Rudy Richardson:MEP: UNICO ORGANIZACION POLITICO CU A WORDO FUNDA PA DEFENDE E LUCHA ARUBANO

​Tabata riba dia 9 di Februari 1971 na Cumana 84 cu e hoben y dinamico lider Arubano Betico Croes den presencia y cu aprobacion di lidernan di bario for di tur skina di Aruba a funda e partido di ideologia social democrata, Movimiento Electoral di Pueblo (MEP). Y tabata den e reunion aki cu e colornan y emblema di paritdo a ser aproba: color geel y cu letternan cora. E emblema ta simbolisa un parha bulando riba Aruba buscando su libertad y iluminacion den e rayonan briyante di solo. 
Despues di 3 luna cu MEP a ser funda, un eleccion di Eilandsraad a tuma lugar y nos partido den e periodo sumamente cortico aki toch a logra haya 7 asiento cual ta representa un tercer parti di e elctorado Arubano. Sin duda cu MEP ta conta desde e tempo ey cu un nucleo solido ya cu durante 50 aña di existencia di nos partido nunca nos a yega di baha bao 7 asiento, cual siguramente ta un logro historico den Reino Hulandes.
 
Desde su fundacion nos organizacion politico MEP a destaca den su lucha ferviente pa trece union bao di tur ciudadano di Aruba sin importa rasa, color, religion etc. Movimiento Electoral di Pueblo ta e partido cu e tempo ey a percura pa caba cu tur segregacion y division cu tabata existi riba ei Isla aki. Sin duda cu e union aki tabata determinante pa por realisa e causa di e pueblo Arubano, esta nos Status Aparte. 
Pa por concretisa e deseo di e pueblo Arubano na un forma responsabel, MEP a percura pa institui e Departamento di Structura Estatal. E departamento aki a compila varios rapport y documento valioso riba tereno estatal e.o. publicacion 'Witboek voor de Status Aparte', skirbi pa mr. John van der Kuyp y mr. Henri Fingal.
 
Mi contribucion awe despues di 35 aña di nos derecho di Autodeterminacion registra na Nacionnan Uni den Reino Hulandes ta pa nos saca Aruba di e pandemia di coronavirus y crece un economia Inclusivo pa tur nos conciudadanonan. Den pasonan di nos ideologia Social Democrata mi politica ta uno di libertad, husticia social y solidarismo. Mi lo lucha den parlamento e periodo aki di 2021-2025 pa crece e economia di pariba di brug di Aruba y tur otro parti unda cu pobresa ta concentra. Trece prosperidad pa nos hendenan cu mas iqualdad, mas oportunidadnan rond di nos pais cu beneficionan tanto material como inmaterial pa aumenta e prosperidad den e hogarnan aki na Aruba. Mi vision ta pa San Nicolas haya un bez mas un comercio vibrante cu por competi y crea un sinergia cu comercio general di nos pais. Elimina mas tanto desempleo, trece cuponan di trabao cu ta paga bon y unda mester yuda nos pueblo haya mas educacion (cursonan) pa por yega nan meta den mercado laboral. September 24, 2021 mi ta pidi nos digno pueblo confianza den mi persona pa sigui lucha den filanan di Movimiento Electoral di Pueblo pa cristalisa deseonan di nos pueblo.