Den nan ansha y desesperacion partidonan di oposicion y specialmente AVP no tin ningun otro topico mas pa papia riba dje cu no ta e aumento di e post Goederen en Diensten y tambe huurmento di edificionan di gobierno door di Gabinete Wever Croes. Sinembargo nunca AVP a base di cifranan concreto a splica pueblo dicon e gastonan aki a aumenta substancialmente desde 2018 en adelante y cual aumento tabata pa nan propio culpa!
Na 2018 e gastonan aki tabata 232.7 miyon florin, na 2019: 282.9 miyon florin, na 2020: 312.6 miyon florin y na 2021: 271.9 miyon florin. Y pa 2023 a presupuesta un reduccion drastico te na 217 miyon florin.
Construccion di edificionan SOGA
Hecho ta cu semper desde Status Aparte tur gobierno sin excepcion – debi na falta di espacio pa acomoda nan departamentonan – tabata y ta haci uzo di edificionan priva y pa cual huur ta ser paga. No mester lubida cu tabata durante Gabinete Nelson Oduber (2002-2009) a implementa e maneho pa gobierno mes construi su propio edificionan mediante di un fundacion cu a ser lanta pa e proposito aki cual ta SOGA (Stichting Onroerend Goed Aruba). Esaki ta encera cu SOGA ta construi e edificionan aki, ta huur esakinan cu gobierno y ta percura pa e mantencion continuo di e edificionan aki. Y na final despues di hopi aña e edificionan aki lo bira propiedad di gobierno y consecuentemente e gastonan total di huur tambe lo reduci.
Asina nos por a mira con gobierno di MEP a laga construi varios edificio nobo manera e edificio di Infrastructura (DOW, DIP y DLV), e edificio di Belasting y Finansa y e edificio di Aruba Tourist Authority (ATA). Tambe Gabinete Oduber a construi e Centro di Husticia/Warda di Polis na Santa Cruz y Warda di Polis na Noord.
Gastonan di PPP den Goederen en Diensten
Hecho ta cu por lo pronto e huurmento di edificionan di gobierno den sector priva lo mester continua mientras cu gradualmente gobierno ta construi su propio edificionan. Ta p’esey ta straña nos cu constantemente AVP ta critica Gabinete Wever Croes riba e huurmento di edificionan di gobierno. Sinembargo loke nan no ta splica pueblo ta cu varios di e edificionan aki ta pertenece na hendenan yega na partido AVP y cu varios di e contractnan di huur aki a ser otorga hustamente durante gobernacion di AVP. Pregunta ta si AVP ta na fabor pa gobierno actual termina cu e contractnan di huur di tur e edificionan aki di nan propio hendenan?
Den e tabel adhunto nos por mira con e pago pa e proyectonan PPP crea durante Gabinete Oduber a keda stabiel durante 2017 en adelante, esta di 8.8 miyon florin pa aña. Por mira tambe con na 2018 y e añanan siguiente e pago pa e proyectonan PPP (Green Corridor, Watty Vos Blvd, Hospital y e 4 MFA-nan) crea durante Gabinete Eman a aumenta drasticamente y cual a conduci cu e gastonan di Goederen en Diensten tambe a aumenta substancialmente desde 2017. For di 2017 pa 2019 e pago pa e proyectonan PPP crea bao di Gabinete Eman a redobla di 36.9 miyon florin na 2017 te na 71.7 miyon florin na 2019. Algo nunca visto!
Finalmente partido AVP no mester lubida nunca cu tabata bao di nan gobernacion (2010-2017) nan mes a inicia cu mayoria di e proyectonan PPP den un forma iresponsabel, ya cu no tabatin fondonan di reserva pa financia e proyectonan aki, a cuminsa fia pa loco y cu e cuenta di pago a cuminsa wordo presenta desde 2018 en adelante na Gabinete Wever Croes y e futuro generacionnan.
Hecho ta cu AVP semper a practica e politica macabro di “wie dan leeft, wie dan zorgt”. Nan no ta siña nunca mas!