Ferry como sector economico cu a haya varios contratempo. San Nicolas Ports Authority ta den pipeline.
• Renobacion Cura Cabay Beach y trece mas actividad social cultural economico.
• Polis di Bario Mabon pa frena desaroyonan negativo social.
• Renobacion Baby Beach y Rodgers Beach pero pandemia a stroba esaki.
• Atencion pa Seroe Colorado, prome hotel Secrets despues cu mester a renegocia full e deal door cu tawata un desaster di AVP pero pandemia a frena esaki.
• Expansion di IMSAN rumbo pa un Hospital despues di a wordo neglisha pa 8 aña bao AVP.
• Inversionan den Sector Primario ta wordo estableci na San Nicolas cu varios otro sectornan economico manera medical cannabis creando miles di cupo di trabao pa e area.
• Atencion pa Infrastructura/caretera/casnan bandona cu ayudo di varios departamentonan cu tawata stroba desaroyo economico nobo.

Pandemia a frena varios desaroyo positivo mirando cu nos a perde mas di un aña di progreso pero nos no por give up. Ban keda positivo cu nos por rescata e industria petrolero cu Quanten Aruba LLC y Eagle LLC y varios otro compania cu ta den e consorcio a firma un Letter of Intent na December 2020. Gobierno cu ta trahando pa reactiva nos economia a declara aña 2021 como e aña di recuperacion total den tur sentido. No tin tempo pa negativismo mirando cu nos ta den un deficit di riba 1.3 biyon florin cu crisis social, migratorio y financiero keto bay y alabez den un pandemia mundial.
"No tin pueblo sin cultura, no tin cultura sin tradicion; no tin liberacion autentico, si no tin liberacion politico prome." Betico Croes Libertador di Aruba.

Digno pueblo di Aruba, nos a habri aña cu fe y optimismo aunke nos ta den un pandemia mundial. Na prome lugar mi kier expresa mi preocupacion na cada conciudadano di nos pais, kendenan ta pasando den momentonan dificil den cuadro di e impacto negativo di Covid-19. Mi ta uni mi mes na famianan y conocirnan di esnan cu a perde e bataya contra Covid y ta desea cada un hopi forza y cu Dios duna boso forza y consuelo pa por sigui padilanti. Mi ta urgi pa cada un tuma e precaucionnan necesario pa evita mas contagio y pa sigui instruccion di nos Departamento di Salubridad. Nos pueblo a wordo fuertemente golpia pa Covid cu a impacta nos desaroyo economico sin precedente. Hopi Tata y Mama di famia a keda sin empleo, enfrentando retonan financiero hamas bisto.
 
Durante e ultimo tres añanan mi a bin ta traha como Consehero General bao Minister Glenbert Croes su ministerio.  Mi a sali na defensa di esnan cu mester ayudo di FCCA: Cas na Mabon, Kiviti y Village. Tin cambio den maneho di esaki den varios districto. Nos tin un reto grandi den e parti di vivienda na Aruba mirando cu tanto casnan di FCCA como via banconan local tin un demanda pa alrededor di 7000 vivienda. Nos mester percura cu e crecemento aki bay den tur bario mas igual posibel cu e retonan di nos espacio teritorial. Ultimo aña nos por a wak un boycot cu casi tur construccion nobo a sosode pafo di San Nicolas y vecindario, esaki ta kibra tur e comercio di pariba di brug. 

