Diamars mainta, 13 di September, tawata apertura di Aña Parlamentario 2022-2023. Partido MEP ta felicita Parlamento nobo cu e bunita apertura di esaki. Señor Edgard Vrolijk un biaha mas a keda eligi como Presidente di Parlamento. Partido MEP ta gradici’e pa e trabou grandi cu el a haci aña 2021- 2022 y pa e manera recto cu el a dirigi Parlamento. Ta bisto cu no solamente cu su conocemento sino tambe cu su experencia e ta dedica na guia Parlamento y hiba Parlamento na un nivel mas halto di respet.
Pabien tambe na Raymond Kamperveen cu a keda re-eligi como Vice Presidente di Parlamento. Partido MEP ta gradici ambos y ta desea nan exito cu e trabounan cu nan tin nan dilanti.
E aña aki atrobe, apertura di Aña Parlamentario 2022-2023 tawata hopi bunita organisa y un ambiente hopi ameno a reina na unda cu tur presente a sinti nan hopi comfortable. E discurso di Gobernador S.E. Alfonso Boekhoudt tawata uno hopi elocuente den cual a elabora riba desaroyonan tra’i lomba y a tira un bista riba kico tin cu ta spera nos.
Palabranan hopi bon scogi pa expresa e trabounan duro cu Gabinete Wever-Croes ta haciendo den e fase di recuperacion na unda cu Aruba ya caba ta bayendo riba e bon caminda pa loke ta trata recuperacion den turismo, recuperacion economico y recuperacion financiero. Cu esaki, Gobernador ta duna Gobierno di Aruba tambe un sosten pa sigui cu e trabou grandi cu ta worde haci.
Partido MEP ta felicita Parlamentarionan y ta desea nan exito den e aña Parlamentario nobo aki cu e deseo cu cada un por pone Aruba na prome luga riba nan agenda.