088A9417.jpg

Shannon 

Henriquez

Candidato #26

Shannon Mariangela Henriquez

Mi tin 44 aña di edad, y ta mama di 3 yiu homber. Mi storia ta cuminsa na mi bisawelo di fam Curiel y bisawela fam Rosel, tur 2 ta naci na Aruba, pero nan mayornan ta di afo. Mi welo y wela di banda di mi mama ta fam Curiel y Koolman. Mi bisawelo y wela tabata hendenan trahado di cunuco y criado di bestia (Bena di Koper, awendia conoci como Balashi) y mi wela tabata un ama di cas.

Di banda di mi tata su famia, ta famia Henriquez di Santa Cruz y di jong mi tata Sylvio Henriquez a bay biba na Hulanda na unda mi a keda biba cu mi mama, welo y wela na Bena di Koper na Balashi Santa Cruz.

Na Balashi mi a biba pa un periodo di 30 aña y despues a traha mi propio cas na Sabana Liber, Noord na unda mi ta bibando actualmente.

Mi tin suerte den bida di por bisa cu ami a lanta den un cunucu planta y cosecha door di mi padushi. Y te dia di awe ainda e cunucunan t’ey cu bestia. Ta manera e cancion di Don Ramon ta bisa ‘E Cunucu di Seit’.

Mi ta agradecido di unda mi ta bini y mi ta agradecido di por a studia aki na Aruba mes. Mi a bishita Colegio San Hose y Colegio San Antonio Mavo, ambos na Santa Cruz. Despues di esaki mi a sigui Colegio Arubano. Mi ta orguyoso di a sigui  profesionalisa mi mes na Aruba Hotel School y di e oportunidadnan cu mi a haya. Tambe mi ta orguyoso di eherce mi trabounan den loke mi a studia cual ta den e ramo di Recurso Humano. Pa e ultimo 10 aña mi a eherce mi trabounan den e ramo di Recurso Humano den sector priva.

For di jong mi famia a sostene e Partido di MEP y asina mi mes a yuda durante varios campania. Mi pasion ta riba tereno di Recurso Humano, na unda e hende ta central y aki ta na unda mi persona ta sinti mi identifica cu Partido MEP. Mi vision ta pa lucha pa igualdad pa e ser muhe tanto den e area di labor, salario y posicion y pa tin oportunidad di progresa. Mi ta kere den e ser muhe y su potencial. Mi kier wak mas hende muhe den posicionnan clave na Aruba.

Mi persona ta identifica mi mes cu e filosofia di MEP. Un Partido cu ta boga pa e hende ta central, siguramente den e momento aki di Pandemia cu mundo y nos pais Aruba ta enfrentando. Pues na mi opinion MEP a demostra cu e hende ta central. Mi ta pensa cu e hende tin pa haya su trato igual. Esaki ta mi experencia diariamente den mi area di recursonan humano.

MEP a demostra cu e ta un Partido cu por traha na momento di un crisis. Tanto crisis financiero ora nan a cuminsa goberna y como e crisis di salud mundial, cu ta e pandemia cu nos ta aden. Poco Partido por haci esaki. Facil pa goberna den tempo bon pero bo mester tin curashi y balentia pa por goberna den temponan menos bon.

Pa prome biaha Aruba a conoce un Prome Minister femenino den persona di Sra. mr Evelyne Wever  Croes  kende mi ta admira. Nos prome Minister ta un hende muhe cu a sa di maneha e pais aki den su peor crisis financiero y maneha e pais den un pandemia cu a asota  mundo henter. Mi ta felicita nos PM y lider di mi Partido, kende mi ta admira pa su balentia, sabiduria, su curashi y determinacion pa saca nos pais for di e situacion aki. Mi tin tur confiansa den esaki.

Mi ta termina pidiendo e pueblo di Aruba pa su sosten pa mi persona den mi carera politico. Tambe pa vota consciente dia 25 di juni venidero. P’esey vota pa Movimiento Electoral di Pueblo, y ami ta conta cu bo voto.  ‘Cu Bo nos ta avansa y cu Shannon Abo tambe ta conta!’

Logo Mep - Horizontal.png