top of page

FRANKLIN HOEVERTSZ TIN 100 MIYON MOTIBO PA TA ENVIDIOSO

El a organisa cantidad di conferencia, sin logra nada. Gobierno actual ta organisa 1 conferencia y logra un fondo di 100 miyon euro

Partido MEP a tuma nota di critica pisa di ex director di Utilities Franklyn Hoevertsz, den direccion di Prome Minister Evelyn Wever-Croes, y Minister Glenbert Croes.

Den un atake hopi infantil, sr. Hoevertsz a cuestiona e prome conferencia di clima y energia. Hoeverts a trece diferente argumento padilanti, djis pa kibra e exito di e conferencia.

Entre otro a cuestiona cu e conferencia no tabata habri pa tur hende, siendo cu esey ta algo usual ora bo ta organisa un conferencia ministerial. Un conferencia riba nivel di ministernan tin su protocol, y Hulanda ta hopi estricto den esaki. Asina mes Gobierno di Aruba a incorpora segmentonan cu a invita studiantenan di EPI, y otro stakeholders. Tambe a transmiti e ultimo dia ‘live’.


Partido MEP no ta bay den detayes di tur e criticanan, pasobra por nota cu nan ta basa riba envidia. Y ta comprendible, pasobra sr. Hoevertsz a organisa un cantidad di conferencia - por cierto sin invita comunidad di Aruba mes -, mas ainda, sin logra nada. Puro promesanan falso cu a costa pueblo di Aruba miyones di florin.


Di otro banda, e Gobierno actual, Gabinete Wever-Croes, ta organisa 1 conferencia y logra un fondo di 100 miyon euro. E fondo aki ta destina pa alivia e peso di ciudadanonan di pais Aruba, y lo bay completamente na e ciudadanonan di Aruba, Corsou y Sint Maarten.

Ta logico cu sr. Hoevertsz tin pues 100 miyon motibo pa ta envidioso, pasobra e no a logra ni 1 florin!


Mester bisa si cu sr. Hoevertsz tin hopi curashi si, despues di a wordo retira di Utilities, despues di no por a maneha e compania estatal cu no por a duna dividendo na gobierno, pa sali padilanti y critica e prome y unico conferencia cu realmente ta trece beneficio pa pueblo di Aruba.

Comments


bottom of page