Despues cu AVP a drenta gobierno na december 1985 ningun intento a ser haci pa reapertura di e refineria y dia 29 di januari 1988 Gabinete Eman a firma cu e compania Schotte Sloopwerken y tambe cu Westcoast pa corta e refineria completamente y bende e restonan como hero bieu den exterior.

Ta danki na MEP cu a gana e eleccion di 6 di januari 1989 y a forma un coalicion di MEP/PPA/ADN, esta Gabinete Oduber 1, e decision a wordo tuma pa para di inmediato e desmantelacion di e refineria.

Dia 28 di maart 1989, apenas un luna y mey despues cu e gobierno a ser forma, ex-Prome ​Minister sr. Nelson Oduber a ricibi representantenan di Coastal Refinery den su despacho y a cuminsa cu un periodo di negosacionnan intensivo pa logra reapertura di e refineria. 

Dia 19 di oktober 1989 Parlamento di Aruba a aproba e contrato cu Gabinete Oduber a firma cu Coastal Refinery. E contrato a encera e.o. cu e refineria lo permanece minimalmente 20 aña na Aruba. 

Despues di trabaonan duro y intensivo e reapertura di e refineria a bira realidad dia 20 di april 1991. Cu e reapertura aki tambe un era di progreso economico a bolbe cuminsa pa Aruba en general y pa San Nicolas en particular.