top of page

PARLAMENTARIO SHAILINY TROMP-LEE TA TRECE DILANTI ACLARACIONNAN PA LOKE TA SU DISCURSO NA IPKO 2023

PART 2


Debi cu prensanan partidista ta saca cosnan for di contexto:

Parlamentario Tromp-Lee ta indica cu nos no mester lubida na ningun momento con e 2 leynan di consensus a subi riba mesa paso nan a subi na e momento mas vulnerabel di nos pais. Door di e pandemia Aruba a saca un man pidi Hulanda yudansa. Hulanda tabata dispuesto pa yuda pero esaki no a bin sin condicion. Berdad e ta placa aheno, placa di pueblo Hulandes, pero e condicionnan na su opinion no tabata realistico of eigenlijk acceptabel. Un situacion cu nunca nos a spera, mirando e necesidad grandi cu nos pais tabata pansado aden door di e pandemia. Nos no por lubida e contexto y e realidad di e situacion na e momentonan ey. Shelter in place, lockdown, economia practicamente plat, mama y tatanan di famianan na cas sin por traha, salubridad den chaos, hendenan muriendo etc.

Ta incomprendibel con a baha COHO for di mesa y a bin cu un "onderlinge regeling" y ainda e ley di consenso di supervision financiero ta riba mesa. Si nos ta bisa cu e proceso encamina pa a yega na e dos leynan di consenso aki no tabata corecto, si nos ta bisa cu nos a bin cu un "onderlinge regeling" na luga di COHO paso asina nos ta garantisa cu e islanan ta mantene nan autonomia y nan eigenaarschap, dicon esaki no ta conta pa Raft?


Esakinan ta e puntonan cu Parlamentario Tromp-Lee ta indica cu e tabata kier a accentua ora ta cuestiona su manera di mira e situacion. E ta kere cu door cu e situacion a “normalisa”, hopi kier lubida e contexto real di con cos a tuma lugar y e proceso encamina cual no ta corecto. No ta pornada cu ta papia di “gedwongen consensus” esta consenso logra bou di presion. Gobiernonan no tabata tin otro opcion cu acepta e condicionnan pa por garantisa cu nan pais y nan hendenan ta mantene cabes riba awa. Pesey mes nos como Parlamentonan di e islanan no por responsabilisa nan na e manera cu ta keda sugeri. Nos ta compronde e situacion. Nan a keda poni lomba na muraya.


Algo cu Parlamentario Tromp-Lee kier pa pueblo ta consciente di dje. Mescos cu Parlamentarionan di oposicion cada biaha ta cay den e mesun retorica, ta bay tin parlamentarionan di otro pais cu tambe kier purba tapa e solo cu un dede. Hopi kier pretende cu e pandemia no a tuma lugar, y cu e debe crea tabata pa yuda nos famia y negoshinan. Mescos cu ora nos a trata achteraf e cuadronan legal pa subsidio di salario, asistencia financiero na companianan chikito y mediano y Fase, cada biaha ta bin cu e retorica cu gobierno a actua incorecto, cu nan ta bin Parlamento pa nos drecha e situacion pa nan achteraf ta saca completamente di contexto. Esaki ta conta tambe pa e situacion cu e leynan di consensus. Ta lubida cu nos tabata den un pandemia y cu hende a wordo manda cas. Gobierno tabata traha di un manera deregula y no normalisa, pero sigur a maneha e pais aki cu determinacion y a tuma decisionnan importante. Algo cu nos no por y sigur no mag lubida!


Tromp-Lee kier pueblo realisa cu ora nos ta subi un avion pa bay cualkier reunion di IPKO, nos mester subi cu e pechi di Aruba bisti. Bogando na tur momento pa e mihor pa nos pais y nos hendenan. Tur hende mester realisa cu mescos cu nos no tabata kier COHO, nos no kier RAFT. Cu kier bisami cu ta cu mi gobierno mi tin cu atende sigur ta indica cu no kier papia di nos realidad y cu no kier splica dicon COHO no y RAFT si. Nos no mester lubida cu e leynan aki a wordo imponi y cu enberdad nos gobierno a bay di acuerdo y pesey awe nos ta papia di "gedwongen consensus". No por lubida cu gobierno no tabata tin otro alternativa. Nan mester a tuma e decision pa zorg cu e sosten financiero ta yega nos pais. Nos ta gradici cu na momento cu nos a saca man, nos a wordo yuda, pero ta cu e condicionnan nos tin problema. Mescos cu a respeta e parlamentonan den reino pa loke ta trata nos opinion di COHO, mi ta haya a yega ora pa papia tambe di e otro ley di consensus cu ta Raft. Ma ripara durante IPKO cu masha tiki kier combersa di esaki y cu sagradamente nan ta kere cu e mester bira nos realidad.


E accento poni den e discurso di Tromp-Lee ta cu mester bin cu e condicionnan di refinanciamento mas pronto posibel mirando cu na october venidero nos mester paga e suma di e debe mara na COVID di un solo biaha. Mas cu claro nos no por paga esaki y pesey mester refinanciamento. Pesey a keda enfatisa cu a yega ora pa papia habri y cla. Mester tin claridad kico ta e condicionan y con nos ta bay paga esaki bek. Pesey mes Tromp-Lee a haci apelacion riba e grado di solidaridad cu mester ta existi den Reino Hulandes, Cu mescos na Europa paisnan den Union Europeo ta yuda otro, e ta spera tambe cu e mesun man di yudansa berdadero aki keda duna na pais Aruba. El a accentua cu e ta spera cu ta bay bin un kwijtschelding of gift y tambe cu e ta spera cu e interes mara na e pagonan lo ta uno hopi abou y cu nos ta bay haya un periodo mas largo posibel pa paga e debe aki. Tromp-Lee ta indica cu ningun momento el a papia di portefeuille total di debe di nos pais. Un topico cu e ta haya cu tambe lo mester forma parti di combersacionnan entre e gobiernonan.


Tromp-Lee a finalisa bisando cu e ta haya un lastima cu prensanan partidista tampoco no por kita nan pechi y bisti esun di Aruba, cu no ta informa pueblo debidamente y no por stop di malinforma y guia tur cos den direccion pa crea desunion. Otro meta cuestionabel ta e persistencia pa kibra imagen di cierto politiconan of personanan na conviniencia propio y di un partido. Tromp-Lee ta subraya cu mientras ainda nos ta den un situacion financiero hopi delicado y den un estado di recuperacion e actitud aki sigur no ta yuda pasobra ta rekeri di union pa nos logra. Tur hende mester lora manga, traha y pone Aruba na prome lugar.

Comments


bottom of page