top of page

PARLAMENTARIO SHAILINY TROMP-LEE CU PALABRA DI FELICITACION PA COMITE OLIMPICO ARUBANO

Dianan 10 y 11 di maart 2023, mi a asisti na dos actividad di Comite Olimpico Arubano. Ambos actividad tabata exitoso y cu ta reflaha trabou y logronan grandi.

Encuentro di comunidad deportivo cu sector priva comercial

Dia 10 di maart COA a organisa un encuentro cu sector priva y personanan clave den e comunidad deportivo. Durante e anochi aki diferente persona a hiba palabra. Un di nan ta President di IOC, sr. Thomas Bach. Sigur e importancia y impacto di deporte a keda subraya durante e anochi aki. Alabes e beneficio cu sector priva y comercial por saca di deporte y nos deportistanan. Deporte no ta solamente medaya pero e ta tambe e balornan cu deporte ta trece cune. E balor real ta den yuda otro, den asisti otro, pa ta solidario cu otro y yuda otro engrandece y forma nos comunidad. Den deporte prome cu cualkier logro ta trabounan duro ta tuma lugar. Nada no ta bin cay for di shelo. Mescos ta conta den mundo di comercio.


Na hopi manera sector priva comercial por yuda nos deportistanan. Esakinan sigur a keda enfatisa durante e anochi aki. Tambe a keda subraya e posibilidad di crea situacion ‘win-win’ pa ambos partido. Otro aspecto cu a keda trata ta e echo cu nos topsportersnan ta conoce hopi reto, no solamente financiero pero tambe den relacion cu nan trabou. Nan no ta haya facilmente liber pa prepara of biaha pa competencianan, cual ta trece su retonan cu ne.


Na mi opinion e anochi aki a bay bon y hopi hende a asisti. Inicio di un proceso cu segun e ta bay ta desaroyando lo por trece beneficionan grandi pa ambos stakeholder.


Apertura Oficina nobo di COA

Diasabra mainta, dia 11 di maart, COA a realisa apertura di nan edificio nobo. Un edificio cu a keda masha bunita mes y cu e atencion special na nos deportistanan, nan cas! E apertura a tuma lugar mediante un Festival Deportivo caminda tabatin demostracion di algun di nos deportenan Olimpico y e deportenan mas popular na Aruba. Un mainta hopi ameno y deportivo.

Archivo Nacional tambe tabata tey presente cu un exposicion di e historia di deporte na Aruba. Riba e dia special aki señoranan Wanda Broeksema y Nicole Hoevertsz a keda reconoci pa nan trabounan realisa pa e mundo di deporte. Sigur mi tabatin e oportunidad di traha hunto cu sra. Hoevertsz y mi sa cu e merece esaki y mucho mas. No solamente pa su trayectoria pero tambe pa e aporte grandi cu e ta haci na e mundo deportivo aki na Aruba. Un pabien na ambos cu a ricibi e atencion special aki di IOC.


Mi kier a termina felicitando COA cu ambos actividad y alabes gradicinan pa nan trabou pa e mundo deportivo aki na Aruba.



Comments


bottom of page