​Den enseñansa den e area di San Nicolas a bin ta traha riba oportunidad pa nos hubentud na Bibliotheek di San Nicolas cu tawata neglisha pa varios aña. Awe totalmente renoba un necesidad pa hopi studiante cu no tin internet y computer na cas.
Na Colegio Arubano na San Nicolas mester keda central parti pariba pa nos hubentud por sigui desaroya nan mes academicamente. Varios otro oportunidad vocacional Openbare Avondleergangen Beroepsonderwijs (OAA) na San Nicolas, awe nos ta wak mehoracion den esaki. Nos mester mas curso atraves di Enseñansa pa Empleo (EPE) y Fundacion Enseñansa Pa Aruba (FEPA) pa mehora educacion di nos hendenan pa por competi den mercado laboral. Sin educacion San Nicolas no por sigui padilanti. Mester motiva nos hobennan pa sigui studia pa tuma responsabilidanan den futuro. 
Nos comerciantenan mester haya e infrastructura adecua pa nan negoshi. Tin necesidad pa mas cayanan wordo asfalta y tambe "sleeping police" cu iluminacion. Lo sigui traha riba e demanda aki structuralmente.
Nos clase obrero ta pasando den momentonan sumamente dificil cu e cierre di nos refineria. Actualmente gobierno a firma un Letter of Intent (LOI). Ban spera esaki por bira un Memorandum of Understanding (MOU) y na final un apertura exitoso pa aña 2021.

Nos deportistanan mester e apoyo den diferente disciplina. A bin ta traha mas riba programanan despues di scol. A drecha varios cancha deportivo pero tambe mester sigui inverti aunke tin retonan grandi cu e loteria nacional. Weg Seroe Preto, Village, Lago Heights, Cura Cabay sigur e areanan aki mester tin mas aceso na deporte pa frena tur desaroyo negativo bao di nos hubentud.
Den centro di San Nicolas (Promenade) a drecha e prome parti aki pa atrae inversion. Awe nos ta wak un Promenade den luz positivo pero alabes sector priva a keda pega cu e reto actual di Covid-19. Tawata tin varios proyecto pa Promenade pero esaki ainda no a wordo concretisa. Nos ta agradecido pa e Cinema Movies completamente renoba. Asina ta wak cu sector priva tin pleno confianza den e maneho di e gobierno actual.
Mi a sali na defensa di nos Instituto Medico di San Nicolas (IMSAN) cu a wordo boycotia pa 8 aña pero awe ta den pleno expansion pa bira un hospital.

Durante añanan mi a sali na defensa di Lone Park Stadium, Rodgers Beach cu su piernan ta kibra y vecindario di Sero Colorado cu awe ta haya debido atencion atraves di desaroyo hotelero aunke mi vision ta mas pa Boutique hotels. Ban carga pasenchi pa nos por haci algo bunita pa e area aki despues cu tantisimo biaha cos a bay robez.
Barionan di Savaneta, Brasil, Zeewijk, Cura Cabay Beach y Seroe Colorado pa piscadornan y nos pueblo en general pero falta mas desaroyo ainda. Mercadonan popular por duna mas actividad cultural economico den e areanan.
Mester mas Inftrastructura adecua pa e barionan di pariba: Sabana Basora, Pos Chiquito, Savaneta, Brasil y San Nicolas mucho cayanan sin asfalt. No por sigui asina, mester duna e barionan aki nan atencion debido.

Nos grandinan rond Aruba mester e atencion debido, gobierno a haci un esfuerso maximo pa proteha nan durante e pandemia. Tambe nos trahadornan den e sector aki mester di mas aprecio pa nan trabao noble.
Casnan bandona (erfpacht) na Aruba ta stroba desaroyo nobo. Nos mester trece solucionnan practico pa cu esaki. Mi a boga pa varios aña pa amplia e cantidad di notarionan y pa ubica un di nan na e parti pariba di brug pa nos por sigui drecha e parti administrativo legal den e diferente barionan di pariba. Mi lo sigui profundisa mi mes riba e problematicanan aki. "Un pueblo uni, hamas por ser venci." Betico Croes.

​E fenomeno pa busca salud medico pafo di e pais cu bo ta biba no ta algo di awo, pero di miles di aña pasa. Awe cu Aruba ta pasando den retonan di salud publico tin e oportunidad di por crea un sector medico di calidad halto y na mesun momento crea un sector di turismo medico pa nos region. Pa nos di Movimiento Electoral di Pueblo (MEP) salud di hende y sigur bida di nos conciudadanonan no tin prijs. Nos ta consciente cu un pais cu ta respeta su mes, mester brinda un ciudo di salud digno na su pueblo, y cu esey nos ta compromete di mehora e calidad di cuido pa un y tur. Prevencion y movecion ta crucial den trece solucion structural.
 
