Parlamentario drs. Shailiny Tromp-Lee:
Dialuna dia 1 di november 2021 algun miembro di Fraccion di MEP, como ciere di e luna dedica na nos Adultonan Mayor, a bishita Grupo Flor di Aloe na Parke Curason na Yaburibari. Tromp-Lee ta indica cu ta trata di un bishita cu mester a tuma lugar un siman prome pero door di e agenda druk cu reunionnan publico mester a keda posponi te dialuna ultimo.
Desde e situacion cu Covid Grupo Flor di Aloe ta haci uzo di Parke Curason tur dialuna y diahuebs. Nan ta un grupo di 60+ cu ta consisti di mas o menos 50 miembro. Un Grupo bon organisa y hopi alegre. Shailiny Tromp-Lee a bisa cu e tabatin contacto cu e Grupo y nan a indica na dje cu nan tin cierto peticion pa haci. Nan ta gusta masha e localidad na Parke Curason pero a bin ta experiencia cierto limitacion pa loke ta trata accesibilidad na e Parke door di algun miembro. Alabes nan a indica cu ta dificil pa vehiculo di emergencia por drenta te unda nan ta. Pa es motibonan aki nan a pidi Fraccion di MEP pa pidi atencion di Gobierno pa esakinan.
Pa percura cu e puntonan presenta door di Grupo Flor di Aloe ta haya e atencion necesario, Parlamentario Tromp-Lee a manda un carta pa Minister Endy Croes di Enseñansa y Deporte pa urgi Gobierno pa mediante Directiva di FFD atende cu esakinan. E peticionnan di Grupo Flor di Aloe ta:
· Si por traha un subida cu un railing na un banda pa por haci posibel cu esnan den rolstoel of cu limitacion por subi bou di e overdekte speelplaats mas facil;
· Si por haci posibel pa vehiculo di emergencia y esnan cu ta transporta esnan cu limitacion por drenta e parke y mas serca di e overdekte speelplaats posibel;
· Mirando cu tin di nan miembro ta bin hunga den e speeltuin cu nan nietonan, nan ta haci e peticion pa santo blanco den speeltuin.
Tromp-Lee ta splica cu e la experiencia yegada di dos miembro, caminda bo ta ripara cu ta dificil pa nan subi bou di e overdekte speelplaats y cu enberdad mester percura pa un mihor accesibilidad di e overdekte speelplaats pa nos adultonan mayor.
Durante e mainta Parlamententario Tromp-Lee a gradici esnan cu ta coordina e Grupo Flor di Aloe cu nan trabou boluntario cu ta asina importante y necesario. Mirando con grandi e grupo ta caba ta indica e necesidad bou di nos adultonan mayor pa actividad y momentonan di encuentro. Parlamentario Tromp-Lee ta termina bisando cu nan a asta participa cu e grupo y por comparti cu nan un parti di nan mainta. Sigur un mainta hopi ameno.