Procedura pa un gobierno nobo ta den man di hende capacita
PRONTO ARUBA LO TIN E GOBIERNO CU E MERECE
Pueblo a indica cu nan kier MEP den gobierno
E proceso di formacion di gobierno nobo a cuminsa. Gobernador a cuminsa papia cu tur lider politico y pronto lo bay apunta e informador. E informador lo ta esun cu tin cu bay sondia cerca e partidonan si tin suficiente base pa por traha hunto.
Lider di Partido MEP, sra. Evelyn Wever-Croes a duna di conoce cu den bista di partido MEP pueblo a papia cla.
“Pueblo a indica cu nan kier MEP den gobierno. Pueblo kier pa nos sigui lidera e gobierno y busca otro partner den coalicion. Nos di partido MEP lo traha cu tur partido cu excepcion partido AVP. Esaki no tin di haber cu ego of problemanan personal entre otro pasobra no tin espacio pa esey. Awor tin cosnan mas serio cu ta pone cu nos no por traha cu AVP. Un ehempel ta corupcion. MEP contrario na AVP, ta para pa combati corupcion. Si na caminda nos topa cu corupcion nos lo bringa y rechasa esaki.
Partido AVP no ta bringa ni rechasa corupcion sino nan ta brasa corupcion. E lider ta pidi hende pa vota pa hende corupto cual ta un berguensa grandi pa henter Aruba. E echo cu pa prome biaha den historia nos tin un persona cera den prison a wordo eligi pa drenta parlamento cu voto preferencial, ta un berguensa. Nos mester percuta pa e ley pasa inmediatamente pa e cos aki por wordo para y corehi y pa e no pasa nunca mas.
Pues e proceso di formacion ta andando y nos di partido MEP ta wardando e prome conversacion cu e informador y di eynan nos ta cla pa tuma e rienda pa sigui y yega na acuerdonan cu e otro partidonan cu ta RAIZ, MAS y ACCION 21 pa wak con nos por yega na otro pa forma un gobierno.
Pa nos ta importante pa wak e programanan di cada partido y pone nan bandi di otro pa wak cua ta mas similar cu otro. Ya caba tin indicacion, si bo weita e diferente programanan, den ki direccion nos por bay.
Nos ta warda e proceso constitutional di gobernador, respeta instituto di gobernador y di informacion pa nos por bisa mas di esaki.
Loke si mi kier pidi cada cuidadano di pais Aruba pa nan keda trankilo, no tin necesidad pa panico ni pa ansha. E procedura lo cana bon, e ta den man di hendenan capacita y pronto lo nos entrega na pueblo di Aruba e miho gobierno cu Aruba merece pa saca Aruba dilanti den e periodo di recuperacion”, Lider di MEP, sra. Evelyn Wever-Croes a expresa.