top of page

TECH LAB COLEGIO SAGRADO CURASON PRONTO UN REALIDAD

Premier Evelyn Wever - Croes y Futura ta informa:

Despues di esfuersonan extensivo y trabounan haci door di e cuerpo di Maestro-/Maestranan na Colegio Sagrado Curason, a keda confirma cu dentro di poco lo tin un Tech Lab nobo na Colegio Sagrado Curason!

E meta di e Tech Lab aki ta pa stimula innovacion, creatividad y exploracion den e studiante y maestronan. Pa yega na e Tech Lab aki, den e fase inicial lo converti un espacio actual den un Lab cu colornan vibrante, ekipa cu diferente tecnologia, ‘gadgets’, Virtual Reality (VR) equipment, y mucho mas.

Colegio Sagrado Curason, cu a haci tur e trabounan preparatorio hunto cu Aruba Futura Foundation, cu ta colaborando den e iniciativa aki, ta cla pa ekipa y lansa e Lab aki den e lunanan venidero den su prome fase. Trabounan ta andando caba pa converti e espacio aki, y den esaki kier a gradici y alabes aplaudi e cuerpo di maestro/maestranan cu den nan tempo liber ta trahando y literalmente construyendo esaki.


Gobierno di Aruba, Colegio Sagrado Curason, y Aruba Futura Foundation ta haci un yamado tambe na comunidad en general, comercio, y cualkier persona of instancia cu kier contribui na engrandece e Tech Lab aki den e proximo fase, pa contact libremente: ruzischka.tromp@skoa.aw, nadia.maduro@skoa.aw, of hello@futuralab.org pa cualkier informacion.

Idealmente, den un proximo fase, lo sigui ekipa e Tech Lab haciendo esaki uno mas grandi y habri pa otro scolnan, unda cu maestronan tambe por bishita y explora un ambiente diferente unda cu innovacion y exploracion ta central den e actividadnan.

Un biaha mas palabranan di elogio na e cuerpo di maestro-/maestranan di Colegio Sagrado Curason, y muy en especialmente Ruzischka Tromp y Nadia Maduro, cu a haci esaki un realidad a traves di nan esfuersonan, perseverancia, y vision. Keda pendiente pa mas informacion, y tambe e prome imagennan di e Tech Lab aki!


Prome Minister Evelyn Wever-Croes, den nomber di Gobierno di Aruba ta felicita Colegio Sagrado Curason cu e Tech Lab nobo y ta desea nan exito den stimula innovacion, creatividad y exploracion pa cada alumno di e scol por ta miho prepara den futuro pa loke ta trata e mundo di technologia.

Comments


bottom of page