Instituto Medico San Nicolas (IMSAN) ta central den maneho di salud publico hunto cu hospital Dr. Horacio Oduber. Prome cancer bestraling a tuma lugar na IMSAN e aña aki na April 2020. Un logro historico pa cuido medico na Aruba. Maneho di gobierno actual ta dirigi riba mehora e calidad di cuido y servicio. Structuralmente ta logrando mehoracion den cuido pa nos hendenan mirando e retonan nacional cu pandemia, medidanan den Algemene Ziektekosten Verzekering (AZV).  Tambe por ta orguyoso di full e team medico di IMSAN pa cu operacionnan di catarata y retina. Actualmente tin cuater specialista di wowo na Aruba. IMSAN tin dos sala di operacion general, cada un ta completamente ekipa cu instrumento mas moderno cu ta existi. Tur aparato ta instala for di e dak y no ta abao ta colga, pa asina evita cu ta trompica of crea problema. Tur porta ta electrico, sistema cu Europa tin cu e calidad mas halto.
 
Nos pais den region di Caribe y Sur America tin su potencial pa brinda servicionan medico, pues crea un sector economico di esaki ta locual mi lo kier wak den futuro cercano pa e vecindario di pariba di brug. Mirando cu a firma un Letter of Intent (LOI) cu Quanten Aruba LLC y awo un acuerdo cu Eagle LNG pa traha un Liquefied Natural Gas (LNG) terminal na San Nicolas lo mester por tin un hospital completo hunto cu un pilar economico avanza den mundo di refineria y tecnologianan alternativo. E spinoff economico lo ta unico den e niche market aki den tur sentido di palabra. Lo duna oportunidad pa mas comercio den e area manera restaurant, entertainment y tambe real estate. P’esey ta importante pa traha riba edificionan bashi den e area pa por atrae inversionan nobo y moderno pa hisa e landscape fisico.
Nos mester motiva nos hubentud pa bay studia den e area medico mirando cu na Educacion Profesional Intermedio (EPI) y estudio riba nivel di Hoger Beroeps Onderwijs (HBO) ta posibel y lo por haya trabao na Aruba mes. Acualmente IMSAN ta buscando 18 verpleegkundige. Minister Danqui Oduber ta trahando pa trece e ley di AruBig pa nos dokternan studia den region por bin bek nan pais pa traha pa nos digno pueblo. Nos mester focus ribe e profesionnan cu nos mester actualmente enbez di studia cos cu despues no por haya trabao na Aruba. "Nos ta liber ora nos ta convenci cu e bon nos haci no ta keda destrui." Betico Croes. 

Den cuadro di celebracion di 50 aña di partido MEP, a traha un kalender cu fechanan importante y e historia di Partido MEP, e lucha pa Status Aparte y e logronan di e diferente Gobiernonan di MEP. Un kalender cu fecha importante cu a wordo traha door di Manolo Giel y diseña pa Tusy Henricus.

Manolo Giel ta yiu di co-fundador di MEP Benito Giel (dfm). For di aña 1971 Manolo tabata milita den partido MEP ya cu e ta sostene fielmente e ideologia social democrata di e partido aki y e lucha cu MEP a hiba pa logra e Status Aparte di Aruba. El a aparece 2 biaha riba lista, tabata presidente di MEP y durante algun luna di 1994 el a fungi tambe como parlamentario. 

Den tempo bon y den tempo menos bon semper Manolo a sostene e 3 lidernan grandi Betico Croes (dfm), Nel Oduber y Evelyn Wever-Croes. Tambe Manolo ta documenta tur e logronan riba diferente tereno den e transcurso di 50 aña di existencia di MEP. Su lealtad na MEP ta incondicional ya cu e ta hopi orguyoso di ta pertenece na e partido cu a realisa un sin fin di logro y proyectonan grandi na bienestar di pueblo y e mas principal cual tabata e Status Aparte entrante 1 di januari 1986.

