Dialuna 25 october 2021 e Landsverordening Integriteit (-Kandidaat) Ministers a wordo aproba dor di Parlamento di Aruba durante reunion publico number seis. Esaki ta un ocasion historico y un logro cu sigur nos tur mester celebra. E ley aki riba iniciativa di awor Minister sr. Rocco Tjon y Presidente di Parlamento sr. Edgard Vrolijk, a wordo aproba casi unanimamente, excepto pa Parlamentario sr. Miguel Mansur, cu a dicidi di vota encontra. Cu e aprobacion historico aki nos a establece e prome paso pa mas leynan, codigonan y conceptonan keda introduci den futuro cercano atraves di cualnan nos por sigui expande e transparencia y integridad cu e pueblo di Aruba kier wak den Gobierno y su Parlamento.
Tambe Parlamentario Shailiny Tromp-Lee a entrega un mocion dilanti pa inicia un concepto di integridad pa Parlamentarionan cual ta di aplaudi. E pensamento y conviccion tras di e iniciativa aki ta; si nos como Parlamentarionan ta exigi screening y ta pone un ley di integridad pa Gobierno, anto nos tambe como Parlamento tin mester di un ley asina ki.
For di cuminsamento por a wak cu e reunion no lo ta uno den cual lo tin mucho polemica. Tabata tin un sentido comun pa aproba e Landsverordening Integriteit Ministers apesar cu tabata tin algun pregunta y comentario. Un poco mas cu aña pasa, riba 6 october 2020, e mesun ley aki a wordo desaproba den Parlamento. Habriendo e prome ronda mi a presenta mi betoog den cual tambe mi a presenta un amienda. E amienda aki cual a keda aproba unanimamente, ta haci cu tur screening cu lo tuma lugar di awor en adelante, tambe lo inclui un test di droga pa tur (kandidaat-) ministers. E test di droga aki lo wordo ehecuta pa un dokter di cas. Pabien Aruba cu e logro grandi aki!