Invitacion di Partido MEP, Diamars 5 di September
E aña aki, den celebracion henter aña di 51 aña di Partido Movimiento Electoral di Pueblo (MEP), a cuminsa bek cu encuentronan den tur districto. ‘Ban Topa’, ta un programa informativo den diferente bario cu e meta pa informa, delibera y contesta diferente pregunta di comunidad riba diferente topico cu ta regarda nan bario y nos pais Aruba.
Pa e reunionnan aki, Partido MEP ta invita no solamente esnan di e districto unda ta tene ‘Ban Topa’, pero Aruba en general pa bin scucha tur e informacionnan cu e candidatonan lo tin pa comparti. Lo duna oportunidad na tur cu desea pa haci nan preguntanan, haci nan comentarionan y of duna recomendacionnan.
Diamars 5 di September lo tuma luga e siguiente ‘Ban Topa’ den e bario di Paradera na Piedra Plat Entertainment Center cuminsando for di 6:30 pm. Lider di MEP, Evelyn Wever-Croes, candidato Darlaine Erasmus y candidato Michella Steenvoorde ta esnan encarga pa trece informacionnan riba e topiconan: Recuperacion y Retonan. Innovacion y Enseñansa. Plan di mayor y KIES na scolnan.
Den nomber di Partido MEP, Lider di MEP y Prome Minister di nos pais, Evelyn Wever-Croes ta invita pueblo di Paradera y vecindario y Aruba en general, pa e siguiente ‘Ban Topa’ diamars 5 di September pa 6:30 pm.
Lider di MEP ta gradici tur esnan, organisadornan, sostenedornan y demas participantenan, cu ta haci e encuentro aki posibel y exitoso. Den e encuentronan di ‘Ban Topa’ anterior, e union entre candidatonan di Partido MEP a resalta. Tur tawata presente y a participa di un forma of otro, sea pa duna informacion individual y of pa contesta e preguntanan cu a wordo haci.
“MEP a demostra di ta un ekipo y a demostra con fuerte e unon ta. Union ta e forsa di Partido MEP”, Lider di MEP a enfatisa.