DANKI ARUBA PA E SOSTEN DURANTE ELECCION
“Mi no a campaña pa bira e votegetter sino pa continua sirbi e pueblo di Aruba”
Lider di MEP Evelyn Wever-Croes ta gradici tur e 20,700 sostenedonan di Movimiento Electoral di Pueblo (MEP) pa nan sosten pa cu eleccion 2021. Un danki special ta bay na tur e 7518 votadonan cu a deposita nan confiansa den su persona y asina haci cu sra Evelyn Wever-Croes ta e votegetter di e eleccion aki.
E resutado aki sigur a trece hopi emocion pa e lider di MEP ya cu e no a campaña cu e obhetivo di bira e votegetter sino pa continua na sirbi e pueblo di Aruba.
Partido MEP a goberna den temponan hopi dificil na unda cu como Minister President Sra Wever-Croes mester a tuma varios decision cu no tur ora tabata na agrado di e pueblo. Pa e motibo aki lider di MEP a expresa di ta sumamente agradeci y contento di mira un resultado na unda cu pueblo ta aproba e maneho di Gabinete Wever-Croes den e ultimo 3 aña y 9 lunanan.
Cu e total di 20,700 voto, pueblo ta duna partido MEP e apoyo pa continua den e siguiente gobierno y ta duna sra Evelyn Wever-Croes cu 7518 voto e sosten pa sigui lidera e pais aki hunto cu un otro partner di coalicion pa asina por hiba Aruba den e siguiente etapa di recuperacion.
“E echo cu mi ta e Prome Minister femenino pa pais Aruba y awor e prome votegetter femenino, ta yena mi cu hopi orguyo. Mi ta gradici Dios pa e guia y proteccion den tur e temponan aki, mi famia pa nan sacrificionan, e ekipo di campaña, tur esnan cu a ayuda mi durante campaña, tur e sostenedonan di partido MEP y abo como ciudadano di Aruba pa bo sosten pa asina haci MEP e partido di mas grandi.” lider di partido MEP a termina bisando.