una_orig.jpg

Historia

FUNDACION DI MEP

FUNDACION DI MOVIMIENTO ELECTORAL DI PUEBLO: MEP

Den transcurso di añanan e partido aki a contribui grandemente na e desaroyo politico, estatal, economico y social di nos pais. MEP como un partido social democrata a ser funda door di un movimiento popular a base di principionan democratico y cu un sentimento social pa bienestar di tur ciudadano den e pais aki. 

ORIGEN DI FUNDACION DI MEP

betico-rialto.jpg

Despues cu e lider di AVP, Shon A Eman a fayece na 1967 a surgi un diferencia di opinion serio den e partido aki. Betico Croes formando parti di Conseho di partido AVP tabata gosa di enorme confiansa di e lidernan di bario ya cu e tabata un persona hoben, dinamico, carismatico y capaz pa dirigi e partido, pero for di prome instante caba esaki no a conta cu e respaldo di directiva di AVP.

Mirando e desaroyo aki un reunion extraordinario di lidernan di bario di AVP a ser organisa den teatro Rialto dia 24 di januari 1971 caminda a tuma e decision unanime pa Betico Croes, kende a haya mayoria di voto durante e ultimo eleccion, ser proclama como Lider y Presidente di AVP.

Pero directiva di AVP a rechasa e decision aki. E caso a bay para te den Corte caminda a sali na cla y vocifera pa un ruman di Shon A Eman cu Betico Croes no por bira lider di AVP pasobra e no ta un Eman. E sentencia di hues Fränkel tabata cu e decision tuma den e reunion di lidernan di bario di AVP no tabata valido, consecuentemente Betico Croes no por bira lider di AVP. Esaki tabata motibo suficiente pa Betico Croes hunto cu otro compañeronan dicidi di bandona fila di AVP y forma un partido politico nobo.​

MEP A SER FUNDA DIA 9 DI FEBRUARI 1971

​Tabata riba dia 9 di februari 1971 na Cumana 84 cu e hoben y dinamico lider Arubano Betico Croes – den presencia y cu aprobacion di lidernan di bario for di tur skina di Aruba – a funda e partido di ideologia social democrata, Movimiento Electoral di Pueblo (MEP).
Y tabata den e reunion aki cu e colornan y emblema di partido a ser aproba: color geel y cu letternan cora. E emblema ta simbolisa un parha bulando riba Aruba buscando su libertad y iluminacion den e rayonan briyante di solo.

Despues di 3 luna cu MEP a ser funda, un eleccion di Eilandsraad a tuma lugar y nos partido den e periodo sumamente cortico aki toch a logra haya 7 asiento cual ta representa un tercer parti di e electorado Arubano. Sin duda cu MEP ta conta desde e tempo ey cu un nucleo solido ya cu durante 46 aña di existencia di nos partido nunca nos a yega di baha bao di 7 asiento, cual siguramente ta un logro historico den Reino Hulandes

  E PROME DIRECTIVA DI MEP TABATA CONSISTI DI: LIDER Y PRESIDENTE

Betico Croes 
Miembronan:
Efraim de Kort
Daniel Leo
Jossy Croes
Sixto Feliciano
Watty Vos
Cezare Terzano.

E personanan presente di parti di UNA tabata: Frans Figaroa | Dodo Figaroa | Poy Werleman | Tommy Leest.

prome-directiva_orig.jpg