top of page

LAMA BRUTO SEMPER A PERCURA PA FORMA UN BON MARINERO, MESCOS CU NOS LIDER EVELYN WEVER-CROES

Presidente di Congreso 2022, Dr. Gerrit Croes:

Diadomingo ultimo na e Congreso 2022 di Movimento Electoral di Pueblo (MEP), a hiba palabra Presidente di Congreso Dr. Gerrit Croes. Durante su discurso Dr. Croes a duna un splicacion di e trayectoria di sra. Evelyn Wever-Croes como lider di partido MEP pa e ultimo 11 añanan.

El a menciona cu ainda e ta corda 11 aña pasa na unda sra. Evelyn Wever-Croes a presenta den e ballroom di Westin Hotel. E tempo ey un total di 5000 hende a registra di cual 2500 hende por a vota y di e total ey, sra. Wever-Croes a haya 1623 voto, nombrando su persona lider di partido MEP te cu e dia di awe.


“Manera ta wordo bisa; “lama bruto semper a percura pa forma un bon marinero.” Y esaki ta exactamente loke lider di partido MEP, sra. Wever-Croes a pasa den dje. Na 2009 el a drenta arena politico como candidato di partido y a bay den oposicion na unda mester a atende cu un gobierno cu a mustra su incapacidad y mal maneho di finansas publico, hincando Aruba den un debe di 6 biyon florin, un mega debe cu ainda pueblo ta pagando miyones pa aña.” Dr. Croes a expresa.


Na 2017, MEP a drenta gobernacion y a haya un deficit di 300 miyon florin. Aki ta unda sra.Evelyn Wever-Croes como lider di partdio MEP a mustra su capacidad pa lidera bahando e deficit aki na 147 miyon florin y 25 miyon florin na 2019. Pa su trabou duro, su dedicacion y capacidad, sra. Evelyn Wever-Croes a bay elecion na aña 2021 na unda el a wordo recompensa cu 7518 voto, logrando asina e titulo di e di dos votegetter di partido MEP despues di Aruba su lider inmortal sr. Betico Croes.


Durante e ultimo aña, sra. Evelyn Wever-Croes, como Minister President di pais Aruba, a enfrenta retonan grandi. Fuera di esaki un CAft cu a purba na bula su cabes consehando Hulanda pa duna Aruba un Koninglijke Besluit (KB). Na final di dia, nan no a logra y e president di CAft mester a pidi su retiro prome cu e mester a bay, paso e no por a wanta cu tin un team capas pa dirigi e pais aki cu cariño, integridad y amor.


Pa e motibo aki, den seno di Santa Cruz, na cede di MEP tur e representantenan di partido y sostenedornan a uni hunto pa gradici sra. Evelyn Wever-Croes pa tur loke el a haci pa pais Aruba y un biaha mas reeligi su persona como lider di partido MEP.“Mi ta sigur cu pa e siguiente añanan nos lo logra supera tur e retonan y nos lo mustra cu sra. Evelyn Wever-Croes ta e lider y cu MEP ta e partido cu lo hiba Aruba na stabilidad.” Dr. Croes a expresa.



Comments


bottom of page