Motivacion

Saliendo for di un famia grandi na unda norma y balor, e amor pa bo prohimo y e determinacion pa yuda unda cu tin mester semper ta central, a pone cu e gana cu mi tin pa haci un diferencia pa nos pais a bira asina fuerte cu ya mi no por djis para keto mas.

 

Mi a dicidi di drenta politica como candidato pa sirbi henter pueblo di Aruba. Aruba tabata y ainda ta pasando den temponan dificil economicamente y financieramente, cual consecuencia ta devastador pa henter comunidad y pa futuro di nos yiunan. P’esey awor mas cu nunca e grupo vulnerabel y e clase media di nos comunidad mester haya un bos.

 

Cu sosten di mi famia mi a dicidi pa uni mi mes na partido Movimento Electoral di Pueblo pa hunto nos haci diferencia. Pa hunto nos laga e pueblo sinti e progreso atrobe cu tanto nos ta anhela p’e. E progreso berdadero cu nos ta sinti den nos hogar, den nos cartera, na nos trabou, den nos negoshinan.

 

Trahando cu mi Tata, tempo e tawata minister, mi a haya amplio conocemento riba tereno di gobernacion y riba funcionamento di e aparato gubernamental cu ta duna mi e confiansa y siguridad di por representa mi pueblo dignamente.

 

Mi ta determina pa sirbi Aruba cu mi conocemento y experiencia como tambe cu mi formacion spiritual. Mi fe den Papa Dios t’asina grandi, cu mi ta convenci, cu unda bo pone bo mes disponibel pa traha di curason, dedica, cu tur honestidad y pa bo prohimo, cosnan grandi lo sosode pa un y tur.