Pa enfrenta y surpasa e retonan nos dilanti, nos mester di Evelyn como Lider di MEP y Aruba
Xiomara Maduro colega di Evelyn Wever-Croes:
Diadomingo awo Partido Movimiento Electoral di Pueblo MEP ta organisa su Congreso di Partido na unda cu lo re-eligi su Lider pa e proximo 4 añanan. Nos Lider Evelyn Wever-Croes na cabes di MEP y como Minister President di Aruba a sa di guia nos Pais den e momentonan mas dificil di nos historia. Evelyn tabata tey pa MEP y pa Aruba na e momentonan cu mas nos Partido y Pais tabata tin mester di un Lider firme y humano. Como un colega di Evelyn den partido y den gobernacion, mi por bisa cu Evelyn tin tur cualidades necesario y ta e miho lider pa keda guia MEP y Aruba den e rumbo di recuperacion y progreso.
EVELYN TA UN LIDER DIGNO DI MEP PA ARUBA
Como politico, Evelyn a sa di demostra capacidad, integridad, firmesa y curashi pa tuma decisionnan dificil, pero necesario na bienestar di nos Partido y Pais Aruba. Como Lider di Pais Aruba, Evelyn a lidera Aruba den varios crisis cu vision y determinacion. Evelyn a sa di representa MEP y Aruba dignamente cu un diplomacia politico unico. Evelyn ta nos prome Lider femenino di MEP y alabes nos prome Minister President femenino di Pais Aruba y den tur dos posicion Evelyn a sa di inspira y habri caminda pa e liderazgo femenino di nos Pais wordo acepta y admira. Evelyn a demostra cu e ta un lider digno di MEP pa Aruba.
BAN ACLAMA EVELYN COMO NOS LIDER DI MEP
E invitacion ta bay na tur simpatisante di MEP, pa ban aclama Evelyn como nos Lider di MEP durante e Congreso di nos prestigioso Partido na Sede di MEP na Santa Cruz diadomingo awo. Ban duna Evelyn e sosten necesario pa asina e por keda guia MEP y Aruba. Awo mas cu nunca MEP y Aruba mester un hende manera Evelyn pa sali na nos vanguardia. Pa enfrenta y surpasa e retonan nos dilanti, mi ta convenci cu nos mester di Evelyn como Lider di MEP y Aruba.