Parlamentario Shailiny Tromp-Lee:
Den e parti final di Gobernador su discurso relaciona cu Apertura di Aña Parlamentario Nobo e la reitera cu union, solidaridad y respet ta clave pa un recuperacion genuino. Union pa un causa nacional. Respet pa e dignidad humano. Solidaridad pa esun cu mas mester di dje.
Gobernador a indica cu union, respet y solidaridad ta forma tambe e fundamento di e estado di derecho cu nos Pais ta.Segun Gobernador mescos cu nos ta uni pa un causa comun, nos ta solidario y ta mustra respet mutuo pa logra recuperacion, di e mesun forma nos mester mantene nos estado di derecho bibo garantisando libertad y derechonan di tur ciudadanonan.
Gobernador ta haya necesario pa nos siña respeta y compronde otro, siña balora e interes y necesidad di otro y pone diferencianan un banda na momento cu nos Pais mas mester di dje. El a dirgi su mes specialmente na Parlamentarionan caminda el a indica cu como Parlamento nos a wordo confia cu un poder pa defende y proteha e principionan aki.Gobernador a bisa cu mescos cu bida conoce temponan bon y menos bon y ta laga nos cu lesnan atras, mescos ta conta cu e desafionan cu nos estado di derecho ta afronta. El a pidi nos pa no laga esaki descurasha nos, pasobra asina so nos por garantisa un futuro duradero y sostenibel, mas inclusivo, mas pacifico y husto pa nos tur.
Palabranan clave cu a resona cerca mi ta: union, solidaridad y respet! Palabranan na su lugar y cu sigur mi ta di acuerdo cu nan. Hunto nos por hopi, hunto nos pone Aruba bek riba pia. Trahando na un manera serio y responsabel.