top of page

TRANSPARENCIA TOTAL PA LOKE TA TRATA RESULTADO DI INVESTIGACION NA ARUBAHUIS

Parlamentario Shailiny Tromp-Lee:

Dia 13 di december 2022 a tuma lugar un Openbare Bijeenkomst caminda Gobierno conhuntamente cu Centraal Acountants Dienst (CAD) y Departamento di Recurso Humano (DRH) a bin duna un presentacion pa loke ta trata e investigacion cu a tuma lugar na Arubahuis y cu recientemente e proceso alrespecto a keda finalisa.

E investigacion a inicia a base di un email cu Minister President a ricibi na september 2021 caminda, substancia, a presenta posibel irregularidadnan cu tabata tuma lugar na Arubahuis. Inmediatamente Minister President a tuma contacto cu Director di CAD pa haci inicio di un investigacion al respecto y alabes a laga tuma lugar simultaneamente un sondeo y analisis di e proceso y proceduranan interno na Arubahuis. Ambos resultado a keda presenta den sala di Parlamento y alabes a keda indica kico tur Gobierno a haci caba pa garantisa cu Arubahuis ta funciona optimalmente, cumpliendo cu tur regla y ley.


E transparencia brinda pa Gobierno durante e reunion aki a demostra con serio y deligente nan a atende cu e caso di Arubahuis. Minister President a informa cu e investigacion y proceso disciplinario a finalisa y e dossier a keda pasa den man di Ministerio Publico pa stipulacion si tin actonan penal a tuma lugar y pa nan por fiha un postura. Cada persona investiga tin e espacio pa cana nan caminda huridico.


Mi ta di acuerdo cu Minister President cu e caso aki sigur ta causa nos berguensa y indignacion. E ta keda un caso lamentabel. E actonan refleha for di e resultadonan di investigacion ta inacceptabel. Partido MEP semper a indica cu esnan cu comete un iregularidad, fraude of corupcion mester para pa nan actonan y carga nan responsabilidad. Ta keda na cada un di nos pa mantene un compas moral como guia den nos accionnan.


Loke a keda subraya ta e hecho cu Minister President mes a inicia e investigacion, a atende e proceso completo cu tur clase di cautela y seriedad. El a percura pa un finalisacion corecto di e proceso y a bin informa Parlamento debidamente di esaki. Banda di esaki a keda enfatisa cu contrario na oposicion, MEP no ta brasa corupcion. Nos mester ta consciente cu kiebro di integridad ta pasa y lo sigui pasa. Ta con nos ta atende cu nan ta importante y ta demostra responsabilidad. Of bo ta brasa kiebro di integridad of bo ta condene.


Pa finalisa mi mester remarca cu e reunion aki tabata uno hopi importante y un topico di interes masha grandi pa oposicion. Lastimante ta 3 miembro di Fraccion di AVP so tabata presente, 1 di MAS y e lider di Fraccion di Accion21. Nan ta pidi pa informacion y ora esaki ta keda duna oposicion no por ta den su totalidad presente.

Comments


bottom of page