​Diabierna anochi a entrega e prome kalender conmemorativo di 50 aña MEP na Manolo Giel. Esaki a tuma luga na Cede di MEP na Santa Cruz. Presente na e ocacion tawata Prome Minister Evelyn Wever-Croes, Presidente di Partido, Hendrik Tevreden, Secretario General Endy Croes y Tesorero Setty Yarzagaray. Danki Manolo y Tusy pa e bunita kalender
E kalender ta disponible pa solamente Afls. 10,00 cu lo ta un contribucion na partido. Acerca bo candidato pa bo no keda sin haya un.
#50AñaMEP

​Si mi no ta hera tempo cu a cuminsa cu casinonan na Aruba na mesun momento e demanda pa prostitucion legal tambe a haya su raiz na Aruba. Claro nos tur sa cu den siglo 20 cu binimento di LAGO e servicio pa e profesion mas bieu di mundo tambe a haya su derecho di existencia pa no menciona e balor agrega pa frena violencia domestico y abuso contra e ser femenino. Mi no ta un lider religioso si no un candidato politico cu mester trece mi vision padilanti riba e tema aki. Pa varios decada prostitucion legal tawata existi den e barionan di Rancho, Dakota y San Nicolas. Na final tur cos a move pa San Nicolas y nos districto mester a siña biba cu e sector economico aki sin kita afo cu esaki ta trece su consecuencianan negativo pa nos bida social economico. Den dia comercio actualmente na San Nicolas ta nulo. Si logra keda cla cu Quanten Aruba LLC cu un reapertura di nos refineria hunto cu e grupo di consorcio esaki sigur ta algo sumamente positivo mirando e impacto economico den pleno pandemia.
 
Durante e ultimo 3 añanan mi a boga pa mas visibilidad di polis den e areanan comercial di San Nicolas. Den parti anochi e area ta cambia completamente unda ultimo añanan hopi crimen a sosode. Mester inverti e siguiente añanan den iluminacion y embeyecimento di entrada fo’i e rotonde bin ariba. Ultimo añanan mi a recomenda kisas un polis di bario den un di e cayanan (hanchi) pa frena e desaroyonan social negativo. Varios crimen a sosode den e area cu a shock nos comunidad. No tawata tin mucho consensus pa cu e area y su problemanan structural. Aña pasa nos a drenta un pandemia mundial y tur cos na San Nicolas mester a cera aunke ainda tin actividad limita den area. Actualmente prostitucion ilegal a lanta rond di Aruba: den casnan, boutique hotels pa no menciona tur e servicionan di escort (pre-pago) cu tin rond di nos isla. Nos mester madura riba e temanan aki y no keda kere cu lo por sigui cu e modus operandi actual.
 
Nos mester restructura e negoshi aki na Aruba pero sigur San Nicolas no por keda den mesun limbo. Mester trece un cambio den e ambiente economico. San Nicolas mester su areanan pa desaroyo economico y social. Apart di edificionan bashi (Nicholson y Marchena hotel) di sector priva cu te ainda no tin consensus. Nos mester zone e area pa por papia di un desaroyo nobo pa e proximo generacion. Mi ta pidi nos digno pueblo di Aruba pa duna mi persona e sosten den eleccion pa parlamento 2021 pa por trece cambionan grandi pa e area aki di Aruba.  Algun cambio cu mi lo sigui lucha pe ta un notario na San Nicolas, departamentonan esencial manera Camara di Comercio, San Nicolas Business Association y sigur un Business Incubator pa yuda crea un clima nobo cu lo produci entreprenuer mindset enbez di tur hende competiendo pa trabao na e otro parti di Aruba. Pariba meser por carga su propio microeconomia cu durante e lunanan venidero mi lo amplia riba esaki y con mi ta kere nos por logra hisa e productividad economico di pariba di brug pa nos hendenan.
“Sea bo ta Catolico, protestant of otro religion. Sea bo ta blanco, preto of geel. Sea bo ta pober of rico. Sea bo ta di Playa, Santa Cruz, Noord of San Nicolas, bo ta Arubiano bo ta pertenece na e baranca aki.” Betico Croes.