top of page

TWEEDE Y EERSTE KAMER DI HULANDA TIN CONFIANSA DEN GABINETE WEVER-CROES II

Negociando pa paga e 900 miyon di pandemia

Parlamentario Ricky Hoek:

Actualmente nos Prome Minister Sra. Evelyn Wever-Croes, Minister di Finansa y Cultura Sra. Xiomara Maduro y profesionalnan di finansa di Aruba ta na Hulanda pa negociacionnan importante pa loke ta trata e pago di e 900 miyon cu Hulanda a fia Aruba pa sobrebibi durante e pandemia.

Durante di un reunion cu e Comision fiho di Relacionnan di Reino, Minister di Finansa a duna un presentacion extenso tocante e situacion financiero di Aruba. Aki e comision a ricibi un bista amplio con e finansa di Aruba ta actualmente y tambe kico lo por spera pa e aña benidero. Por ehempel:

- Presupuesto 2023 a keda entrega na ora conforme ley na Parlamento di Aruba;

- A baha e debe/deficit grandi di Aruba di 1028 miyon pa 25 miyon florin;

- Aruba lo yega na e 1% surplus den su presupuesto pa 2023. Esey ta nifica, cu Aruba lo tin un ganashi di 63 miyon florin den su caha.

Esaki ta haci cu Hulanda tin confiansa den e maneho financiero di Gabinete Wever-Croes II, pasobra a keda demostra cu ta atende cu finansa publico na un forma serio y responsabel.


Pakico gobierno di Aruba mester a haci e prestamo di 900 miyon?

Nos tur por corda e dia cu e pandemia a yega Aruba y cu un poco dia despues tur cos a paralisa. E pandemia a pone henter mundo riba un ‘hold’ y asina tabata afecta tur hende y tur sector (salud y medicina, social, economico y financiero, turistico) den tur pais. Nos tambe a bira malo, nos tambe a wak e covid-19 den carni y weso, y tin famia cu a hasta experencia momentonan hopi tristo ora nan sernan keri a padece pa motibo di e virus di corona. Esey tabata tin como consecuencia cu aeropuertonan a sera, aerolineanan a stop di bula, hotelnan a keda bashi y tur comercio mester a sera porta.


Di e forma aki, gobierno a tuma e iniciativa y curashi di acerca Hulanda pa un fiansa. Un fiansa na e suma total di 900 miyon florin. Gobierno por a cubri cu un parti di e fiansa, e 300 miyon florin na entrada cu a cay atras ora cu tur sector y comercio a paralisa. Banda di esey, gobierno a duna un loonsubsidie, FASE, ayudo financiero na companianan chikito y mediano y un parti a bay na pakete di alimento. Esaki tur na un balor di 600 miyon florin. Y pa loke ta trata e vacunanan y e personal di cuido intensivo cu Hulanda a manda, ta sin ningun costo.

Den tempo di crisis, ta importante pa un gobierno ofrece e necesidadnan fisiologico (awa, cuminda, cas, paña) y e necesidad di siguridad (trabou, salud y seguridad personal) na su pueblo. Si no a tene cuenta cu necesidnan di e pueblo, e situacion lo tabata devastador.


Confiansa y solucion

Gobierno di Aruba a bay cu e meta pa negocia cu gobierno di Hulanda con lo bay paga bek e 900 miyon florin. E palabracionnan entre e gobiernonnan tabata cu na 2023 lo mester paga bek, pero e forma con esey lo mester sosode, lo keda palabra durante e reunionnan di e bishita actual. Segun Sr. Paul Rosenmöller, Parlamentario di Eerste Kamer di Hulanda “cu den reino Aruba ta profila su mes como un partner confiabel riba tereno financiero”. Confiansa ta e base primordial ora ta haci negociacionnan y pa defende e derecho y siguridad di un pueblo. Den e caso aki, Aruba por ta convenci cu tanto nos Prome Minister y Minister di Finansa ta haciendo un bon papel na nivel di reino y cu e resultadonan lo ta beneficioso pa tur partido.


Conseho na pueblo

Aña 2023 ta mustra di ta un aña financieramente un poco mas miho pa nos tur, pero ainda rond di mundo tin tensionnan grandi entre paisnan. Esey ta afecta nan produccion pa resto di mundo. Nos mester keda cauteloso cu nos placa y caminda cu por spar un 10 placa, laga nos haci esey, pa mayan nos mes por disfruta di dje.

Hozzászólások


bottom of page