Siman ta habri cu mas bon noticia
Secretario General di MEP:
Secretario General di MEP ta siguiendo tur e ultimo desaroyonan, decisionnan y/of proyectonan cu Gabinete Wever- Croes II ta logrando aunke den temponan sumamente dificil. Manera nos sa e retonan financiero bou di condicionnan di Hulanda ta sumamente dificil. A logra baha un deficit causa door di pandemia di 1028 miyon (2020) pa 25 miyon (2023) pero esaki ainda no ta suficiente pa Hulanda pero despues nos lo regresa riba esaki. Loke kier ilustra ta cu Ministernan di Gabinete Wever - Croes II apesar di tur e “challenge”, ta keda traha cu hopi creatividad y den tempo nan sumamente dificil ta logra proyectonan bunita y admirabel.
Asina Minister Dangui Oduber a lansa dialuna mainta na pia di sero di Hooiberg fase 2 di modernisacion y restauracion di sero di Hooiberg. Hooiberg y bisindario bay keda contento cu e proyecto aki. Banda di esaki hopi conciudadano ta uza e sero aki pa nan practica condicion y/of baha peso y keda den condicion. Sero di Hooiberg tin un haltura di 541 pia of 165 meter. Poco di su historia: na 1951 Eduardo Tromp a traha e prome trapi pa Hooiberg cu tabata consisti e tempo aya di 900 “steps”. Alrededor di 35 aña despues na 1990 gobierno a renoba y drecha e trapi cual a resulta uno di 563 “steps”. Awor na 2022 ta bolbe drecha tur e trapinan y alabes lo drecha y modernisa e hutnan. Lo agrega mosaico y ful ariba lo traha un mirador. Un inversion total di Afl.650 mil florin.
Despues cu TPEF a haci e prome fase awor ta continua hunto cu DOW pa e di dos fase. Esaki sigur lo bira un atraccion masha bunita pa pueblo y turista momento e keda ful cla. Pabien Gabinete Wever Croes II y sigur pabien minister Dangui Oduber cu un logro bunita den temponan hopi dificil. Sigur un #BonNoticia! Pabien Gabinete Wever - Croes II y pabien Minister Dangui Oduber. Hunto nos ta logra!