Prome Minister Evelyn Wever–Croes:
Esaki ta a tercer aña cu Gobierno ta organisa e concurso di pintamento “Stima bo Cacho” pa Dia di Bestia pa muchanan di scol basico. E aña aki mas di 1000 mucha a entrega un pintura pa cual e siman aki Prome Minister Evelyn Wever - Croes a haci entrega di premio na cada mucha cu nan pintura ganado di acuerdo cu e diferente categorianan. Post Aruba tambe a scoge 4 pintura cu lo ta stampia pa aña 2022. Ta gradici cada mucha y tambe docente y mayornan cu a stimula e muchanan pa participa.
E idea di e concurso ta pa entre otro promove y conscientisa muchanan pa stima nan mascota. Y pa convence adultonan tambe pa cuida e mascotanan.
Premier a splica cu na Aruba mester enfoca mas riba bienestar di animalnan. Esaki ta cuminsa na ta un doño responsabel for di ora cu busca un cacho. Pa asina percura cu e tin un bon calidad di bida.
Por ultimo, Prome Minister a dirigi palabra di agradecimento na e comision cu ta yuda Gobierno pa organisa e concurso ya pa di tres aña. Ta mira cu cada aña e concurso ta creciendo mas cu ta trece satisfaccion. Pabien na tur e ganadonan!